Job's Confidence

¹Yabona, konke oko likubonile iliso lam, Yakuva indlebe yam, yakuqonda."

²Njengoko nazi ngako, ndiyazi nam; Andiwi nganeno kwenu."

³Kodwa mna ndinga ndingathetha kuSomandla, Ndifuna ukuzihlamba kuThixo."

⁴Kodwa ke nina ningabadyobha ngobuxoki, Ningamagqirha angento nonke niphela."

⁵Anaba benithe tu kanye; Nibe niya kuba nilumkile."

⁶Khaniphulaphule ke ukuzihlamba kwam, Ukuphika komlomo wam nikubazele indlebe."

⁷UThixo niya kumthethelela ngobugqwetha na, Nimthethelele ngenkohliso na?"

⁸Niya kumnonelela na, Niphikele uThixo na?"

⁹Kolunga na xa athe wanigocagoca? Ninokumgculela na, njengokuba enokugculelwa umntu?"

¹⁰Wonohlwaya inene, Ukuba nithe ngasese nanonelela umntu."

¹¹Ubungangamela bakhe abuyi kunidandathekisa na, Kuniwele ukunkwantyisa kwakhe?"

¹²Izikhumbuzo zenu yimizekeliso yothuthu; Iingqolo zenu zoba ziingqolo zodaka."

¹³Yithini tu! Ndiyekeni, ukuze ndithethe, Kundihlele okundihlelayo."

¹⁴Kungani na ukuba ndiyiphathe inyama yam ngamenyo am, Umphefumlo wam ndiwubeke ezandleni zam?"

¹⁵Yabona, nokuba uthe wandibulala, ndolindela kuye; Kodwa ndozihlamba iindlela zam ebusweni bakhe."

¹⁶Kwaoko koba lusindiso kum: Okuba intshembenxa ingayi kuza ebusweni bakhe."

¹⁷Yivani, nikuve ukuthetha kwam, Nengxelo yam, ngeendlebe zenu."

¹⁸Khanibone, ndilicacisile ityala lam; Ndiyazi ukuba ndiya kugwetyelwa mna."

¹⁹Ngubani na ke ongabambana nam? Kuba bendiya kuthi tu kaloku, ndiphume umphefumlo."

²⁰Kodwa izinto ezimbini musa ukuzenza kum, Ndize ndingazisithelisi ebusweni bakho:"

²¹Isandla sakho sise kude kum, Nesothuso sakho singandidandathekisi."

²²Biza ke, ndisabele mna; Mhlawumbi ndithethe, undiphendule."

²³Zingaphi na izenzo ezigwenxa, nezono zam? Ndazise isikreqo sam, nesono sam."

²⁴Yini na ukuba ubusithelise ubuso bakho, Ube ndilutshaba kuwe?"

²⁵Uya kungcangcazelisa ugxothe igqabi eliphetshethwayo na, Usukele umququ owomileyo na?"

²⁶Ngokuba uzibhalela kum izinto ezikrakra, Undidlisa ilifa lezenzo ezigwenxa zobutsha bam;"

²⁷Uzifaka esitokisini iinyawo zam, Uwugqala wonke umendo wam; Uzikrwelela umda ojikelezayo izithende zeenyawo zam:"

²⁸Mna lo, uhageleyo njengevithi, Njengengubo edliwe ngamanundu."