God Will Help His People

¹Madira a legodimo ka moka a tlo bola. Magodimo a tlo menwa go etša lengwalo la go phuthwa; madira a ona ka moka a tla pona a hlohlorega, go etša ge matlakala a omilego a hlohlorega morareng le go etša lego le le ponnego le ewa mogong."

²“Tšhoša ya ka e tla tlala madi magodimong. E tla theogela godimo ga Edomo, godimo ga batho bao ba fedišitšwego ke nna go ya ka toka."

³Nna Jehofa ke na le tšhoša; e tla tlala madi; e tla kgamathela ka makhura, ka madi a dikgapana le a diphooko, ka makhura a dipshio tša dikgapa. Ka gobane Jehofa o na le sehlabelo seo a tlago go se dira kua Botsera, le polao e kgolo nageng ya Edomo."

⁴Dipoo tša naga di tla theoga le tšona gomme dipowana di tla theoga le dipoo tše matla; naga ya tšona e tla kolobišwa ka madi gomme lerole la tšona le tla tshotshoma makhura.”"

⁵Jehofa o na le letšatši la tefetšo, ngwaga wa go lefeletša go senyetšwa ga Tsione."

⁶Mafula a yona a tla fetošwa moti, gomme lerole la yona la fetoga sebabole; naga ya yona e tla ba bjalo ka moti wo o fsago."

⁷E ka se ke ya tingwa bošego le mosegare; muši wa yona o tla dula o kuelela go ya go ile. E tla omelela go tloga molokong o mongwe go ya go o mongwe; ga go yo a tlogo go feta go yona go ya go ile."

⁸E tla dulwa ke mogole le noko, maribiši le magokobu le ona a tla dula go yona; o tla otlolla lenti la go ela la lefeela gotee le maswika a tshenyego go e putla."

⁹Ga go bao ba tlago go ba dikgoši gare ga bakgomana ba yona gomme dikgošana tša yona di ka se sa ba gona."

¹⁰Meetlwa e tlo mela dintlong tša yona tša dibo, bogopa le ditshehlo tša mela mafelong a šireleditšwego; e tla ba bodulo bja diphukubje le bja dimpšhe."

¹¹Dibata tša leganateng di tla gahlana le diphoofolo tše gololago gomme motemona wa sebopego sa pudi o tla bitša mogwera wa gagwe. Ee, leubauba le tla iketla moo la ikhweletša lefelo la boikhutšo."

¹²Noga e fofelago e itiretše sehlaga moo gomme e beela mae, e bile e tla a phaphaša ya kgoboketša dinogana ka tlase ga moriti wa yona. Ee, digotšane di tla kgobokana moo, se sengwe le se sengwe le molekane wa sona."

¹³Itsomeleng pukung ya Jehofa gomme le bale ka go hlaboša. Ga go le setee seo se sego gona; se sengwe le se sengwe se na le molekane wa sona, ka gobane molomo wa Jehofa ke wona o neilego taelo, moya wa gagwe ke wona wo o di kgobokantšego."

¹⁴Ke Yena yo a di abetšego naga gomme seatla sa gagwe se di aroletše lefelo ka lenti la go ela. Di tla dula go yona go ya go ile; di tla dula moo go iša melokong le melokong."

¹⁵Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona."

¹⁶Ruri le tla khukhuša la thaba e le ka kgonthe ka lethabo le legolo le ka mokgoši wa lethabo. Le tla fiwa letago la Libanoni, lona letago la Karamele le la Sharona. Go tla ba le batho bao ba tla bonago letago la Jehofa, letago la Modimo wa rena."

¹⁷Matlafatšang diatla tše di fokolago gomme le tiiše matolo a kgwehlakgwehlago."

¹⁸Botšang bao ba dipelo tše di tshwenyegilego, le re: “Tiang matla. Le se ke la boifa. Bonang! Modimo wa lena o tla tla ka tefetšo, Modimo o tla le lefeletša. Yena o tla tla a le phološa.”"

¹⁹Mohlang woo mahlo a difofu a tla buduloga gomme ditsebe tša difoa di tla thibologa."

²⁰Mohlang woo sehlotša se tlo taboga bjalo ka kgama gomme leleme la semumu le tlo goelela ka lethabo. Lešokeng go tla phulega meetse gomme leganateng gwa phulega mafula."

²¹Naga e omišitšwego ke phišo e tla be e fetogile e etša mogobe wa mahlaka gomme naga e nyorilwego e etša methopo ya meetse. Segoleng sa diphukubje moo di khutšago gona, go tla ba le bjang bjo botala le mahlaka le dimela tša papirase."

²²Gona moo go tla ba le tsela e kgolo, yona tsela; e tla bitšwa Tsela e Kgethwa. Motho wa go se hlweke a ka se fete go yona. E tla sepelwa ke yo a sepelago ka yona, go ka se be le ba mašilo bao ba ralalago go yona."

²³Go ka se be le tau moo, dibata tše šoro di ka se sepele go yona. Di ka se hwetšwe moo; bao ba rekolotšwego ba tla sepela moo."

²⁴Bao ba lopolotšwego ke Jehofa ba tla boa ba tla Tsione ba goelela ka lethabo; ba tla thaba go iša mehleng ya neng le neng. Ba tla hwetša lethabo le tlhalalo gomme manyami le go fegelwa di tla tšhaba."