Fall of Babylon Foretold

¹“Bagale ba Babilona ba kgaoditše go lwa. Ba ituletše dibong. Ba feletšwe ke matla. Ba etša basadi. Mafelo a bodulo a motse a fišitšwe. Mapheko a wona a go tswalela a robilwe."

²“Moromiwa o kitimela go gahlanetša moromiwa yo mongwe gomme motseta o kitimela go gahlanetša motseta yo mongwe go yo begela kgoši ya Babilona gore motse wa yona o thopilwe ka gohle,"

³le gore madibogo ona a thopilwe, dikepe tšeo di dirilwego ka mahlaka a papirase di fišitšwe ka mollo gomme banna ba ntwa bona ba ferekane.”"

⁴Se ke seo Jehofa wa madira, Modimo wa Isiraele a se boletšego a re: “Morwedi wa Babilona o etša seboa. Ke nako ya gore a gatakelwe. Go se gokae o tla tlelwa ke nako ya gore a bunwe.”"

⁵“Nebukadiretsara kgoši ya Babilona o ntšele a mphetša; o nkgakantšhitše. O ntirile gore ke etše sebjana seo se se nago selo. O mmeditše wa noga e kgolo; o tladitše mpa ya gagwe ka dilo tša ka tše di kgahlišago. O nkgogotše."

⁶Mosadi yo a dulago Tsione o tla re: ‘Bošoro bjo bo dirilwego go nna le mmeleng wa ka a bo wele Babilona!’ Jerusalema yona e tla re: ‘Madi a ka ona a nyakwe go badudi ba Kaladea.’”"

⁷Ka gona se ke seo Jehofa a se boletšego a re: “Šefa ke a go ahlolela gomme ke tla go lefeletša. Ke tla gopiša lewatle la motse woo ka pšheša le didiba tša wona."

⁸Babilona e tla ba mokgobo wa maswika, segola sa diphukubje, selo seo se tlabago le seo se leletšwago molodi ka go kgotsa gomme ya hloka modudi."

⁹Ka moka ga tšona di tla rora bjalo ka ditawana tša mariri. Di tla bopa go etša ditawana.”"

¹⁰“E tla re ba sa kukegile ka ba direla menyanya ya bona gomme ka ba nweša gore ba tagwe e le gore ba hlalale; ba tla robala boroko bja go ya go ile, bjoo ba ka se kego ba tsoga go bjona,” o re’alo Jehofa."

¹¹“Ke tla ba fološetša tlhabong bjalo ka kgapa, bjalo ka dikgapa gotee le diphooko.”"

¹²“Bonang kamoo Sheshake e thopilwego ka gona, le kamoo Tumišo ya lefase ka moka e ilego ya swarwa ka gona. Bonang kamoo Babilona e fetogilego selo feela seo se tlabago gare ga ditšhaba!"

¹³Lewatle le apešitše Babilona. E khurumeditšwe ke maphoto a lona a mantši."

¹⁴Metse ya yona e fetogile selo seo se tlabago, naga e se nago meetse le leganata. Nageng yona ye, ga go motho yo a tlago go dula metseng ya yona, e bile ga go bana ba batho bao ba tlago go feta go yona."

¹⁵Ke tla otla Bele yo a lego kua Babilona, ka ntšha seo a se meditšego molomong wa gagwe. Ditšhaba di ka se sa kgeregela go yena. Le gona, morako wa Babilona wona o tla wa."

¹⁶“Etšwang go yona, lena batho ba ka, gomme yo mongwe le yo mongwe a hlakodiše moya wa gagwe bogaleng bjo bo tukago bja Jehofa."

¹⁷Goba go sego bjalo dipelo tša lena di tla boifa, la tšhošwa ke pego yeo e tla kwewago nageng. Ngwageng wo go tla tla pego, ka morago ga yona ngwageng o latelago gwa ba le pego le bošoro lefaseng gomme mmuši a lwa le mmuši yo mongwe."

