God's Majesty

¹Hle itokiše go etša monnatia, Gomme anke ke go botšiše, wena o ntsebiše."

²O be o le kae ge ke be ke thea lefase? Mpotše ge e ba o na le kwešišo."

³Ge e ba o tseba, mpotše gore ke mang a beilego meelo ya lona, Goba ke mang yo a otlolletšego lenti la go ela godimo ga lona?"

⁴Metheo ya lona ya mekoti e tsemilwe go eng, Ke mang yo a beilego leswika la lona la sekhutlo,"

⁵Ge dinaledi tša meso di goelela gotee ka lethabo, Gomme barwa ba Modimo ka moka ba gobela ka go hlalala?"

⁶Le gona ke mang yo a diretšego lewatle mapheko ka mejako, Lona leo le ilego la tšwa go etša ge eka le be le phulega le etšwa popelong;"

⁷Ge ke be ke bea leru gore e be kobo ya lona Gomme leswiswi le leso gore e be lešela la lona la go le phuthela,"

⁸Ge ke be ke le beela molao wa ka E bile ke le beela lepheko le mejako,"

⁹Ka re: ‘O tla goma mo, o ka se fetele pele; Maphoto a gago a phagamago a goma mo’?"

¹⁰Na o thomile go laela meso go tloga mathomong a mehla ya gago go ya pele? Na ke wena o tsebišitšego mahube bodulo bja ona,"

¹¹Gore a fihle pheletšong ya lefase, Gore ba kgopo ba hlohlorwe go lona?"

¹²Le iphetoša go etša letsopa leo le kibilwego ka sekibo, Dilo di ba maemong a tšona go etša ge eka di apere."

¹³Ba kgopo ba tingwa seetša sa lona, Gomme letsogo le phagamego lona le a robega."

¹⁴Na o kile wa fihla methopong ya lewatle, Goba na o kile wa sepelasepela o tsoma bodiba bja lona?"

¹⁵Na o utolletšwe dikgoro tša lehu, Goba na o ka bona dikgoro tša moriti wa lehu?"

¹⁶Na o kwešišitše mafelo a ikadilego a lefase? Bolela ge e ba o tseba tšeo ka moka."

¹⁷Bjale e kae tsela ya go ya moo seetša se dulago gona? Le gona bo kae bodulo bja leswiswi,"

¹⁸E le gore o di iše mellwaneng ya tšona Le gore o kwešiše ditsela tše di yago ntlong ya tšona?"

¹⁹Na o tsebile ka gobane ka nako yeo o be o belegwa, Le ka gobane matšatši a gago e le a mantši ka palo?"

²⁰Na o kile wa tsena ka dintlong tša go bolokela kapoko? Goba na o bona le dintlo tša go bolokela sefako,"

²¹Tšeo ke di boloketšego mohla wa tlalelo, Letšatšing la tlhabano le ntwa?"

²²Bjale e kae tsela yeo seetša se ikabaganyago ka yona, Le yeo phefo ya bohlabela e gašaganago lefaseng?"

²³Ke mang yo a buletšego meetsefula mokero A ba a thula tsela ya leru la pula la medumo ya magadima,"

²⁴E le gore pula e ne nageng mo go sego motho, E ne lešokeng moo go sego motho wa lefaseng,"