Reforms

¹go ba Elama gwa hwetšwa Matania, Sakaria, Jehiele, Abadi, Jeremothe le Eliya;"

²go ba Sathu gwa hwetšwa Elioenai, Eliashiba, Matania, Jeremothe, Sabada le Asisa;"

³go ba Bebai gwa hwetšwa Jehohanani, Hanania, Sabai le Athalai;"

⁴go ba Bani gwa hwetšwa Meshulama, Maluka, Adaya, Jashubu, Sheale le Jeremothe;"

⁵go ba Pahathe-moaba gwa hwetšwa Adena, Kelale, Benaya, Maaseya, Matania, Betsalele, Binui le Manase;"

⁶go ba Harima gwa hwetšwa Eliesere, Isishija, Malakia, Shemaya, Shimeone,"

⁷Benjamini, Maluka le Shemaria;"

⁸go ba Hashuma gwa hwetšwa Matenai, Matata, Sabada, Elifelete, Jeremai, Manase le Shimei;"

⁹go ba Bani gwa hwetšwa Maadai, Amorama, Uele,"

¹⁰Benaya, Bedeya, Keluhi,"

¹¹Bania, Meremothe, Eliashiba,"

¹²Matania, Matenai le Jaasu;"

¹³go ba Binui gwa hwetšwa Shimei,"

¹⁴Shelemia, Nathane, Adaya,"

¹⁵Makanadibai, Shashai, Sharai,"

¹⁶Asarele, Shelemia, Shemaria,"

¹⁷Shalume, Amaria le Josefa;"

¹⁸go bana ba Nebo gwa hwetšwa Jeiele, Matitia, Sabada, Sebina, Jadai, Joele le Benaya;"

¹⁹Ba ka moka ba be ba nyalane le basadi bašele gomme ba ile ba bušetša basadi bao le bana ba bona morago."

²⁰Mantšu a Nehemia morwa wa Hakalia šea: Mo e ka bago ka kgwedi ya Kisilefe ka ngwaga wa masomepedi ke be ke le mošate wa Shushani."

²¹Yo mongwe wa bana bešo e lego Hanani o ile a tla a na le banna ba bangwe bao ba tšwago Juda, ka ba botšiša ka Bajuda bao e lego mašaledi a mathopša ao a boilego nageng, ka ba botšiša le ka Jerusalema."

²²Ba re go nna: “Mašaledi a mathopša ao a boilego nageng ao a lego kua seleteng sa Juda a bothateng bjo bogolo kudu e bile a gobošitšwe; morako wa Jerusalema o phušotšwe gomme dikgoro tša yona di fišitšwe ka mollo.”"

²³Ya re gateetee ge ke ekwa mantšu a, ka dula fase ka lla le go hlokofala ka matšatši a mantši, ka ikona dijo le go rapela Modimo wa magodimo."

²⁴Ka re: “Joo Jehofa Modimo wa magodimo, Modimo yo mogolo le yo a boifišago, yo a bolokago kgwerano le go bontšha botho go bao ba mo ratago le go bao ba bolokago ditaelo tša gagwe,"

²⁵hle anke o sekege tsebe o be o bule mahlo a gago, gore o theetše thapelo yeo nna mohlanka wa gago ke e rapelago pele ga gago lehono, mosegare le bošego, ke rapelela bana ba Isiraele mohlanka wa gago, e bile ke bobola dibe tša bana ba Isiraele tšeo re go diretšego tšona. Nna le ba ntlo ya tate re sentše."

²⁶Ruri re go senyeditše e bile ga se ra lota ditaelo, melao le dikahlolo tšeo o di laetšego ka Moshe mohlanka wa gago."

²⁷“Hle gopola lentšu leo o le laetšego Moshe mohlanka wa gago wa re: ‘Ge lena le ka se mpotegele, nna ke tla le gašanyetša ditšhabeng tše dingwe."

²⁸Eupša ge le ka boela go nna, la lota ditaelo tša ka gomme la di latela, ke tla le kgobokanya ka le tliša lefelong leo ke kgethilego gore leina la ka le dule go lona, le ge le ka gašana go fihla magomong a magodimo.’"

²⁹Bona ke bahlanka ba gago le batho ba gago, bao o ba lopolotšego ka matla a gago a magolo le ka seatla sa gago se matla."

