Job Remembers Better Days

¹Wahambisa uYobhi ukuphakamisa umzekeliso wakhe, wathi,"

²Yoo! Andaba bendineenyanga ezinjengezaphambili, Njengemihla abendigcinile uThixo;"

³Xa ukukhanya kwesibane sakhe bekuphezu kwentloko yam, Xa ngokukhanya kwakhe bendibuhamba ubumnyama;"

⁴Njengoko bendinjalo ngemihla yam yokwindla, Oko ukucweya kukaThixo bekuphezu kwentente yam;"

⁵Oko uSomandla ebesenam, Bengeenxa zonke kum abantwana bam;"

⁶Oko ebehlanjwa amabanga am ngamasi, Iliwa lindithululela imijelo yeoli."

⁷Xa ekuphumeni ngesango bendinyuka ukuya kuwo umzi, Ndimise isihlalo sam endaweni yembutho,"

⁸Andibona amadodana, azimela, Asuka amaxhego, ema."

⁹Abathetheli bakuyeka ukukhuluma, Babeka isandla emlonyeni."

¹⁰Ilizwi leenganga lazimela, Nolwimi lwazo lwanamathela ekhuhlangubeni azo,"

¹¹Kuba indlebe yeva, yathi ndinoyolo; Iliso labona, landingqinela."

¹²Kuba bendisiza iintsizana ezizibikayo, Neenkedama, noswele umncedi."

¹³Intsikelelo yabadakayo ibindizela, Nentliziyo yomhlolokazi bendiyimemelelisa."

¹⁴Ubulungisa bendibambatha bundambathe; Lwaba njengengubo yokwaleka nonkontsho ugwebo lwam."

¹⁵Bendingamehlo kwimfama, Bendiziinyawo kwisiqhwala;"

¹⁶Bendinguyise kumahlwempu, Netyala lendingabaziyo bendiligocagoca."

¹⁷Bendiwaphula amabamba ogqwethayo, Bendilikhupha emazinyweni akhe ixhoba."

¹⁸Ndathi ke, Ndiya kuphuma umphefumlo kunye nendlu yam, Ndiyandise imihla yam njengentaka engafiyo."

¹⁹Ingcambu yam iya kuvulelwa amanzi, Ulale umbethe emasebeni am."

²⁰Uzuko lwam luya kuhlala lulutsha kum, Sihlaziyeke isaphetha sam esandleni sam."

²¹Babendiphulaphula, balindele, Bathi tu ecebeni lam."

²²Emva kwelizwi lam babengaphindi bathethe, Kubachaphazele ukukhuluma kwam."

²³Babendilinda njengemvula, Imilomo yabo bayakhamisele eyasekwindla."

²⁴Bendibancumela, bencamile; Ukukhanya kobuso bam bangakusanganisi."

²⁵Bendibanyulela indlela, ndihlale ndiyintloko; Bendihlala njengokumkani phakathi komkhosi, Njengothuthuzela abenza isijwili."