¹⁸Ka gona tsebang gore go tla matšatši ao ka ona ke tla senyago diswantšho tše di betlilwego tša Babilona; naga ya yona ka moka e tla hlabja ke dihlong, le bohle bao ba bolailwego ka sehlogo ba yona ba tla rapalala go yona."

¹⁹“Magodimo le lefase le tšohle tšeo di lego go tšona di tla hlabela Babilona mokgoši ka lethabo, ka gobane basenyi ba tla tla go yona ba etšwa ka leboa,” o re’alo Jehofa."

²⁰“Ga se feela gore Babilona e rapaladitše bao ba bolailwego ka sehlogo ba Isiraele, eupša le gona kua Babilona bao ba bolailwego ka sehlogo ba lefase ka moka ba rapaletše."

²¹“Lena bao ba phonyokgilego tšhoša, eyang pele. Le se ke la ema. Gopolang Jehofa le le kgole, le naganeng ka Jerusalema dipelong tša lena.”"

²²“Re hlabilwe ke dihlong, ka gobane re kwele tša kgobošo. Difahlego tša rena di aparetšwe ke dihlong ka gobane bašele ba hlasetše mafelo a makgethwa a ntlo ya Jehofa.”"

²³“Ka gona tsebang gore go tla matšatši ao ka ona ke tla senyago diswantšho tša Babilona tše di betlilwego, gomme nageng ya yona ka moka go tla tsetsela yo a hlabilwego,” o re’alo Jehofa."

²⁴“Gaešita le ge Babilona e ka hlatlogela magodimong ya ba ya dira gore sebo sa yona seo se phagamego se se ke sa fihlelelwa, fela e tla tlelwa ke basenyi ba etšwa go nna,” o re’alo Jehofa."

²⁵“Theetšang! Go kwala mokgoši o tšwago Babilona, le kweng tshenyego e kgolo e tšwago nageng ya Bakaladea,"

²⁶ka gobane Jehofa o senya Babilona gomme o tla homotša lešata le legolo la yona, le maphoto a basenyi a tla dubadubega go etša meetse a mantši. Lešata la lentšu la bona le tla homotšwa."

²⁷Babilona e tla tlelwa ke mosenyi gomme bagale ba yona ba tla thopša. Mara a bona a tla pšhatlaganywa ka gobane Jehofa ke Modimo wa ditefetšo. Ruri o tla lefetša."

²⁸Ke tla dira gore dikgošana tša yona le ba bohlale ba yona, babuši ba yona le matona a yona gotee le bagale ba yona ba tagwe gomme ba tla robala boroko bja go ya go ile, bjoo ba ka se kego ba tsoga go bjona,” o re’alo Kgoši, yoo leina la gagwe e lego Jehofa wa madira."

²⁹Se ke seo Jehofa wa madira a se boletšego a re: “Morako wa Babilona gaešita le ge o le sephara, o tla phušolwa; dikgoro tša yona gaešita le ge di phagame, di tla tšhungwa ka mollo. Ditšhaba di tla itapišetša lefeela gomme merafo ya itapišetša go fišwa ke mollo; di tla fo itapiša.”"

³⁰Le ke lentšu leo moporofeta Jeremia a le laetšego Seraya morwa wa Neriya morwa wa Mahaseya ge a be a eya le Tsedekia kgoši ya Juda Babilona ngwageng wa bone e le kgoši; Seraya yena e be e le mohlokomedi wa dintlo tša mošate."

³¹Jeremia a ngwala pukung e tee bošula ka moka bjo bo bego bo tla wela Babilona, ona mantšu a ka moka ao a ngwadilwego ka Babilona."

³²Jeremia a buša a re go Seraya: “Gateetee ge o fihla Babilona gomme o iponela yona, o bale mantšu a ka moka ka go hlaboša."

³³O re: ‘Jehofa, ke wena o boletšego ka naga ye gore o e fediše e le gore go yona go se sa ba le modudi, e ka ba motho goba seruiwa, gore e be lešope go iša mehleng ya neng le neng.’"