³⁰Bjale hle Jehofa, anke o sekegele tsebe thapelo ya mohlanka wa gago le dithapelo tša bahlanka ba gago bao ba kgahlwago ke go boifa leina la gago; hle atlegiša mohlanka wa gago lehono gomme o dire gore a šokelwe ke monna yo.” Nna ke be ke le motšheladino wa kgoši."

³¹Ka kgwedi ya Nisani, ngwageng wa masomepedi wa go buša ga kgoši Arithasasitha, kgoši e be e nyaka go nwa beine gomme bjale ka mehleng ke ile ka tšea beine ka e nea kgoši. Kgoši e be e se ya ka ya mpona ke nyamile kudu ka tsela ye."

³²Kgoši ya re go nna: “O reng o nyamile mola o sa babje? Go na le seo se go tshwenyago pelong.” Ge e re’alo, ka tšhoga kudu."

³³Ke moka ka re go kgoši: “Anke kgoši e phele go iša mehleng ya neng le neng! Ke tla se nyame bjang mola motse woo borakgolokhukhu ba ka ba boloketšwego go wona o šwalalantšwe e bile dikgoro tša wona di jelwe ke mollo?”"

³⁴Kgoši ya buša ya re go nna: “Ke eng seo o nyakago go se dira?” Gateetee ka rapela Modimo wa magodimong."

³⁵Ka morago ka re go kgoši: “Ge e ba e le mo gobotse go kgoši e bile mohlanka wa gago a hweditše kgaugelo mahlong a gago, gona ntumelele ke ye Juda, motseng woo borakgolokhukhu ba rena ba boloketšwego go wona, gore ke yo o aga lefsa.”"

³⁶Ge ke re’alo kgoši ya bolela le nna mola mohumagadi wa yona a dutše hleng ga yona ya re: “Leeto la gago e tla ba le letelele gakaaka’ng, gona o tla boa neng?” Ka morago ga ge ke e boditše gore ke tla boa neng kgoši ya bona go lokile gore e ntumelele go sepela."

³⁷Ka re go kgoši: “Ge e ba go kgahla kgoši, anke ke newe mangwalo ke a iše go babuši ba ka mošola wa Noka ya Eforate gore ba tle ba ntumelele go phatša nageng ya bona ke ye Juda;"

³⁸ke newe le lengwalo le le yago go Asafa mohlapetši wa serapa sa kgoši, gore a nnee dihlare gore go agwe dikgoro tša Sebo sa tempele ka kota le gore go agwe morako wa motse le ntlo yeo ke tlago go dula go yona.” Kgoši ya nnea mangwalo ao ka ge ke be ke thekgwa ke seatla se botho sa Modimo wa ka."

³⁹Ka fihla go babuši ba ka mošola wa Noka ya Eforate ka ba nea mangwalo ao a tšwago go kgoši. Kgoši e be e nthomile le balaodi ba madira le banamedi ba dipere."

⁴⁰Ge Sanebalathi wa Mobethe-horoni le Tobia wa Moamoni yo e lego mohlanka ba ekwa ka se, ba bona e le selo se sebe kudu gore go tle motho yo a tlogo nyakela bana ba Isiraele selo se sebotse."

⁴¹Mafelelong ka fihla Jerusalema gomme ka dula moo ka matšatši a mararo."

⁴²Nna le banna ba sego kae bao ke bego ke na le bona ra tsoga bošego, go se motho yo ke bego ke mmoditše seo Modimo wa ka a bego a se beile pelong ya ka gore ke se dire kua Jerusalema gomme ke be ke se na seruiwa se sengwe ge e se feela pokolo yeo ke bego ke e nametše."

⁴³Ka tšwa bošego ka Kgoro ya Moeding yeo e bego e le ka pele ga Mothopo wa Noga e Kgolo ka leba Kgorong ya Dithotobolo tša melora, ke hlahloba merako ya Jerusalema ke sa kgaotše, ke hlahloba kamoo e phušogilego ka gona le kamoo dikgoro tša yona di jelwego ke mollo."

⁴⁴Ka fetela Kgorong ya Sedibeng le Bodibeng bja Kgoši gomme go be go se moo seruiwa seo ke bego ke se nametše se bego se ka feta gona."