James 2

¹Molomong o tee go tšwa tšhegofatšo le thogako. Bana bešo, ga go a swanela gore dilo di direge ka tsela ye."

²Na sediba se runya meetse a mabose le ao a galakago mothopong o swanago?"

³Bana bešo, na mogo o ka tšweletša mahlware goba morara wa tšweletša mago? Le gona meetse a letswai a ka se ke a tšweletša meetse a mabose."

⁴Ke mang yo bohlale le yo a nago le tlhaologanyo gare ga lena? Anke ka boitshwaro bja gagwe bjo bobotse a bontšhe mediro yeo e dirwago ka boleta bjo bo tšweletšwago ke bohlale."

⁵Eupša ge e ba le na le lehufa le le galakago le tshele dipelong tša lena, le se ke la ikgantšha gomme la aketša therešo."

⁶Bjo ga se bohlale bjo bo theogago bo etšwa godimo, eupša ke bja lefase, bja bophoofolo le bja botemona."

⁷Gobane moo go lego lehufa le tshele, go tla ba le tlhakatlhakano le selo se sengwe le se sengwe se sebe."

⁸Eupša bohlale bjo bo tšwago godimo, sa pelepele bo sekile, gape bo na le khutšo, bo lekalekane, bo ikemišeditše go kwa, bo tletše kgaugelo le dienywa tše botse, ga bo kgetholle e bile ga bo na boikaketši."

⁹Godimo ga moo, peu ya seenywa sa toko e bjalwa maemong a khutšo gare ga bao ba dirago khutšo."

¹⁰Dintwa le diphapano tše di lego gare ga lena di bakwa ke eng? Na ga di tšwe dikganyogong tša lena tša nama tšeo di thulanago ka gare ga lena?"

¹¹Le a kganyoga, fela ga le be le selo. Le tšwela pele le hloya e bile le duma tša ba bangwe, fela ga le kgone go hwetša selo. Le tšwela pele le fapana gomme le elwa. Ga le be le selo gobane le sa kgopele."

¹²Ge le kgopela ga le amogele selo, gobane le kgopelela morero o fošagetšego, gore se le se dirišetše dikganyogo tša lena tša nama."

¹³Lena dihlotlolo, na ga le tsebe gore go gwerana le lefase ke bonaba go Modimo? Ka gona mang le mang yo a nyakago go ba mogwera wa lefase o itira lenaba la Modimo."

¹⁴Goba na le nagana gore lengwalo le bolela se se se nago morero ge le re: “Ka baka la ge re tlwaetše go ba le mona, re na le mokgwa wa go dula re duma dilo tše di sa swanego”?"

¹⁵Lega go le bjalo, botho bjo bogolo bja Modimo bjo a bo neago ke bjo bogolo. Ka gona lengwalo le re: “Modimo o ganetša bao ba ikgogomošago, eupša ba ba ikokobeditšego o ba bontšha botho bja gagwe bjo bogolo.”"

¹⁶Ka gona ikokobeletšeng Modimo; eupša le ganetše Diabolo, yena o tla le tšhaba."

¹⁷Batamelang Modimo gomme o tla le batamela. Hlwekišang diatla tša lena, lena badiradibe, le sekiše dipelo tša lena, lena ba pelopedi."

¹⁸Hlokofalang, le nyame le be le lle. Lesego la lena a le fetoge manyami gomme lethabo la lena le fetoge manyami."

¹⁹Ikokobetšeng mahlong a Jehofa gomme o tla le godiša."

²⁰Lesang go bolelana gampe, bana bešo. Yo a bolelago ngwanabo gampe goba a ahlolago ngwanabo o ganetša molao gomme o ahlola molao. Bjale ge e ba o ahlola molao, ga o mophethi wa molao, eupša o moahlodi."

²¹Go na le o Tee yo e lego monei wa molao e bile e le moahlodi, yo a kgonago go phološa le go senya. Eupša wena o mang gore o ahlole moagišani wa gago?"

²²Tlang bjale lena ba le rego: “Lehono goba gosasa re tla tšea leeto la go ya motseng wola ra fetša ngwaga moo, ra swarega kgwebong gomme ra boelwa,”"

²³mola le sa tsebe gore bophelo bja lena bo tla ba bjang gosasa. Gobane lena le kgodi e tšwelelago ka lebakanyana ke moka ya timelela."

²⁴Go e na le moo le swanetše gore: “Ge Jehofa a rata, re tla phela gomme ra dira se goba sela.”"

²⁵Eupša bjale le ikgantšha ka go itheta ga lena ka go ipona. Go ikgantšha mo go bjalo ka moka go kgopo."

²⁶Ka gona ge e ba motho a tseba go dira seo se lokilego, fela a sa se dire, gona o dira sebe."