Job's Integrity

¹Wahambisa uYobhi, waphakamisa umzekeliso wakhe, wathi,"

²Ehleli nje uThixo, olisusileyo ibango lam, USomandla, owenze krakra umphefumlo wam"

³(Kuba kusekum ukuphefumla kwam konke, Nomoya kaThixo usemathatheni am),"

⁴Umlomo wam awuthethi bugqwetha, Nolwimi lwam aluxeli nkohliso."

⁵Makube lee kum ukuthi, niyalungisa; Ndoda ndiphume umphefumlo, ndingayisusi kum ingqibelelo yam."

⁶Ndobambelela ebulungiseni bam, andiyi kubuyeka; Intliziyo yam ayiyi kungcikiva mini eziminini zam."

⁷Malube njengongendawo utshaba lwam, Nosukela phezulu kum abe njengogqwethayo."

⁸Kuba liyintoni na ithemba lentshembenxa, xa athe wawunqumla, Xa athe wawurhola uThixo umphefumlo wayo?"

⁹Wokuva na uThixo ukululahlamba kwayo, Xa ifikelwe yimbandezelo?"

¹⁰Khona inokuziyolisa na ngoSomandla? Ingamnqula na uThixo ngamaxesha onke?"

¹¹Ndiya kuniyala ngokusingisele esandleni sikaThixo; OkunoSomandla andiyi kukukhanyela."

¹²Yabonani, nonke niphela ngokwenu nikubonile; Yini na ke ukuba nithethe into engento yakonto?"

¹³Siso esi isabelo somntu ongendawo kuThixo, Nelifa labaziingqwangangqwili, abalamkelayo kuSomandla."

¹⁴Ukuba bathe banda oonyana bakhe, bandiselwa ikrele; Nabaphume embilinini wakhe abahluthi kukutya."

¹⁵Amaqongqolo akhe aya kungcwatywa kukufa, Abahlolokazi bakhe bangalili."

¹⁶Ukuba uthe wafumba isilivere njengothuli, Wazilungisela izambatho njengodaka:"

¹⁷Angazilungisa, koko ziya kwambathwa lilungisa, Nesilivere leyo babelane ngayo abamsulwa."

¹⁸Uyakha indlu yakhe njengenundu, Njengephempe elenziwe yimboniseli."

¹⁹Ulala phantsi esisityebi, akaphindi; Uvula amehlo akhe, angabikho."

²⁰Kumthabatha njengamanzi ukukhwankqa, Simbe ebusuku isaqhwithi."

²¹Luyamfukula ulophu lwasempumalanga, emke, Lumqweqwedise endaweni yakhe."

²²UThixo umgibisela angamcongi; Usibaleka asibaleke isandla sakhe."

²³Bamtyhwakrazela izandla, Bamenzele umsondlo, emke endaweni yakhe."