The New Covenant

¹Eupša yo mongwe le yo mongwe o tla hwela molato wa gagwe. Motho le ge e le ofe yo a jago diterebe tša go se butšwe, meno a gagwe a tla šia.”"

²“Tsebang gore go tla matšatši ao ka ona ke tla dirago kgwerano e mpsha le ba ntlo ya Isiraele le ba ntlo ya Juda;” o re’alo Jehofa,"

³“e sego yeo e swanago le kgwerano ye ke e dirilego le borakgolokhukhu ba bona letšatšing la ge ke be ke ba swara ka seatla ke ba ntšha nageng ya Egipita, ‘e lego kgwerano ya ka yeo ba e robilego, gaešita le ge nna ke be ke le monna wa bona,’ o re’alo Jehofa.”"

⁴“Gobane ye ke kgwerano yeo ke tla e dirago le ba ntlo ya Isiraele ka morago ga matšatši ao,” o re’alo Jehofa. “Ke tla tsenya molao wa ka ka go bona gomme ka o ngwala pelong ya bona. Ke tla ba Modimo wa bona gomme bona e tla ba setšhaba sa ka.”"

⁵“Motho a ka se hlwe a ruta mogagabo gomme yo mongwe le yo mongwe a ka se hlwe a ruta ngwanabo, a re: ‘Tsebang Jehofa!’ Ka ge ka moka ga bona ba tla be ba ntseba, go tloga ka yo monyenyane wa bona go fihla ka yo mogolo wa bona,” o re’alo Jehofa. “Gobane ke tla ba lebalela molato wa bona gomme nka se sa gopola sebe sa bona.”"

⁶Se ke seo Jehofa, Monei wa letšatši bakeng sa seetša mosegare, yo a neago melao e laolago kgwedi le dinaledi bakeng sa seetša bošego, Yena yo a huduago lewatle gore maphoto a lona a dume, Yena yo leina la gagwe e lego Jehofa wa madira, a se boletšego a re:"

⁷“‘Ge e ba ditaelo tše di ka tlošwa pele ga ka,’ o re’alo Jehofa, ‘bao e lego peu ya Isiraele le bona ka mo go swanago ba ka kgaotša go dula e le setšhaba pele ga ka.’”"

⁸Se ke seo Jehofa a se boletšego a re: “‘Ge e ba magodimo a lego godimo a ka elwa, le gona metheo ya lefase leo le lego tlase ya nyakišišwa, gona le nna nka gana peu ka moka ya Isiraele ka baka la tšohle tšeo ba di dirilego,’ o re’alo Jehofa.”"

⁹“Tsebang gore go tla matšatši ao ka ona motse o tlago go agelwa Jehofa go tloga Toreng ya Hananele go ya Kgorong ya Sekhutlong,” o re’alo Jehofa."

¹⁰“Lenti la go ela le tla lebišwa thwii mmotong wa Garebe, la dikologa go fihla Goa."

¹¹Le gona moedi ka moka wa ditoto le wa melora e nago le makhura gotee le mašemo ka moka a mebotong go fihla moeding wa mafula wa Kidirone, go fihla sekhutlong sa Kgoro ya Dipere go ya ka bohlabatšatši, e tla ba selo se sekgethwa go Jehofa. Le ka mohla se ka se tumolwe goba go phušolwa go iša mehleng ya neng le neng.”"

¹²Lentšu leo le tletšego Jeremia le etšwa go Jehofa ngwageng wa lesome wa pušo ya Tsedekia kgoši ya Juda, ke gore, ngwageng wa lesomeseswai wa pušo ya Nebukadiretsara."

¹³Ka nako yeo madira a kgoši ya Babilona a be a rakeletše Jerusalema; ge e le moporofeta Jeremia, yena o be a tswaleletšwe Lapeng la Mohlapetši leo le lego ntlong ya kgoši ya Juda;"

¹⁴ka gobane Tsedekia kgoši ya Juda o be a mo tswaleletše, a re: “Ke ka baka la’ng o porofeta, o re: ‘Se ke seo Jehofa a se boletšego: “Šefa ke gafela motse wo seatleng sa kgoši ya Babilona gomme e tla o thopa;"

¹⁵Tsedekia, kgoši ya Juda, a ka se ke a phonyokga seatleng sa Bakaladea, ka gobane ruri o tla gafelwa seatleng sa kgoši ya Babilona, o tla bolela le yona ba lebane ka difahlego”’;"

¹⁶‘e tla iša Tsedekia Babilona gomme o tla dula moo go fihlela ke mo otla,’ o re’alo Jehofa; ‘gaešita le ge le ka dulela go lwa le Bakaladea, le ka se atlege’?”"

¹⁷Jeremia a re: “Lentšu la Jehofa le ntletše, la re:"

¹⁸‘Hanamele morwa wa rangwane’ago Shalume šo o tla go wena, o re: “Ithekele tšhemo ya ka yeo e lego Anathothe, ka gobane ke wena yo a nago le tshwanelo ya go e rekolla.”’”"

¹⁹Hanamele morwa wa rangwane a tla go nna, Lapeng la Mohlapetši, go ya ka lentšu la Jehofa, a re go nna: “Hle, reka tšhemo ya ka yeo e lego Anathothe, nageng ya Benjamini, gobane o na le tshwanelo ya bohwa le tshwanelo ya go rekolla. Ithekele yona.” Nakong yeo ka tseba gore e be e le lentšu la Jehofa."

