Decree for the Jews

¹e lego barwa ba lesome ba Hamani morwa wa Hamedatha, yena yo a bego a hloile Bajuda, ba ile ba ba bolaya; eupša ba se iše diatla ditheboleng tša bona."

²Letšatšing leo palo ya bao ba bolailwego Shushani, e lego mošate, e ile ya tsebišwa kgoši."

³Kgoši ya botša mohumagadi Esitere ya re: “Kua Shushani, e lego mošate, Bajuda ba bolaile batho, gomme go fedišitšwe banna ba makgolohlano le barwa ba lesome ba Hamani. Ge ba dirile seo, gona go thwe’ng ka dilete ka moka tša kgoši? Wena o kgopela eng? Anke o newe seo o se kgopelago. Ka godimo ga moo, kgopelo ya gago ke efe? Anke go dirwe seo o se kgopelago.”"

⁴Ka gona Esitere a re: “Ge e ba wena kgoši o bona seo ke se kgopelago e le se sebotse, gona anke gosasa Bajuda ba ba lego Shushani le bona ba dumelelwe go dira seo molao wa lehono o se boletšego; anke barwa ba lesome ba Hamani ba fegwe koteng.”"

⁵Kgoši ya re go dirwe ka tsela yeo. Ke moka gwa ntšhwa molao Shushani gomme barwa ba lesome ba Hamani ba fegwa."

⁶Bajuda bao ba bego ba le Shushani le bona ba ile ba kgobokana letšatšing la lesomenne la kgwedi ya Adara, ba bolaya banna ba makgolotharo moo Shushani; eupša ba se iše diatla ditheboleng tša bona."

⁷Ge e le Bajuda ka moka bao ba bego ba le dileteng tša kgoši ba ile ba kgobokana, ba lwela go phološa meoya ya bona, le gona ba itefeletša go manaba a bona ba ba ba bolaya ba dikete tše masomešupa (70 000) ba bao ba ba hloilego; eupša ba se iše diatla ditheboleng tša bona."

⁸Seo ba se dirile letšatšing la lesometharo la kgwedi ya Adara; ke moka ka letšatši la lesomenne la yona gwa khutšwa, letšatši leo ya ba la monyanya le la lethabo."

⁹Ge e le Bajuda bao ba bego ba le Shushani, ba ile ba kgobokana letšatšing la lesometharo la kgwedi yeo le ka la lesomenne la yona gomme ba khutša letšatšing la lesomehlano la yona, ya ba letšatši la monyanya le la lethabo."

¹⁰Ke ka baka leo Bajuda bao ba bego ba dula dinagamagaeng, e lego bao ba bego ba dula metsaneng ya ka ntle ga mošate, ba bego ba dira letšatši la lesomenne la kgwedi ya Adara gore e be la lethabo le la monyanya gotee le la go fana dimpho."

¹¹Morodekai a ngwala dilo tše ke moka a romela mangwalo go Bajuda ka moka bao ba bego ba le dileteng tša Kgoši Ahasiwerosi, ba kgole le kgauswi,"

¹²a ba laela gore ka mehla ba gopole letšatši la lesomenne la kgwedi ya Adara le letšatši la lesomehlano la kgwedi yeo ngwaga le ngwaga,"

¹³gore ba dire seo matšatšing a ka morago ga ge Bajuda ba se sa tshwenywa ke manaba a bona le ka morago ga kgwedi yeo e ilego ya se sa ba ya manyami eupša ya ba ya lethabo, ya se sa ba letšatši la go lla eupša ya ba la lethabo; matšatši ao ya ba a monyanya, a lethabo le a go fana dimpho le go hlallela badiidi."

¹⁴Bajuda ba ile ba amogela monyanya woo ka ge ba be ba šetše ba thomile go o dira, ba amogela le tšeo Morodekai a bego a ba ngwaletše tšona."

¹⁵Gobane Hamani morwa wa Hamedatha wa Moagaga, yena yo a bego a hloile Bajuda ka moka, o be a logetše Bajuda maanomabe a gore ba fedišwe, e bile a dirile gore go lahlelwe Puri, e lego Letengwa, gore ba ferekanywe ba be ba fedišwe."

¹⁶Eupša eitše ge Esitere a tlile pele ga kgoši, yona ya ntšha taelo ka lengwalo ya re: “Anke maanomabe a gagwe ao a a logetšego Bajuda a boele hlogong ya gagwe”; ke moka ba fega yena le barwa ba gagwe koteng."

¹⁷Ke ka baka leo ba ilego ba bitša matšatši ao ba re ke Purimi, ba a reela ka leina la letengwa le le bitšwago Puri. Ka baka la mantšu ka moka a lengwalo le, le seo ba se bonego tabeng ye le tšeo di ba diragaletšego,"