Plagues: Locusts and Darkness

¹le gore o bolele le barwa ba gago le bana ba bana ba gago ba hlwaile tsebe, o ba botše kamoo ke otlilego Egipita o šoro le ka dipontšho tšeo ke di dirilego gare ga bona; le tla tseba gore ke nna Jehofa.”"

²Ka gona Moshe le Arone ba tsena moo Farao a lego gona gomme ba bolela le yena ba re: “Se ke seo Jehofa Modimo wa Baheberu a se boletšego: ‘O tla gana go ikokobeletša nna go fihla neng? Lesa setšhaba sa ka se tloge se tle se ntlhankele."

³Gobane ge e ba o tšwela pele o gana go lesa setšhaba sa ka gore se tloge, gona gosasa ke tliša ditšie mo nageng ya gago."

⁴Di tla tlala naga gomme mmu wa se sa bonala; di tla ja tšohle tše di šetšego tša di fetša, tšeo le di šadišeditšwego ke sefako, gomme di tla ja sehlare se sengwe le se sengwe sa lena seo se hlogago nageng."

⁵Dintlo tša gago le dintlo tša bahlanka ba gago ka moka gotee le dintlo ka moka tša Egipita di tla tlala ka mokgwa woo botatago lena le botatago tatago lena ba sa kago ba o bona go tloga mohlang ba eba gona lefaseng go fihla lehono le.’” Ke moka a tšwa a tloga go Farao."

⁶Ka morago ga moo bahlanka ba Farao ba re go yena: “Monna yo e tla ba molaba go rena go fihlela neng? Lesa batho ba ba tloge gore ba yo hlankela Jehofa Modimo wa bona. A ga o bone gore Egipita e šetše e senyegile?”"

⁷Ka gona Moshe le Arone ba bušetšwa go Farao gomme a bolela le bona a re: “Sepelang le yo hlankela Jehofa Modimo wa lena. Ge e le gabotse ke bomang bao ba sepelago?”"

⁸Ke moka Moshe a re: “Re tla sepela le bana ba rena le batho ba bagolo. Ra sepela le barwa ba rena le barwedi ba rena, dinku tša rena le dikgomo tša rena, ka gobane re nyaka go yo direla Jehofa monyanya.”"

⁹Ke moka yena a re go bona: “A go be bjalo, anke Jehofa a be le lena ge ke le lesa gore le tloge, lena le bana ba lena! Ge e le gabotse ke a bona gore le na le maikemišetšo a mabe."

¹⁰Aowa! Hle a go sepeleng lena le lego bannatia gomme le yo hlankela Jehofa, ka gobane ke sona se le se kgopelago.” Ka go re’alo ba rakwa pele ga Farao."

¹¹Bjale Jehofa a bolela le Moshe a re: “Otlollela seatla sa gago nageng ya Egipita gore ditšie di rotoge di tle nageng ya Egipita di je dimela ka moka tša naga, di je se sengwe le se sengwe seo se šadišitšwego ke sefako.”"

¹²Gateetee Moshe a emišetša lepara la gagwe nageng ya Egipita gomme Jehofa a dira gore go tšutle phefo ya bohlabela mo nageng mosegare woo ka moka le bošego ka moka. Ge go esa phefo ya bohlabela e be e tlišitše ditšie."

¹³Ditšie tšeo tša rotogela nageng ka moka ya Egipita gomme tša dula moo. Tšona tša baka bothata bjo bogolo. Pele ga moo go be go se gwa ka gwa tšwelela ditšie tše dintši ka mokgwa wo, e bile ka morago ga tšona go ka se tsoge go tšweletše tše dintši ka mokgwa wo."

¹⁴Tša tlala naga ka moka gomme naga ya swifala; tša ja dimela ka moka tša naga le dienywa ka moka tša dihlare tšeo di bego di šadišitšwe ke sefako; gwa se šale le ge e le botalanyana dihlareng goba dimeleng tša naga ka moka ya Egipita."

¹⁵Ka gona, kapejana Farao a bitša Moshe le Arone, a re: “Ke diretše lena le Jehofa Modimo wa lena sebe."

¹⁶Bjale anke le ntshwareleng sebe sa ka gatee feela e be moka gomme le lopeng Jehofa Modimo wa lena gore kotlo ye e bolayago a e tloše mo go nna.”"

¹⁷Ka gona a tšwa a tloga go Farao a yo lopa Jehofa."

¹⁸Ke moka Jehofa a tliša phefo e matla kudu ya bodikela, ya tloša ditšie tšeo ya di fokela ka Lewatleng le Lehwibidu. Gwa se šale le tšie le e tee nageng ka moka ya Egipita."

¹⁹Eupša Jehofa a lesa pelo ya Farao ya thatafala, gomme a se lese bana ba Isiraele gore ba tloge."

²⁰Ke moka Jehofa a re go Moshe: “Otlollela seatla godimo gore leswiswi le aparele naga ya Egipita, e be leswiswi leo le ka phopholwago.”"

²¹Gateetee Moshe a otlollela seatla sa gagwe godimo, gomme leswiswi le leso la aparela naga ka moka ya Egipita matšatši a mararo."

²²Baegipita ba se kgone go bonana, gomme ga go le o tee wa bona yo a ilego a tloga legaeng la gagwe ka matšatši a mararo; eupša gohle moo bana ba Isiraele ba bego ba dula gona go be go na le seetša."

²³Ka morago ga moo Farao a bitša Moshe, a re: “Sepelang le yo hlankela Jehofa. Go tla šala feela dinku tša lena le dikgomo tša lena. Bana ba lena le bona ba ka sepela le lena.”"

²⁴Eupša Moshe a re: “Wena re fe le diruiwa tša rena ka diatleng gore re tle re neele Jehofa Modimo wa rena dihlabelo le dibego tša go fišwa."

²⁵Re tla tloga le diruiwa tša rena. Ga go le setee sa diruiwa tše se se tlago go šala mo, ka gobane mo go tšona re tla tšea tšeo re tlago go di dirišetša borapedi bja rena go Jehofa Modimo wa rena, e bile rena ga re tsebe seo re tlago go se neela Jehofa e le sehlabelo go fihlela ge re goroga moo.”"

²⁶Ke moka Jehofa a lesa pelo ya Farao ya thatafala, gomme a se dumele go ba lesa ba tloga."

²⁷Ka gona Farao a bolela le yena a re: “Tloga mo go nna! O itote! O se ke wa leka go bona sefahlego sa ka gape, gobane mohlang o bona sefahlego sa ka o tla hwa.”"

²⁸Ge a re’alo Moshe a araba a re: “A go direge kamoo o boletšego ka gona. Le ka mohla nka se leke go bona sefahlego sa gago gape.”"

²⁹Jehofa a bolela le Moshe a re: “Ke tlo tlišetša Farao le Egipita kotlo ya mafelelo. Ka morago ga moo o tla le lesa la tloga mo. Nakong ya ge a le lesa gore le tloge le tšohle, o tlo dira bjalo ka go le raka mo."