²⁰Ka gona ka reka tšhemo yeo e bego e le Anathothe go Hanamele morwa wa rangwane. Ka mo elela tšhelete, dishekele tše šupago le ditsekana tša silifera tše lesome."

²¹Ke moka ka ngwala lengwalo la bohlatse, ka le tiiša ka seka gomme ka tšea dihlatse tše pedi ge ke le gare ke ela tšhelete dikaleng."

²²Ka morago ga moo ka tšea lengwalo la bohlatse la theko, leo le tiišitšwego ka seka go ya ka molao le ditaelo, ka tšea le leo le sa tswalelwago;"

²³ke moka ka nea Baruke morwa wa Neriya morwa wa Mahaseya lengwalo la bohlatse la theko mahlong a Hanamele morwa wa rangwane le mahlong a dihlatse, tšeo di ngwadilego lengwalong la bohlatse la theko gotee le mahlong a Bajuda ka moka bao ba bego ba dutše Lapeng la Mohlapetši."

²⁴Bjale ka laela Baruke mahlong a bona, ka re:"

²⁵“Se ke seo Jehofa wa madira, Modimo wa Isiraele, a se boletšego: ‘Ka ge o tšea mangwalo a a bohlatse, e lego lengwalo le la bohlatse la theko, lona leo le tiišitšwego ka seka, le lengwalo le lengwe la bohlatse leo le sa tswalelwago, gona o a bee ka sebjaneng sa letsopa e le gore a ka swarelela matšatši a mantši.’"

²⁶Se ke seo Jehofa wa madira, Modimo wa Isiraele, a se boletšego a re: ‘Dintlo le mašemo gotee le dirapa tša merara di sa tlo rekwa nageng ye.’”"

²⁷Ka morago ga go nea Baruke morwa wa Neriya lengwalo la bohlatse la theko, ka rapela Jehofa, ka re:"

²⁸“Wena Mmuši Morena Jehofa, ke wena yo a dirilego magodimo le lefase ka matla a gago a magolo le ka letsogo la gago le le otlolotšwego. Taba ye ka moka ga se yeo e ka go palelago,"

²⁹Wena yo a bontšhago ba dikete botho, le yo a lefetšago molato wa botate dihubeng tša barwa ba bona ba ba tlago ka morago ga bona, Modimo wa therešo, Yo mogolo, Yo matla, yo leina la gagwe e lego Jehofa wa madira,"

³⁰wa morero o mogolo le wa ditiro tše di atilego, wena yo mahlo a gago a bonago ditsela ka moka tša bana ba batho, gore o nee yo mongwe le yo mongwe go ya ka ditsela tša gagwe le go ya ka dienywa tša mediro ya gagwe;"

³¹wena yo a beilego dipontšho le mehlolo nageng ya Egipita go ba go fihla mehleng ye, wa di bea le Isiraele le gare ga batho, gore o itirele leina, go etša ge go tla tloga go direga le lehono."

³²O ntšhitše batho ba gago ba Isiraele nageng ya Egipita ka dipontšho le mehlolo le ka seatla sa gago se matla le ka letsogo la gago le le otlolotšwego gotee le ka go boifiša mo gogolo."

³³“Ka morago wa ba nea naga ye yeo o enetšego borakgolokhukhu ba bona gore o tla ba nea yona, e lego naga yeo e elago maswi le dinose."

³⁴Ba tlile ba tšea naga ya ba bohwa bja bona, eupša ba se kwe lentšu la gago gomme ba se sepele molaong wa gago. Dilo ka moka tšeo o ba laetšego gore ba di dire ga se ba di dira, mo e lego gore o ile wa ba tlišetša bošula bjo ka moka."

³⁵Bonang! Batho ba tlile motseng ba o rakelela ka merako gore ba o thope, gomme ka baka la tšhoša, tlala le leuba la bolwetši, wona motse wo o tla gafelwa seatleng sa Bakaladea bao ba lwago le wona; seo o se boletšego se diragetše, šefa o a se bona."

³⁶Lega go le bjalo, Wena Mmuši Morena Jehofa, o itše go nna: ‘Ithekele tšhemo ka tšhelete gomme o tšee dihlatse,’ gaešita le ge motse wona o tla gafelwa seatleng sa Bakaladea.”"

³⁷Ke moka lentšu la Jehofa la tlela Jeremia, la re:"

³⁸“Ke nna yo, Jehofa, Modimo wa batho ka moka. Na ruri go na le taba le ge e le efe yeo e ka mpalelago?"

³⁹Ka gona se ke seo Jehofa a se boletšego: ‘Šefa ke gafela motse wo seatleng sa Bakaladea le seatleng sa Nebukadiretsara kgoši ya Babilona, gomme o tla o thopa."

⁴⁰Bakaladea bao ba lwago le motse wo ba tla tla gomme ba tšhuma motse wo ka mollo, ba tla o fiša gotee le dintlo tša bao ditlhakeng tša tšona ba bego ba thuntšhetša Baali muši wa dihlabelo le go tšhelela medimo e mengwe dibego tša dino e le gore ba nkgopiše.’"