Glory Returns to the Temple

¹Eupša ge e le kgošana—yona ka ge e le kgošana e tla dula go yona e le gore e je senkgwa pele ga Jehofa. E tla tsena ka tsela ya mathudi a kgoro, ya ba ya tšwa ka yona tsela yeo.”"

²Bjale a nkiša pele ga Ntlo ka tsela ya kgoro ya ka leboa e le gore ke yo bona se sengwe, gomme ka bona letago la Jehofa le tladitše ntlo ya Jehofa. Ke moka ka wa ka sefahlego."

³Ke moo Jehofa a boletšego le nna a re: “Morwa wa motho, ela hloko gomme o bone ka mahlo a gago, ka ditsebe tša gago o kwe tšohle tšeo ke go botšago tšona mabapi le ditaelo ka moka tša ntlo ya Jehofa le melao ya yona ka moka, o ele hloko mojako wa go tsena wa Ntlo le mejako ka moka ya go tšwa ya sekgethwa."

⁴O botše Borabele, ke ra ba ntlo ya Isiraele o re: ‘Se ke seo Mmuši Morena Jehofa a se boletšego: “Go lekane ka dilo tša lena ka moka tše di šišimišago, lena ba ntlo ya Isiraele,"

⁵ge le tliša batho bašele bao ba sa bollago pelong le nameng, e le gore ba tle sekgethweng sa ka ba se goboše, ba goboše ntlo ya ka; ge le neela dijo tša ka, e lego makhura le madi, mola ba roba kgwerano ya ka ka baka la dilo ka moka tša lena tše di šišimišago."

⁶Ga se la hlokomela boikarabelo bja dilo tša ka tše kgethwa, le gona le be le ka se ipeele ba bangwe gore ba hlokomele boikarabelo bja sekgethweng sa ka.”’"

⁷“‘Se ke seo Mmuši Morena Jehofa a se boletšego: “Ga go na motho o šele yo a sa bollago pelong le nameng yo a ka tlago sekgethweng sa ka, e lego motho o šele le ge e le ofe yo a lego gare ga bana ba Isiraele.”’"

⁸“‘Eupša ge e le Balefi bao ba ntahlilego ge Isiraele e be e mphuralela gomme e latela medingwana ya yona e šišimišago, bona ba tla ba ba rwala molato wa bona."

⁹E tla ba badiredi sekgethweng sa ka medirong ya go hlokomela dikgoro tša Ntlo e be e be badiredi ba Ntlong. Ke bona ba tlago go hlaba sebego se se feletšego sa go fišwa le go hlabela batho dihlabelo, e bile ke bona ba tlago go ema pele ga batho gore ba ba hlankele."

¹⁰Ka ge ba ile ba ba hlankela pele ga medingwana ya bona e šišimišago, ba ba ba fetoga tšhitišo e wetšago ba ntlo ya Isiraele molatong, ke ka baka leo ke emišitšego seatla sa ka gore ke lwe le bona,’ o re’alo Mmuši Morena Jehofa, ‘gomme ba tla rwala molato wa bona."

¹¹Ba ka se mpatamele ba ntlhankela e le baperisita goba ba batamela dilo le ge e le dife tša ka tše kgethwa le dilo tše kgethwakgethwa, eupša ba tla rwala kgobogo ya bona le ditlamorago tša dilo tše di šišimišago tšeo ba di dirilego."

¹²Ke tla ba dira bahlokomedi ba ditirelo tša Ntlong ya ka, bao ba hlokomelago ditirelo tšohle tša yona le tšohle tšeo di dirwago ka go yona.’"

¹³“‘Ge e le baperisita ba Balefi, e lego barwa ba Tsadoko, bao ba bego ba hlokomela ditirelo tša sekgethweng sa ka ge bana ba Isiraele ba be ba mphuraletše, bona ba tla tla go nna gore ba tle ba ntlhankele, ba ema pele ga ka gore ba nnee makhura le madi,’ o re’alo Mmuši Morena Jehofa."

¹⁴‘Ke bona bao ba tlago go tsena sekgethweng sa ka, e bile ke bona ba tlago go tla tafoleng ya ka gore ba ntlhankele, gomme ba tla hlokomela ditirelo tšeo ke di direlwago."

¹⁵“‘Ge ba tsena dikgorong tša lapa la ka gare ba apare diaparo tša lešela la linene, ba se ke ba apara boya ge ba hlankela dikgorong tša lapa la ka gare le ka gare."

¹⁶Ba rwale sa go rwala hlogong se se dirilwego ka lešela la linene, ba tšware marokgwana a lešela la linene. Ba se ke ba itlema ka seo se bakago kudumela."

¹⁷Ge ba eya lapeng la ka ntle, lapeng la ka ntle moo go nago le batho, ba apole diaparo tša bona tšeo ba bego ba hlankela ka tšona, ba di bee ka diphapošing tša go jela gomme ba apare diaparo tše dingwe e le gore ba se ke ba kgethagatša batho ka diaparo tša bona ba sa swanela."

¹⁸Ba se ke ba beola dihlogo, le gona moriri wa dihlogo tša bona e se be o motelele. Eupša ka mehla ba dule ba kotile dihlogo tša bona."

¹⁹Go se be le ge e le ofe wa baperisita yo a nwago beine ge a tsena ka lapeng la ka gare."

²⁰Ba se ke ba nyala mohlologadi goba mosadi yo a hladilwego, eupša ba ka nyala dikgarebe tšeo e lego bana ba ntlo ya Isiraele goba mohlologadi yo a bego a nyetšwe ke moperisita.’"

²¹“‘Ba rute batho ba ka phapano magareng ga se sekgethwa le se se gobogilego; ba ba tsebiše phapano magareng ga se se šilafetšego le se se hlwekilego."

²²Ke bona bao ba swanetšego go ema ba ahlola tshekong; ba be ba ahlole ka dikahlolo tša ka. Le gona ba swanetše go boloka melao ya ka le ditaelo tša ka tše di lego mabapi le menyanya ya dihla, ba be ba kgethagatše disabatha tša ka."

²³Moperisita a se ke a tsena mo go lego setopo sa motho e le gore a se ke a šilafala, eupša a ka itšhilafatša ka tate goba ka mma goba ka morwa goba ka morwedi goba ka ngwanabo goba ka kgaetšedi ya gagwe yeo e sego ya nyalwa."

²⁴Ka morago ga go hlwekišwa, ba mmalele matšatši a šupago."

²⁵Mohlang a tsenago lefelong le lekgethwa, ka lapeng la ka gare, gore a hlankele ka lefelong le lekgethwa, a tliše sebego sa gagwe sa sebe,’ o re’alo Mmuši Morena Jehofa."

²⁶“‘Ge e le mabapi le bohwa bja bona, ke nna bohwa bja bona. Le se ke la ba nea thoto Isiraeleng, ke nna thoto ya bona."

²⁷Ke bona ba tlago go ja sebego sa mabele, sebego sa sebe le sebego sa molato. Selo se sengwe le se sengwe se se gafilwego Isiraeleng e tla ba sa bona."