³⁴E tla re ge o feditše go bala puku ye, o tla e kgokelela leswika gomme o e lahlele ka Nokeng ya Eforate."

³⁵Wena o re: ‘Ke kamoo Babilona e tla nwelelago ka gona gomme le ka mohla ya se sa rotoga ka baka la bošula bjoo ke e tlišetšago bjona; ba tla fo itapišetša lefeela.’” Mantšu a Jeremia a felela mo."

³⁶Tsedekia o be a na le nywaga e masomepedi-tee ge a thoma go buša, gomme o bušitše Jerusalema nywaga e lesometee. Leina la mmagwe e be e le Hamutala morwedi wa Jeremia wa Libina."

³⁷O ile a dira tše mpe mahlong a Jehofa, go ya ka tšohle tšeo Jehoyakima a bego a di dirile."

³⁸Tšeo di diregilego Jerusalema le Juda di bakile bogale bja Jehofa, moo a ilego a lahla metse ye le go e tloša pele ga sefahlego sa gagwe. Tsedekia yena a rabela go kgoši ya Babilona."

³⁹Ya re ngwageng wa senyane wa ge a buša e le kgoši, kgweding ya lesome, letšatšing la lesome la kgwedi, gwa tla Nebukadiretsara kgoši ya Babilona a na le madira a gagwe ka moka go tlo hlasela Jerusalema gomme ba e dikanetša ka mešaša le go e rakelela ka morako go e dikologa gore ba lwe le yona."

⁴⁰Ka gona motse wa rakelelwa go fihla ngwageng wa lesometee wa pušo ya Kgoši Tsedekia."

⁴¹Kgweding ya bone, letšatšing la senyane la kgwedi, tlala le yona ya ba e šoro motseng gomme gwa se be le senkgwa bakeng sa batho ba naga."

⁴²Motse wa feleletša o šwahletšwe; ge e le banna ka moka ba ntwa ba tšhaba gomme ba tšwa motseng bošego ka tsela ya kgoro e lego magareng ga merako e mebedi yeo e bapilego le serapa sa kgoši, mola Bakaladea ba be ba le gohle ba dikologile motse; ba sepela ka tsela ya Araba."

⁴³Madira a Bakaladea a rakediša kgoši a swara Tsedekia leganateng la Jeriko; madira a gagwe ka moka a gašana a tšhabela kgole le yona."

⁴⁴Ke moka madira a Bakaladea a swara kgoši yeo a e rotošetša go kgoši ya Babilona kua Ribila nageng ya Hamathi gore a e ahlole."

⁴⁵Kgoši ya Babilona ya bolaya barwa ba Tsedekia pele ga mahlo a gagwe, ya ba ya bolaya le dikgošana ka moka tša Juda kua Ribila."

⁴⁶Kgoši ya Babilona ya foufatša mahlo a Tsedekia gomme ka morago ga moo ya mo tlema ka ditlemo tša koporo ya mo iša Babilona ya mmea kgolegong go fihlela mohlang a ehwa."

⁴⁷Kgweding ya bohlano, letšatšing la lesome la kgwedi, ke gore, ngwageng wa lesomesenyane wa pušo ya Kgoši Nebukadiretsara kgoši ya Babilona, Nebusaradani molaodi wa bahlapetši yo a bego a ema pele ga kgoši ya Babilona o ile a tla Jerusalema."

⁴⁸O ile a fiša ntlo ya Jehofa le ntlo ya kgoši gotee le dintlo ka moka tša Jerusalema; a fiša dintlo ka moka tše dikgolo ka mollo."

⁴⁹Madira ka moka a Bakaladea ao a bego a na le molaodi wa bahlapetši a phušola merako ka moka yeo e bego e dikologile Jerusalema."

