The Altar of Incense

¹O e direle le mekgoko e mebedi ya gauta. O e dire ka tlasana ga morumo wa yona, e be ka mahlakoreng a mabedi a yona a go lebana, gore e tle e be ya go tsenya dikota tša go e rwala."

²O dire dikota tšeo ka moduhlare gomme o di manege ka gauta."

³O bee aletare yeo pele ga seširo seo se lego kgauswi ga areka yeo e nago le diphaphathi tša bohlatse, pele ga sekhurumelo seo se khurumeditšego Bohlatse, moo ke tlago go iponagatša go wena."

⁴“Arone a thuntšhetše diorelo tša go nkga bose mo go yona. A di thuntšhe mesong e mengwe le e mengwe ge a lokiša mabone."

⁵Ge Arone a gotetša mabone ao mantšiboa pele leswiswi le swara, a thuntšhe seorelo. Ke seorelo sa ka mehla pele ga ka, nna Jehofa melokong ka moka ya lena."

⁶Le se ke la thuntšhetša seorelo se se sa dumelelwago ka molao le ge e le go fiša sebego sa go fišwa goba sebego sa mabele go yona; le se ke la tšhela sebego sa dino go yona."

⁷Arone a dire poelano manakeng a yona gatee ka ngwaga. Ka a mangwe a madi a sebego sa sebe sa poelano a e direle poelano gatee ka ngwaga go iša melokong le melokong. Yona ke e kgethwakgethwa go nna Jehofa.”"

⁸Jehofa a iša pele a bolela le Moshe a re:"

⁹“Neng le neng ge o bala bana ba Isiraele, yo mongwe le yo mongwe wa bona a nee nna Jehofa topollo ya go lopolla moya wa gagwe ge o ba bala, gore go se be le kotlo yeo e ba welago ge o dira seo."

¹⁰Mang le mang yo a balwago o tla nea se: seripagare sa shekele go ya ka mokgwa wa go ela boima bja tšhelete wa lefelong le lekgethwa. Digera tše masomepedi di lekane le shekele. Seripagare sa shekele e be moneelo o neelwago nna Jehofa."

¹¹Yo mongwe le yo mongwe wa bao ba balwago, go tloga ka wa nywaga e masomepedi go ya godimo, a ntšhetše nna Jehofa moneelo."

¹²Bahumi ba se ke ba ntšha mo gontši gomme badiidi ba se ke ba ntšha wa ka tlase ga seripagare sa shekele, e le gore le ntšhetše nna Jehofa moneelo gore le direle meoya ya lena poelano."

¹³O tšee tšhelete ya silifera ya poelano go bana ba Isiraele o e neele bakeng sa tirelo ya tente ya kopano, gore nna Jehofa ke gopole bana ba Isiraele, e le gore le direle meoya ya lena poelano.”"

¹⁴Jehofa a tšwela pele a bolela le Moshe a re:"

¹⁵“O tšee koporo o dire sebjana sa go hlapela le sebeo sa sona, o se bee magareng ga tente ya kopano le aletare gomme o tšhele meetse ka go sona."

¹⁶Arone le barwa ba gagwe ba hlapele diatla tša bona le dinao tša bona ka go sona."

¹⁷Ge ba tsena ka tenteng ya kopano ba hlape ka meetse gore ba se hwe; ba hlape le ge ba batamela aletare go yo hlankela ka go direla nna Jehofa sebego sa go fišwa ka mollo."

¹⁸Ba hlape diatla tša bona le dinao tša bona gore ba se hwe, seo e be molao wa bona go iša mehleng ya neng le neng, e be molao o šomago go yena le go bana ba gagwe go iša melokong le melokong.”"

¹⁹Jehofa a iša pele a bolela le Moshe a re:"

²⁰“Ge e le wena o itšeele dinkgišabose tše di latelago tše di nkgago bose kudu: marothi a themilego a mira, e be boima bja dishekele tše makgolohlano, sinamone ya go nkga bose ya boima bja seripagare sa tekanyo ya mira, e lego boima bja dishekele tše makgolopedi-masomehlano (250), o tšee le semela sa go nkga bose seo se bitšwago kalamo, e be boima bja dishekele tše makgolopedi-masomehlano (250),"

²¹le kasia ya boima bja dishekele tše makgolohlano go ya ka mokgwa wa go ela boima bja tšhelete wa lefelong le lekgethwa gotee le dilithara tše tharo le seripa tša makhura a mohlware."

²²Ka tšona dinkgišabose tšeo o dire makhura a makgethwa a go tlotša motho ge a kgethwa, e be setlolo, se dirwe ka mokgwa woo modiri wa ditlolo a di tswakago ka gona. E be makhura a makgethwa a go tlotša motho ge a kgethwa."

²³“Ka ona o tlotše tente ya kopano le areka yeo e nago le diphaphathi tša bohlatse,"

²⁴o tlotše le tafola le dibjana tša yona ka moka, sehlomapone le didirišwa tša yona gotee le aletare ya diorelo,"

²⁵le aletare ya dibego tša go fišwa le dibjana tša yona ka moka gotee le sebjana sa go hlapela le sebeo sa sona."

²⁶O di kgethagatše gore e be tše kgethwakgethwa. Di kgwathwe feela ke motho yo mokgethwa."

²⁷O tlotše Arone le barwa ba gagwe, o ba kgethagatše gore e be baperisita ba ka."

²⁸“O bolele le bana ba Isiraele o re: ‘Mo go nna makhura a e tla ba makhura a makgethwa a go tlotša motho ge a kgethwa melokong ya lena ka moka."

²⁹A se ke a tlotšwa letlalong la batho, e bile le se ke la diriša metswako ya ona go dira a go swana le ona. Ke selo se sekgethwa. A dule e le selo se sekgethwa go lena."

³⁰Motho le ge e le mang yo a dirago setlolo sa go swana le ona le yo a tlotšago motho o šele ka sona, a bolawe.’”"

³¹Jehofa a iša pele a re go Moshe: “O itšeele dinkgišabose tše di latelago: setlolo se se bitšwago setakite, senkgišabose se se bitšwago onika, se se bitšwago galebanume le seorelo se se sekilego sa go nkga bose. Ka moka ga tšona di lekane."

³²O dire seorelo ka tšona, sona e be motswako wa dinoko, se dirwe ka mokgwa woo modiri wa ditlolo a di tswakago ka gona, e be seo se nago le letswai, se se sekilego le se sekgethwa."

³³O šile se sengwe sa sona e be lerojana le lesesane gomme o bee se sengwe sa sona pele ga areka e nago le diphaphathi tša bohlatse yeo e lego ka tenteng ya kopano, e lego moo ke tlago go iponagatša go wena. E be selo se sekgethwakgethwa go lena."

³⁴Seorelo seo o tlago go se dira ka motswako wo, le se ke la itirela sona. O dule o se tšea e le selo se sekgethwa go nna Jehofa."

³⁵Mang le mang yo a dirago se se swanago le sona ka morero wa go ipshina ka monkgo wa sona, a bolawe.”"

³⁶Jehofa a iša pele a bolela le Moshe a re:"

³⁷“Tseba gore ke kgethile Betsalele morwa wa Uri, e lego morwa wa Huru, wa moloko wa Juda."

³⁸Ke tla mo tlatša ka moya wa ka, gore a be le bohlale, kwešišo, tsebo le bokgoni bja mošomo o mongwe le o mongwe wa diatla,"