Lament for Pharaoh

¹“‘Gona moo ke moo go lego bakgomana ba ka leboa ka moka ga bona, le Basidone ka moka, bao ba theogetšego tlase ba na le bao ba bolailwego ka sehlogo ba hlabja ke dihlong, e bile ba le sehlogo ka baka la go ba ga bona ba matla. Ba tla robala ba sa bolla ba na le bao ba bolailwego ka sehlogo ka tšhoša, gomme ba tla rwala kgobogo ya bona ba na le bao ba theogelago moleteng."

²“‘Ba ke bona bao Farao a tlago go ba bona, gomme o tla homotšega ka baka la lešaba la gagwe ka moka. Farao le madira a gagwe ka moka ba tla bolawa ka sehlogo ka tšhoša,’ o re’alo Mmuši Morena Jehofa."

³“‘Ka ge a tšhošitše naga ya ba phelago, o tla robatšwa gare ga ba sa bollago, bao ba bolailwego ka sehlogo ka tšhoša, yena Farao le lešaba la gagwe ka moka,’ o re’alo Mmuši Morena Jehofa.”"

⁴Lentšu la Jehofa la tšwela pele la ntlela, la re:"

⁵“Morwa wa motho, bolela le bana ba batho ba geno o re: “‘Ge e le mabapi le naga ye, ge nka tlišetša yona le batho ba yona tšhoša, ka moka ga bona ba kgetha monna gomme ba mmea gore e be mohlapetši wa bona,"

⁶yena a bona tšhoša e tlela naga gomme a letša phalafala a lemoša batho,"

⁷ke moka gwa ba le motho yo a kwago modumo wa phalafala eupša a se ele hloko temošo yeo le gatee, gwa tla tšhoša ya mo tšea, gona madi a gagwe a tla ba godimo ga hlogo ya gagwe."

⁸O kwele modumo wa phalafala eupša a se ele hloko temošo. Madi a gagwe a tla ba godimo ga gagwe. Ge nkabe a etše hloko temošo yeo, moya wa gagwe o ka be o phologile."

⁹“‘Bjale ge e le mohlapetši yena, ge a ka bona tšhoša e etla eupša a se letše phalafala gomme batho bona ba se hwetše temošo le gatee ke moka gwa tla tšhoša ya tšea meoya ya bona, meoya yeo ya bona e tla tšewa ka baka la molato wa bona, eupša madi a bona ke tla a nyaka seatleng sa mohlapetši.’"

¹⁰“Bjale ge e le wena morwa wa motho, ke go dirile mohlapetši ntlong ya Isiraele. O kwe lentšu le ke le bolelago ka molomo wa ka gomme o ba nee temošo e tšwago go nna."

¹¹Ge ke botša yo kgopo ke re: ‘Wena motho yo kgopo o tlo hwa lehu!’ Eupša wena wa se lemoše motho yo kgopo ka go mmotša gore a tlogele tsela ya gagwe, yena ka ge e le motho yo kgopo o tla hwela molato wa gagwe, eupša madi a gagwe ke tla a nyaka seatleng sa gago."

¹²Eupša ge e le wena, ge o ka lemoša motho yo kgopo gore a furalele tsela ya gagwe eupša a se e furalele, yena o tla hwela molato wa gagwe, mola e le gore wena o tla hlakodiša moya wa gago."

¹³“Bjale ge e le wena morwa wa motho, botša ba ntlo ya Isiraele o re: ‘Ka ge le itše: “Ka baka la ge dikarogo tša rena le dibe tša rena di le godimo ga rena e bile re bola re le gare ga tšona, gona re ka tšwela pele bjang re phela?”’"

¹⁴O ba botše o re: ‘Mmuši Morena Jehofa o re: “Ke ikana ka nna yo a phelago gore ga ke kgahlwe ke lehu la yo kgopo, eupša ke kgahlwa ke gore motho yo kgopo a furalele tsela ya gagwe gomme a tšwele pele a phela. Boang, boang le tlogele ditsela tša lena tše mpe, le hwela’ng lena ba ntlo ya Isiraele?”’"

¹⁵“Ge e le wena morwa wa motho, botša bana ba batho ba geno o re: ‘Go loka ga moloki go ka se mo hlakodiše mohlang a arogago. Eupša ge e le bokgopo bja yo kgopo, bo ka se ke bja mo wiša mohlang a boago a furalela bokgopo bja gagwe. Le gona ga go na yo a lokilego yo a tlago go kgona go tšwela pele a phela ka gona go loka moo mohlang a dirago sebe."