⁵⁰Ba bangwe ba babotlana ba setšhaba le batho ka moka bao ba bego ba šetše motseng le batšhabi bao ba bego ba ikgafetše go kgoši ya Babilona gotee le bašomi ka moka bao ba nago le bokgoni, Nebusaradani molaodi wa bahlapetši a ba iša bothopša."

⁵¹Nebusaradani molaodi wa bahlapetši o ile a šadiša ba bangwe ba babotlana ba naga gore e be balemi ba morara le bao ba šomago ka kgapeletšo."

⁵²Bakaladea ba ile ba pšhatlaganya dikokwane tša koporo tša ntlo ya Jehofa le dikoloyana gotee le sebjana se segologolo sa koporo seo se bego se le ka ntlong ya Jehofa gomme ba rwala koporo ka moka ya tšona ba e iša Babilona."

⁵³Ba tšea le ditšhitswana tša go olela melora le digarafo le ditimamabone le meruswi le dinwelo gotee le didirišwa ka moka tša koporo tšeo ba bego ba hlankela ka tšona."

⁵⁴Molaodi wa bahlapetši a tšea dibjana le dibjana tša go swara magala le meruswi le ditšhitswana tša go olela melora le dihlomapone le dinwelo le meruswi e mengwe, tšeo e bego e le tša gauta ya kgonthe le tšeo e bego e le tša silifera ya kgonthe."

⁵⁵Dikokwane tše pedi, sebjana se segologolo le dipoo tše lesomepedi tša koporo tšeo di bego di le ka tlase ga sebjana seo le dikoloyana, tšeo Kgoši Solomone a bego a di diretše ntlo ya Jehofa, boima bja koporo ya didirišwa tše ka moka ga tšona ga se bja ka bja elwa."

⁵⁶Ge e le dikokwane tšona, kokwane e nngwe le e nngwe e be e le ya bophagamo bja dikubiti tše lesomeseswai, e tateditšwe ka lenti la botelele bja dikubiti tše lesomepedi; bokoto bja yona e le bophara bja menwana e mene, gomme mo gare e le phago."

⁵⁷Hlogwana ya kokwane e be e le ya koporo, bophagamo bja hlogwana e tee e be e le dikubiti tše hlano; ge e le mologo le diswantšho tša digarenate tšeo di bego di le godimo ga yona go e dikologa, ka moka e be e le tša koporo; kokwane ya bobedi e be e na le tše di swanago le tšona tše, le tšona digarenate tšeo."

⁵⁸Digarenate tšeo di bego di dikologile hlogwana e be e le tše masomesenyane-tshela gomme digarenate ka moka tšeo di bego di le mologong wo o e dikologilego e be e le tše lekgolo."

⁵⁹Le gona, molaodi wa bahlapetši a tšea Seraya moperisita yo mogolo le Tsefanya moperisita wa bobedi gotee le baletamejako ba bararo,"

⁶⁰motseng a tšea mohlankedi wa kgoro yo e bego e le molaodi wa banna ba ntwa, a tšea le banna ba šupago bao ba bonanago le kgoši ka mehla bao ba hweditšwego motseng le mongwaledi wa molaodi wa madira yo a kgobokanyago batho ba naga, a tšea le banna ba masometshela bathong ba naga bao ba hweditšwego motseng."

⁶¹Nebusaradani molaodi wa bahlapetši a tšea batho bao a ba iša go kgoši ya Babilona kua Ribila."

⁶²Kgoši ya Babilona ya ba hlasela gomme ya ba bolaela kua Ribila nageng ya Hamathi. Ka go re’alo Juda ya tlošwa nageng ya yona ya išwa bothopša."

⁶³Ba ke batho bao Nebukadiretsara a ba išitšego bothopša: ngwageng wa bošupa, o išitše Bajuda ba dikete tše tharo-masomepedi-tharo (3 023)."

⁶⁴Ngwageng wa lesomeseswai wa pušo ya Nebukadiretsara, a thopa meoya e makgoloseswai-masometharo-pedi (832) e tšwago Jerusalema."