The Boiling Pot

¹O botše barwa ba Amoni o re: ‘Ekwang lentšu la Mmuši Morena Jehofa. Se ke seo Mmuši Morena Jehofa a se boletšego: “Ka ge le rile kgonee go sekgethwa sa ka gobane se gobošitšwe, ka ge le boletše bjalo ka mmu wa Isiraele gobane o dirilwe lešope, e bile le boletše bjalo le go ba ntlo ya Juda gobane ba išitšwe bothopša,"

²gona ke le gafela go Babohlabela gore ba le thope; ba tla hloma mešaša e ageleditšwego ka morako le ditaberenakele tša bona go lena. Bona ba tla ja dienywa tša lena, e bile ba tla nwa maswi a lena."

³Ke tla dira gore Raba e be mafulo a dikamela gomme metse ya barwa ba Amoni e be lefelo la boikhutšo la mohlape; ke moo le tlago go tseba gore ke nna Jehofa.”’”"

⁴“Gobane se ke seo Mmuši Morena Jehofa a se boletšego: ‘Ka ge le opile diatla, la tshelatshela ka dinao la ba la dula le thabile gomme meoya ya lena e tletše dikwero tša go kwera mmu wa Isiraele,"

⁵gona ke nna yo; ke otlolletše seatla sa ka go lena go tlo lwa le lena, ka le gafela ditšhaba gore le be dithebola; ka le kgaola gare ga merafo ka ba ka le bolaya dinageng tšeo. Ke tla le fediša gomme ke moo le tlago go tseba gore ke nna Jehofa.’"

⁶“Se ke seo Mmuši Morena Jehofa a se boletšego: ‘Ka baka la ge Moaba le Seire ba itše: “Bonang, ntlo ya Juda e itshwanela le ditšhaba tše dingwe ka moka,”"

⁷ka gona, bjale ke bula metheoga ya thaba ya Moaba metseng ya ka thoko ga mellwane ya yona, e lego metse yeo e lego mokgabišo wa naga. Metse yeo ke Bethe-jeshimothe, Baali-meone le Kiriathaima."

⁸Ke e bulela Babohlabela bao ba bapilego le barwa ba Amoni; ke tla dira gore Moaba le Amoni di thopše e le gore barwa ba Amoni ba se gopolwe ditšhabeng."

⁹Ke tla ntšha kahlolo kua Moaba; ke moo ba tlago go tseba gore ke nna Jehofa.’"

¹⁰“Se ke seo Mmuši Morena Jehofa a se boletšego: ‘Ka ge Edomo e gatile mogato ka go itefeletša go ba ntlo ya Juda, ya senya kudu ya ba ya itefeletša go bona,"

¹¹ka gona Mmuši Morena Jehofa o itše: “Ke tla buša ka otlolla seatla sa ka go lwa le Edomo gomme ka bolaya motho le seruiwa, ka e šwalalanya go tloga Themane go fihla Dedane. E tla wa ka tšhoša."

¹²‘Ke tla itefeletša go Edomo ka seatla sa batho ba ka ba Isiraele; kua Edomo ba tla dira go ya ka bogale bja ka le pefelo ya ka; ke moo ba tlago go tseba tefetšo ya ka,’ o re’alo Mmuši Morena Jehofa.”’"

¹³“Se ke seo Mmuši Morena Jehofa a se boletšego: ‘Ka ge Bafilisita ba gatile mogato ka go itefeletša, ba itefeletša ka tefetšo ba na le dikwero meoyeng ya bona, e le gore ba senye ka bonaba bja bona bja neng le neng,"

¹⁴ka gona Mmuši Morena Jehofa o itše: “Bjale ke otlolla seatla sa ka go lwa le Bafilisita gomme ke tla kgaola Bakereta ka bolaya bohle ba lebopong la lewatle."

¹⁵Ke tla itefeletša o šoro go bona ka go ba kgalema ke befetšwe; ke moo ba tlago go tseba gore ke nna Jehofa ge ke itefeletša go bona.”’”"

¹⁶Ka ngwaga wa lesometee, ka letšatši la pele la kgwedi, lentšu la Jehofa la ntlela la re:"

¹⁷“Morwa wa motho, ka ge Tiro e boletše ka Jerusalema ya re: ‘Kgonee! E robakilwe, yona e lego mojako wa merafo! Maemo a ka a ditaba a tla fetoga. Ke tla huma—yona e šwalalantšwe,’"

¹⁸ka gona se ke seo Mmuši Morena Jehofa a se boletšego: ‘Bjale ke lwa le wena, wena Tiro, gomme ke tla tliša ditšhaba tše dintši gore di lwe le wena, go etša ge lewatle le tliša maphoto a lona."

¹⁹Ba tla senya merako ya Tiro ba ba ba phušola ditora tša yona; ke tla phumola lerole la yona mo go yona gomme ka e dira leswika le le phadimago leo le se nago selo ka godimo."

²⁰E tla ba boanegelo bja malokwa gare ga lewatle.’ “‘Gobane nna ke boletše,’ o re’alo Mmuši Morena Jehofa, ‘gore e tla hulwa ke ditšhaba."

²¹Metse ya yona yeo e e dikologilego yeo e lego nageng—e tla bolawa ka tšhoša gomme ke moo batho ba tlago go tseba gore ke nna Jehofa.’"

²²“Gobane se ke seo Mmuši Morena Jehofa a se boletšego: ‘Tiro ke e tlišetša Nebukadiretsara kgoši ya Babilona yeo e tšwago ka leboa, kgoši ya dikgoši, e tla ka dipere, dikoloi tša ntwa, mašole a go namela dipere le madira, gaešita le mašabašaba a batho."

²³Metse ya gago yeo e go dikologilego yeo e lego nageng e tla e bolaya ka tšhoša, e tla go agela morako wa go go rakelela, le legora la go go rakelela ya ba ya go emišetša kotse e kgolo;"

²⁴e tla kgereša merako ya gago ka dithubamerako gomme ya phušola ditora tša gago ka ditšhoša tša yona."

²⁵Ka baka la dipere tša yona tše dintši tšeo di katago, o tla khupetšwa ke lerole. Ka baka la modumo wa mašole a go namela dipere, wa maotwana le wa dikoloi tša ntwa, merako ya gago e tla šišinyega ge kgoši yeo e tsena dikgorong tša gago, go etša ge go tsenwa motseng wo o phutšwego mašoba."

²⁶E tla gatakela mekgotha ya gago ka moka ka ditlhako tša dipere tša yona. E tla bolaya batho ba gago ka tšhoša, le dikokwane tša gago tše di tiilego di tla wela fase."

²⁷Ba tla hula matlotlo a gago, dithoto tša gago tše di rekišwago ba di dira dithebola, ba phušola merako ya gago, ba wiša dintlo tša gago tše di kgahlišago. Maswika a gago, dikota tša gago tše di betlilwego le lerole la gago, ba tla di lahlela ka meetseng.’"