¹⁶Ge ke botša moloki ke re: “Ruri o tla tšwela pele o phela,” gomme yena a bota go loka ga gagwe gomme a dira tša go hloka toka, gona ditiro tša gagwe ka moka tša go loka di ka se gopolwe, eupša o tla hwela ditiro tša gagwe tša go hloka toka."

¹⁷“‘Ge ke botša motho yo kgopo ke re: “O tlo hwa lehu,” gomme yena a boa a furalela sebe sa gagwe a tšwela pele a dira toka le toko,"

¹⁸gomme yena motho yoo yo kgopo a buša seswareledi seo a bego a swareletše motho ka sona, a lefelela dilo tšeo a bego a di tšere ka bohlakodi, a ba a sepela melaong ya bophelo ka go se dire tša go hloka toka, ruri o tla tšwela pele a phela. A ka se hwe."

¹⁹Ga go le setee sa dibe tša gagwe tšeo a di dirilego seo se tlago go gopolwa. O dirile toka le toko. Ruri o tla tšwela pele a phela.’"

²⁰“Ge e le bana ba batho ba geno ba itše: ‘Tsela ya Jehofa ga se ya loka,’ eupša ke tsela ya bona e sego ya loka."

²¹“Ge moloki a furalela go loka ga gagwe gomme a dira tša go hloka toka, le yena o tla hwa ka baka la tšona."

²²Ge e ba yo kgopo a furalela bokgopo bja gagwe gomme a dira toka le toko, o tla dula a phela ka baka la tšona."

²³“Lena le itše: ‘Tsela ya Jehofa ga se ya loka.’ Lena ba ntlo ya Isiraele, ke tla ahlola yo mongwe le yo mongwe wa lena go ya ka ditsela tša gagwe.”"

²⁴Mafelelong ka ngwaga wa lesomepedi, ka kgwedi ya lesome, ka letšatši la bohlano la kgwedi yeo ge re be re le bothopša, go ile gwa tla motho yo a phonyokgilego a etšwa Jerusalema, a re go nna: “Motse o phušotšwe!”"

²⁵Bjale seatla sa Jehofa se be se šetše se tlile go nna mantšiboa a pele ga ge motho yo a phonyokgilego a etla, A mpula molomo pele ga ge motho yoo a ka tla go nna mesong, ka bulega molomo gomme ka se hlwe ke le semumu."

²⁶Lentšu la Jehofa la ntlela la re:"

²⁷“Morwa wa motho, badudi ba mašope a ba bolela le ka mmu wa Isiraele gore: ‘Aborahama o be a le noši eupša a tšea naga ya ba ya gagwe. Rena re ba bantši; gona re neilwe naga gore e be ya rena.’"

²⁸“Ka gona ba botše o re: ‘Se ke seo Mmuši Morena Jehofa a se boletšego: “Le ja nama e na le madi, le emišetša mahlo a lena go medingwana ya lena e šišimišago e bile le thula madi. Ka gona naga yeo e tla ba ya lena bjang?"

²⁹Le botile tšhoša ya lena. Le dirile tše di šišimišago, e bile yo mongwe le yo mongwe wa lena o šilafaditše mosadi wa wa gabo. Ka gona naga yeo e tla ba ya lena bjang?”’"

³⁰“Wena o ba botše o re: ‘Se ke seo Mmuši Morena Jehofa a se boletšego: “Ke ikana ka nna yo a phelago gore ruri bao ba lego mašopeng ba tla wa ka tšhoša; yo a lego nageng ke tla mo gafela sebata sa mo ja; bao ba lego dibong le maweng ba tla bolawa ke leuba la bolwetši."

³¹Ke tla dira naga yeo lešope, gaešita le go e šwalalanya, matla ao e ikgantšhago ka wona a tla fela gomme dithaba tša Isiraele e tla ba lešope, gwa se hlwe go feta motho go tšona."

³²Ke moo ba tlago go tseba gore ke nna Jehofa ge ke dira naga ye lešope, gaešita le go e šwalalanya ka baka la dilo ka moka tše di šišimišago tšeo ba di dirilego.”’"