Jeremiah Buys a Field

¹“‘Ka gobane bana ba Isiraele le bana ba Juda ba ipontšhitše e fo ba badiri ba seo e lego se sebe mahlong a ka, go tloga bofseng bja bona go ya pele; bana ba Isiraele ba bile ba nkgopiša ka modiro wa diatla tša bona,’ o re’alo Jehofa."

²‘Motse wo go tloga letšatšing leo ba o agilego ka lona go fihla letšatšing le, ga se ya ba wa selo ge e se feela go mpakela kgalefo le go mpakela bogale, gore ke o tloše pele ga mahlo a ka,"

³ka baka la bobe ka moka bjo bana ba Isiraele le bana ba Juda ba bo dirilego gore ba nkgopiše, bona, dikgoši tša bona, dikgošana tša bona, baperisita ba bona le baporofeta ba bona gotee le batho ka moka ba Juda le badudi ba Jerusalema."

⁴Ba dulela go mpha mokokotlo e sego sefahlego; gaešita le ge ke be ke ba ruta, ke tsoga e sa le ka masa ke ba ruta, fela go be go se le o tee wa bona yo a theetšago gore a hwetše tayo."

⁵Ba bea dilo tša bona tša makgapha ntlong yeo e bitšwago ka leina la ka, gore ba e šilafatše."

⁶Go feta moo, ba agile mafelo a phagamego a Baali ao a lego moeding wa morwa wa Hinomo, e le gore ba fetišetše Mmoleke barwa ba bona le barwedi ba bona mollong, e lego selo seo ke sa kago ka ba laela sona, e bile go dira seo se šišimišago ga se gwa ka gwa rotoga pelong ya ka, e le ka morero wa go dira gore Juda e dire sebe.’"

⁷“Ka gona, se ke seo Jehofa Modimo wa Isiraele a se boletšego mabapi le motse wo, woo le rego o tla gafelwa seatleng sa kgoši ya Babilona ka tšhoša le ka tlala gotee le ka leuba la bolwetši, a re:"

⁸‘Šefa ke ba kgoboketša go tšwa dinageng ka moka tšeo ke tla bego ke ba tšitlanyeditše go tšona ke selekegile, ke befetšwe, e bile ke galefile kudu; ke tla ba bušetša lefelong le gomme ka ba dudiša ka polokego."

⁹E tla ba batho ba ka gomme nna ke tla ba Modimo wa bona."

¹⁰Ke tla ba nea pelo e tee le tsela e tee gore ba dule ba mpoifa, bakeng sa go hola bona le barwa ba bona bao ba tlago ka morago ga bona."

¹¹Ke tla dira kgwerano ya neng le neng le bona ya gore ke se ke ka ba furalela, e le gore ke ba dire botse; ke tla ba tsenya poifo ya gore ba mpoife dipelong tša bona e le gore ba se ke ba ntlhanogela."

¹²Ke tla ba thabela gore ke ba dire botse, le gona ke tla ba bjala e le ka kgonthe nageng ye ka pelo ya ka ka moka le ka moya wa ka ka moka.’”"

¹³“Ka gobane se ke seo Jehofa a se boletšego a re: ‘Bjalo ka ge ke tlišeditše batho ba bošula bjo ka moka, ka mo go swanago ke ba tlišetša botse ka moka bjo ke bo bolelago mabapi le bona."

¹⁴Go tla rekwa mašemo nageng ye yeo le tla rego ka yona: “Ke lešope leo le se nago motho le seruiwa. E gafetšwe seatleng sa Bakaladea.”’"

¹⁵“‘Batho ba tla ithekela mašemo ka tšhelete gomme go tla ngwalwa lengwalong la bohlatse la tiišwa ka seka, gwa tšewa dihlatse nageng ya Benjamini le mafelong a dikologilego Jerusalema le metseng ya Juda le metseng ya seleteng sa dithabeng le metseng ya nagatlase gotee le metseng ya ka borwa ka gobane ke tla buša mathopša a bona,’ o re’alo Jehofa.”"

¹⁶Lentšu la Jehofa la tlela Jeremia la bobedi, ge a be a sa tswaleletšwe Lapeng la Mohlapetši, la re:"

¹⁷“Se ke seo Jehofa Modiri wa lefase a se boletšego, Jehofa Mohlami wa lona yo a le theilego ka go tia, yena yo leina la gagwe e lego Jehofa, a re:"

¹⁸‘Mpitše gomme ke tla go araba, ka ba ka go botša dilo tše dikgolo le tše di sa kwešišegego tšeo o sa kago wa di tseba.’”"

¹⁹“Se ke seo Jehofa Modimo wa Isiraele a se boletšego mabapi le dintlo tša motse wo le dintlo tša dikgoši tša Juda tšeo di phušolwago ka baka la merako ya thakelelo le ka baka la tšhoša;"

²⁰mabapi le bao ba tlago go lwa le Bakaladea le go tlatša mafelo ka ditopo tša batho bao ke ba bolailego ke galefile e bile ke befetšwe, le ka baka la bohle bao ke utetšego motse wo sefahlego sa ka ka baka la bobe bja bona, a re:"

²¹‘Šefa ke alafa motse wo le go o fodiša; ke tla ba fodiša le go ba utollela khutšo e kgolo le therešo."

²²Ke tla buša mathopša a Juda le mathopša a Isiraele, ka a matlafatša a ba kamoo a bego a le ka gona mathomong."

²³Ke tla a hlwekiša molatong wa ona ka moka woo a ntshenyeditšego ka wona, ka a lebalela melato ya ona ka moka yeo a ntshenyeditšego ka yona le yeo a e obilego go nna."

