Jerusalem Falls

¹Ke moka Bajuda ka moka ba boa mafelong ka moka ao ba bego ba tšitlanyeditšwe go ona, ba tla nageng ya Juda go Gedalia kua Mitsipa. Ba kgoboketša beine le dienywa tša selemo ka bontši kudu."

²Ge e le Johanana morwa wa Karea le matona ka moka a madira ao a bego a le nageng, a tla go Gedalia kua Mitsipa."

³Ke moka a re go yena: “Na ga o tsebe gore Baalise, kgoši ya bana ba Amoni, o romile Ishimaele morwa wa Nethania gore a tlo bolaya moya wa gago?” Eupša Gedalia morwa wa Ahikama a se ke a ba dumela."

⁴Johanana morwa wa Karea a re go Gedalia, ba le lefelong le le utegilego kua Mitsipa: “Gona bjale ke nyaka go sepela ke yo bolaya Ishimaele morwa wa Nethania, ka ge go se le o tee yo a tlago go tseba. Go re’ng a tlo bolaya moya wa gago le gona go re’ng batho ka moka ba Juda bao ba kgobokeletšwago go wena ba swanetše go gašanywa gomme mašaledi a Juda a hwe?”"

⁵Eupša Gedalia morwa wa Ahikama a re go Johanana morwa wa Karea: “O se ke wa dira selo se, ka gobane seo o se bolelago ka Ishimaele ke maaka.”"

⁶Ka kgwedi ya bošupa Ishimaele morwa wa Nethania morwa wa Elishama wa leloko la bogošing le yo e lego wa banna ba bagolo ba kgoši le banna ba bangwe ba lesome bao ba bego ba na le yena ba tla go Gedalia morwa wa Ahikama kua Mitsipa. Ba ja senkgwa ba le gotee kua Mitsipa."

⁷Ke moka Ishimaele morwa wa Nethania le banna ba lesome bao ba bego ba na le yena ba emelela ba bolaya Gedalia morwa wa Ahikama morwa wa Shafane ka tšhoša. Ka gona a bolaya yoo kgoši ya Babilona e bego e mo laetše gore a okamele naga."

⁸Ishimaele a bolaya Bajuda ka moka bao ba bego ba na le Gedalia kua Mitsipa gotee le Bakaladea bao ba bego ba le moo, ke gore, bona banna ba ntwa."

⁹Ya re letšatšing la bobedi ka morago ga go bolawa ga Gedalia, ge go be go se na le o tee yo a tsebago ka se,"

¹⁰gwa tla banna ba tšwago Shikeme, Shilo le ba tšwago Samaria, e le banna ba masomeseswai bao ba beotšego ditedu tša bona, ba gagotše diaparo tša bona e bile ba itshegakantše gomme ba swere sebego sa mabele le diorelo diatleng tša bona gore ba di iše ntlong ya Jehofa."

¹¹Ishimaele morwa wa Nethania a tšwa Mitsipa gore a yo ba gahlanetša, a lla a le gare a sepela. Ya re ge a gahlana le bona a re go bona: “Etlang go Gedalia morwa wa Ahikama.”"

¹²Eupša ya re ge ba tsena ka motseng, Ishimaele morwa wa Nethania a ba bolaya gomme a ba lahlela ka moleteng, yena le banna bao ba bego ba na le yena."

¹³Eupša go be go na le banna ba lesome bao ba bego ba le gare ga bona, bao gateetee ba ilego ba botša Ishimaele ba re: “O se ke wa re bolaya, ka gobane re na le matlotlo ao a utilwego tšhemong, e lego korong le garase le makhura gotee le dinose.” Ka gona a ba lesa gomme a se ke a ba bolaya le bana babo bona."

¹⁴Molete woo go wona Ishimaele a lahletšego ditopo ka moka tša banna bao a ba bolailego e be e le o mogolo, e lego woo Kgoši Asa a o epilego ka baka la Baasha kgoši ya Isiraele. Ke wona woo Ishimaele morwa wa Nethania a o tladitšego babolawa."

¹⁵Ke moka Ishimaele a thopa mašaledi ka moka a batho ao a bego a le Mitsipa, barwedi ba kgoši le batho ka moka bao ba bego ba šetše Mitsipa, bao Nebusaradani molaodi wa bahlapetši a bego a ba beile gore ba hlokomelwe ke Gedalia morwa wa Ahikama. Ka gona Ishimaele morwa wa Nethania a ba iša bothopša gomme a sepela a tshelela go bana ba Amoni."

¹⁶Ka morago Johanana morwa wa Karea le matona ka moka a madira ao a bego a na le yena ba kwa dilo ka moka tše mpe tšeo Ishimaele morwa wa Nethania a di dirilego."

¹⁷Ka gona ba tšea banna ka moka ba yo lwa le Ishimaele morwa wa Nethania gomme ba mo hwetša meetseng a mantši ao a bego a le Gibeoni."

¹⁸Ya re ge batho ka moka bao ba bego ba na le Ishimaele ba bona Johanana morwa wa Karea le matona ka moka a madira ao a bego a na le yena, ba thaba."