After the Fall

¹Batho ka moka bao Ishimaele a bego a ba thopile go tšwa Mitsipa ba retologa ba goma ba ya go Johanana morwa wa Karea."

²Ge e le Ishimaele morwa wa Nethania, o phonyokgile le banna ba seswai pele ga Johanana, a ya go bana ba Amoni."

³Bjale Johanana morwa wa Karea le matona ka moka a madira ao a bego a na le yena ba tšea mašaledi ka moka a batho ao ba boilego le ona go Ishimaele morwa wa Nethania, go tšwa Mitsipa, ka morago ga ge Ishimaele a bolaile Gedalia morwa wa Ahikama, bannatia, banna ba ntwa le basadi ba bona le bana ba banyenyane gotee le bahlankedi ba kgoro, bao Johanana a boilego le bona Gibeoni."

⁴Ba sepetše ke moka ba dula lefelong la bodulo la Kimehama leo le bego le le kgauswi le Betlelehema, e le gore ba ye pele gomme ba tsene Egipita,"

⁵ka baka la Bakaladea; ka gobane ba be ba ba tšhaba, ka ge Ishimaele morwa wa Nethania a be a bolaile Gedalia morwa wa Ahikama, yoo kgoši ya Babilona e bego e mo laetše gore a okamele naga."

⁶Matona ka moka a madira le Johanana morwa wa Karea le Jesania morwa wa Hoshaya gotee le batho ka moka, go tloga ka yo monyenyanenyenyane go fihla ka yo mogologolo, ba batamela"

⁷ba re go moporofeta Jeremia: “Hle ekwa kgopelo ya rena ya go kgopela go gaugelwa, o re rapelele go Jehofa Modimo wa gago, o rapelele le mašaledi a ka moka ka gobane re tlogetšwe re le ba sego kae go ba bantši, bjalo ka ge o re bona."

⁸Anke Jehofa Modimo wa gago a re botše tsela yeo re swanetšego go sepela ka yona le seo re swanetšego go se dira.”"

⁹Ke moka moporofeta Jeremia a re go bona: “Ke kwele. Šefa ke rapela Jehofa Modimo wa lena go ya ka mantšu a lena; lentšu le lengwe le le lengwe leo Jehofa a le arabago ka lona ke tla le botša lona. Nka se le utele le lentšu letee.”"

¹⁰Bona ba re go Jeremia: “Anke Jehofa e be hlatse e botegago le ya therešo go rena ge e ba re ka se dire go ya ka lentšu le lengwe le le lengwe leo Jehofa Modimo a go romelago go rena ka lona."

¹¹Go sa šetšwe gore lentšu la gagwe ke le lebotse goba le lebe go rena, re tla kwa lentšu la Jehofa Modimo wa rena yo re go romago go yena, e le gore dilo di re sepelele gabotse ka ge re ekwa lentšu la Jehofa Modimo wa rena.”"

¹²Ya re bofelong bja matšatši a lesome lentšu la Jehofa la tlela Jeremia."

¹³A bitša Johanana morwa wa Karea le matona ka moka a madira ao a bego a na le yena gotee le batho ka moka, go tloga ka yo monyenyanenyenyane go fihla ka yo mogologolo;"

¹⁴a re go bona: “Se ke seo Jehofa Modimo wa Isiraele, yoo le nthomilego go yena gore ke iše kgopelo ya lena ya go kgopela go gaugelwa, a se boletšego a re:"

¹⁵‘Ruri ge e ba le tla tšwela pele le dula nageng ye, gona ke tla le aga gomme nka se le phušole, ke tla le bjala gomme nka se le tumole; ka gobane ke tla itsholela bošula bjo ke le baketšego bjona."

¹⁶Le se ke la tšhošwa ke kgoši ya Babilona, yeo le e boifago.’ “‘Le se ke la tšhošwa ke yona,’ o re’alo Jehofa, ‘ka gobane ke na le lena, gore ke le phološe le go le hlakodiša seatleng sa yona."