²⁴Motse e tla ba leina la go nthabiša, ya ba tumišo le botse ditšhabeng ka moka tša lefase tšeo di tla kwago ka botse ka moka bjo ke bo neago mathopša. Di tla tšhoga le go ferekana ka baka la botse ka moka le ka baka la khutšo ka moka tšeo ke o neago tšona.’”"

²⁵“Se ke seo Jehofa a se boletšego a re: ‘Lefelong le leo le tla rego ke lešope leo le se nago motho le seruiwa, metseng ya Juda le mekgotheng ya Jerusalema yeo e lego lešope leo le se nago motho le modudi gotee le seruiwa, go sa tlo kwewa"

²⁶mokgoši wa tlhalalo le mokgoši wa lethabo, lentšu la monyadi le lentšu la monyadiwa gotee le lentšu la bao ba rego: “Retang Jehofa wa madira, ka gobane Jehofa o lokile; botho bja gagwe ke bja go iša mehleng ya neng le neng!”’ “‘Ba tla tliša sebego sa tebogo ntlong ya Jehofa, ka gobane ke tla buša mathopša a naga a ba bjalo ka mathomong,’ go boletše Jehofa.”"

²⁷“Se ke seo Jehofa wa madira a se boletšego a re: ‘Lefelong le leo e lego lešope leo le se nago motho le seruiwa gotee le metseng ya Juda ka moka go sa tlo ba le mafulo a badiši bao ba robatšago mehlape.’"

²⁸“‘Metseng ya dithabeng, metseng ya nagatlase le metseng ya ka borwa le nageng ya Benjamini le mafelong a dikologilego Jerusalema gotee le metseng ya Juda go sa tlo feta mehlape ka tlase ga diatla tša yo a e balago,’ go boletše Jehofa.”"

²⁹“‘Tsebang gore go tla matšatši ao ka ona ke tla phethago lentšu le lebotse leo ke le boletšego mabapi le ntlo ya Isiraele le ntlo ya Juda,’ o re’alo Jehofa."

³⁰‘Matšatšing ao le nakong yeo ke tla hlogišetša Dafida lehlogedi la go loka, le tla phetha toka le toko nageng."

³¹Matšatšing ao Juda e tla phološwa gomme Jerusalema yona e tla dula ka polokego. Leina le e tla bitšwago ka lona ke Jehofa ke Toko ya Rena.’”"

³²“Se ke seo Jehofa a se boletšego a re: ‘Go Dafida go ka se hlokwe motho yo a tla dulago sedulong sa bogoši sa ntlo ya Isiraele."

³³Go baperisita, bona Balefi, go ka se hlokwe motho yo a dirago sebego se se feletšego sa go fišwa pele ga ka le go thuntšha muši wa sebego sa mabele gotee le go nea sehlabelo ka mehla.’”"

³⁴Lentšu la Jehofa la buša la tlela Jeremia, la re:"

³⁵“Se ke seo Jehofa a se boletšego: ‘Ge e ba le ka roba kgwerano ya ka le mosegare le kgwerano ya ka le bošego, e le gore letšatši le bošego di se ke tša tšwelela ka nako ya tšona,"

³⁶gona kgwerano ya ka le Dafida mohlanka wa ka e ka robja gomme a se be le morwa yo a bušago e le kgoši sedulong sa gagwe sa bogoši; gwa robja gotee le kgwerano ya ka le Balefi, bona baperisita, bahlanka ba ka."

³⁷Go etša ge makoko a legodimo a ka se ke a balwa, le lešabašaba la lewatle le ka se ke la elwa, ka mo go swanago ke tla atiša peu ya Dafida mohlanka wa ka le Balefi bao ba ntlhankelago.’”"

³⁸Lentšu la Jehofa la buša la tlela Jeremia, la re:"

³⁹“Na ga se wa kwa seo ba setšhaba se ba se boletšego, ba re: ‘Meloko e mebedi yeo Jehofa a e kgethilego, na le yona o tla e lahla’? Ba duletše go swara batho ba ka ka lenyatšo, e le gore ba se sa hlwa ba ba bona e le setšhaba."

⁴⁰“Se ke seo Jehofa a se boletšego a re: ‘Ge e ba e be e se ka taba ya gore ke ile ka dira kgwerano ya ka le mosegare le bošego, ka bea melao ya legodimo le lefase,"

⁴¹gona ke be ke tla gana peu ya Jakobo le ya Dafida mohlanka wa ka, gore ke se ke ka tšea babuši peung ya gagwe bao ba bušago peu ya Aborahama, Isaka le Jakobo. Ke tla kgoboketša mathopša a bona gomme ka a šokela.’”"

⁴²Lentšu leo le tletšego Jeremia le etšwa go Jehofa, nakong ya ge Nebukadiretsara kgoši ya Babilona le madira a gagwe ka moka le mebušo ka moka ya lefase, pušo yeo e bego e le ka tlase ga seatla sa gagwe gotee le merafo ka moka ba be ba elwa le Jerusalema le metse ka moka ya yona, le re:"

⁴³“Se ke seo Jehofa Modimo wa Isiraele a se boletšego a re: ‘Sepela, o re go Tsedekia kgoši ya Juda, ee, o re go yena: “Se ke seo Jehofa a se boletšego: ‘Šefa ke gafela motse wo seatleng sa kgoši ya Babilona gomme e tla o fiša ka mollo.”"

⁴⁴Wena o ka se phonyokge seatleng sa yona ka gobane ruri o tla swarwa wa gafelwa seatleng sa yona. O tla bolela le kgoši ya Babilona le lebane ka difahlego gomme o tla ya Babilona.’"