The Servant of the LORD

¹Ke ka baka la’ng ge ke be ke etla go be go se na motho? Ke ka baka la’ng ge ke be ke bitša go be go se yo a arabago? Na ruri seatla sa ka ke se sekopana mo se ka se kego sa lopolla goba na ga ke na matla a go hlakodiša? Bonang! Ke gopiša lewatle ka kgalemelo ya ka; ke dira dinoka lešoka. Dihlapi tša tšona di nkgišwa ke go se be gona ga meetse gomme di hwa ka baka la lenyora."

²Ke apeša magodimo ka leswiswi, ka a khurumetša ka mokotla.”"

³Mmuši Morena Jehofa o nneile leleme la ba ba rutilwego, e le gore nka tseba go araba yo a lapilego ka lentšu. O mphafoša mesong e mengwe le e mengwe; o phafoša tsebe ya ka gore e kwe go swana le bao ba rutilwego."

⁴Mmuši Morena Jehofa o thibolotše tsebe ya ka, ge e le nna ke be ke sa rabele. Ga se ka ngangabala."

⁵Ke neile baotli mokokotlo wa ka, bao ba hlothago ditedu ka ba nea marama a ka. Ga se ka uta sefahlego sa ka ge ba nthoga le ge ba ntshwela ka mare."

⁶Eupša Mmuši Morena Jehofa o tla nthuša. Ke ka baka leo nka se kego ka ikwa ke kokobeditšwe. Ke ka baka leo ke thatafišitšego sefahlego sa ka go etša legakabje, gomme ke tseba gore nka se hlabje ke dihlong."

⁷Yo a mpolelago ke lokile o kgauswi. Ke mang yo a ka mphegišago? Anke nna le yena re eme. Ke mang e lego moganetši wa ka tshekong? Anke a tle go nna."

⁸Bonang! Mmuši Morena Jehofa o tla nthuša. Ke mang yo a ka rego ke yo kgopo? Bonang! Ka moka ga bona ba tla onala go etša kobo. Ba tla jewa ke tshwele ya ba fetša."

⁹Ke mang yoo gare ga lena a boifago Jehofa, yo a theetšago lentšu la mohlanka wa gagwe, yo a sepetšego leswiswing e bile go be go se na seetša go yena? Anke a bote leina la Jehofa, a ithekge ka Modimo wa gagwe."

¹⁰“Bonang! Lena bohle bao le gotetšago mollo, bao le thuntšhago ditlhase, sepelang seetšeng sa mollo wa lena le gare ga ditlhase tšeo le di thuntšhago. Se le tla se hwetšago seatleng sa ka se se: Le tla robala le ekwa bohloko bjo bogolo."

¹¹“Ntheetšeng, lena bao le phegelelago toko, lena bao le nyakago go hwetša Jehofa. Lebelelang leswikeng leo le ntšhitšwego go lona le moleteng woo le epilwego go wona."

¹²Lebelelang go Aborahama tatago lena le go Sara yoo a le belegego ka mahloko a pelego. Aborahama o be a le noši ge ke mmitša gomme ka mo šegofatša ka ba ka mo atiša."

¹³Jehofa o tla homotša Tsione. Ruri o tla homotša mafelo ka moka a yona ao a šwalalantšwego, a dira lešoka la yona gore le etše Edene gomme leganata la yona la etša serapa sa Jehofa. Go yona go tla hwetšwa lethabo, tlhalalo, ditebogo le melodi ya dikoša."

¹⁴“Ntheetšeng lena batho ba ka; lena setšhaba sa ka, ntshekegeleng tsebe. Molao o tla tšwa go nna, ka bea kahlolo ya ka e le seetša merafong."

¹⁵Toko ya ka e batametše. Phološo ya ka e tla tla go lena, ke tla diriša matla a ka go ahlola merafo. Dihlakahlaka di tla nkholofela, tša letela letsogo la ka."

¹⁶“Emišetšang mahlo a lena magodimong gomme le lebelele lefaseng kua tlase. Magodimo a tla ngwathagana a phatlalala go etša muši, lefase la onala go etša kobo, badudi ba lona ba hwa go etša seboba. Eupša ge e le phološo ya ka e tla ba ya ka mo go sa felego gomme toko ya ka e ka se šwalalanywe."

¹⁷“Ntheetšeng, lena bao le tsebago toko, batho bao molao wa ka o lego pelong ya bona. Le se ke la boifa kgobošo ya batho ba nama le madi gomme le se ke la tšhošwa ke maroga a bona."

¹⁸Tshwele e tla ba ja ya ba fetša go etša seaparo gomme tshwele ya go ja diaparo ya ba ja ya ba fetša go etša boya. Eupša ge e le toko ya ka e tla ba ya ka mo go sa felego, gomme phološo ya ka ya fihla melokong e sa balegego.”"

¹⁹Tsoga, tsoga, o apare matla, wena letsogo la Jehofa. Tsoga go etša mehleng ya kgale, go etša melokong ya kgalekgale. Na ga se wena o pšhatlagantšego Rahaba, wena yo a hlabilego sephedi se segologolo sa ka lewatleng?"

²⁰Na ga se wena o gopišitšego lewatle, meetse a bodiba bjo bogolo? Na ga se wena o fetotšego madiba a lewatle tsela gore bao ba rekolotšwego ba tshele?"

²¹Balopollwa ba Jehofa ba tla boa ba tla Tsione ka mokgoši wa lethabo, ba tla thaba go iša mehleng ya neng le neng. Ba tla hwetša lethabo le tlhalalo. Manyami le go fegelwa di tla tšhaba."

²²“Ge e le nna ke Nna ke le homotšago. “O mang wena o tšhabago motho wa nama le madi, le go tšhaba morwa wa motho yo a tlago go dirwa gore a etše bjang feela bjo botala?"

²³O mang wena o ka lebalago Jehofa Modiri wa gago, Yena yo a phurollago magodimo le go thea motheo wa lefase, gomme ka baka leo wa dula o tšhogile letšatši ka moka ka baka la bogale bja yo a go dikaneditšego, bjalo ka ge eka o be a ikemišeditše go tlo go fediša? Bogale bja yo a go dikaneditšego bo kae?"

²⁴“Yo a kudupantšwego ka diketwane o tla tlemollwa ka bjako gore a se ke a tsena moleteng ka lehu le gore a se ke a hloka senkgwa."

²⁵“Eupša nna, Jehofa, ke Modimo wa gago, Yena yo a huduago lewatle gore maphoto a lona a dume. Jehofa wa madira ke leina la ka."

²⁶Ke tla tsenya mantšu a ka molomong wa gago, ka go apeša ka moriti wa seatla sa ka, e le gore ke hlome magodimo le go thea motheo wa lefase gomme ke re go Tsione: ‘Le batho ba ka.’"