Opposition

¹Ke moka Serubabele morwa wa Shealatiele le Jeshua morwa wa Jehosadaka ba ema ba thoma go aga ntlo ya Modimo lefsa, yeo e bego e le kua Jerusalema; ba be ba na le baporofeta ba Modimo bao ba bego ba ba thuša."

²Mmuši Tatenai wa ka mošola wa Noka ya Eforate le Shethara-bosenai le badirišani ba bona ba tla go bona gomme ba ba botšiša ba re: “Ke mang yo a le laetšego gore le age ntlo ye le morako wo wa dikota?”"

³Ba buša ba re go bona: “Re botšeng maina a bannatia bao ba agago moago wo.”"

⁴Modimo o be a šeditše banna ba bagolo ba Bajuda gomme ga se ba ba tlogediša go aga go ba go fihla ge Dario a amogetše pego e bile a e arabile ka lengwalo."

⁵Lengwalo leo mmuši Tatenai wa ka mošola wa Noka ya Eforate, Shethara-bosenai, badirišani ba gagwe le babuši ba banyenyane bao ba bego ba le ka mošola wa Noka ya Eforate ba le rometšego go kgoši Dario še le;"

⁶ba mo rometše lona gomme le be le ngwadilwe ka mokgwa wo: “Khutšo a e be le wena Kgoši Dario!"

⁷Anke kgoši e tsebe gore re ile ra ya seleteng sa Juda ntlong ya Modimo yo mogolo, yona e agwa ka maswika a magolo gomme merako e agwa ka dikota; mošomo woo o dirwa ka phišego e bile o tšhaba diatla."

⁸Re ile ra botšiša banna ba ba bagolo, ra re go bona: ‘Ke mang yo a le laetšego gore le age ntlo ye le morako wo wa dikota?’"

⁹Ra ba ra ba botšiša le maina a bona gore re tle re go tsebiše gomme ra ngwala maina a bannatia bao ba ba eteletšego pele."

¹⁰“Ba ile ba re araba ka gore: ‘Re bahlanka ba Modimo wa magodimo le lefase, re aga lefsa ntlo yeo e bego e agilwe nywageng e mentši e fetilego, yeo kgoši e kgolo e ilego ya e aga ya ba ya e fetša."

¹¹Lega go le bjalo, ka ge botatago rena ba ile ba befediša Modimo wa magodimo, o ile a ba gafela seatleng sa Nebukadinetsara kgoši ya Babilona ya Mokaladea, yena a phušola ntlo ye a ba a iša batho bothopša kua Babilona."

¹²Eupša ngwageng wa pele wa pušo ya Korese kgoši ya Babilona, kgoši Korese o ile a laela gore ntlo ye ya Modimo e agwe lefsa."

¹³Le gona dibjana tša ntlo ya Modimo tša gauta le tša silifera tšeo Nebukadinetsara a di ntšhitšego tempeleng yeo e bego e le Jerusalema a di tliša tempeleng ya Babilona, kgoši Korese o ile a di ntšha tempeleng ya Babilona tša newa Sheshebatsara, yo a ilego a mo dira mmuši."

¹⁴A re go yena: “Tšea dibjana tše. Sepela o di bee tempeleng yeo e lego Jerusalema gomme ntlo ya Modimo e agwe lefsa lefelong la yona.”"

¹⁵Ge Sheshebatsara yoo a fihla o ile a thea metheo ya ntlo ya Modimo yeo e lego Jerusalema; go tloga ka nako yeo go ba go fihla bjale e agwa lefsa, eupša ga se ya fela.’"

¹⁶“Ge e ba kgoši e bona go lokile, anke go nyakišišwe ntlong ya kgoši ya matlotlo yeo e lego kua Babilona, go hwetšwe ge e ba e le therešo gore kgoši Korese o ile a laela gore ntlo ya Modimo e agwe lefsa kua Jerusalema; anke kgoši e re romele karabo ya yona mabapi le taba ye.”"

¹⁷Kgoši Dario a laela gore go dirwe nyakišišo ntlong ya dipego tša matlotlo ao a beilwego Babilona."

¹⁸Kua Ekebathana lefelong leo le šireleditšwego leo le bego le le seleteng sa Media, go ile gwa hwetšwa lengwalo la go phuthwa gomme go be go ngwadilwe pego e latelago go lona:"

¹⁹“Ngwageng wa pele wa pušo ya kgoši Korese, kgoši Korese o ile a laela mabapi le ntlo ya Modimo kua Jerusalema a re: Anke ntlo e agwe lefsa gore e be lefelo leo ba tlago go dira dihlabelo go lona gomme metheo ya lona e tiišwe, bophagamo bja yona e be dikubiti tše masometshela le bophara bja yona e be dikubiti tše masometshela,"

²⁰e agwe ka mehlatlagano e meraro ya maswika a magolo le mohlatlagano wa dikota; ditshenyegelo di lefše ka tšhelete e tšwago ntlong ya kgoši."

²¹Le dibjana tša gauta le tša silifera tša ntlo ya Modimo tšeo Nebukadinetsara a di tšerego tempeleng yeo e bego e le Jerusalema a di tliša Babilona di bušwe, e le gore di išwe lefelong la tšona tempeleng yeo e lego Jerusalema, di bewe ntlong ya Modimo."

²²“Bjale wena mmuši Tatenai wa ka mošola wa Noka ya Eforate, Shethara-bosenai le badirišani ba lena gotee le babuši ba banyenyane ba ka mošola wa Noka ya Eforate, kgaoganang le bona."

²³Le se šitiše modiro wa go agwa ga ntlo ya Modimo. Mmuši wa Bajuda le banna ba bagolo ba Bajuda ba tla aga lefsa ntlo ya Modimo lefelong la yona."

²⁴Ke le laetše seo le tlago go se dira ka banna ba ba bagolo ba Bajuda mabapi le go agwa lefsa ga ntlo ya Modimo; letlolong la ka mošate go tla ntšhwa lekgetho leo le tšwago ka mošola wa Noka ya Eforate gore go lefše ditshenyegelo tša bannatia ba, ka ntle le go dikadika."