Defeat of Og; Moses' Plea

¹Ye ka moka e be e le metse e ageleditšwego ka merako e phagamego, mejako le mapheko, re sa bale metse e mengwe e mentši kudu yeo e se nago merako."

²Fela re ile ra e fediša ka mokgwa woo re ilego ra dira Sihoni kgoši ya Heshibone ka gona, ka go fediša motse o mongwe le o mongwe, banna, basadi le bana."

³Re ile ra hula diruiwa ka moka gomme ra itšeela dithebola tša metse yeo."

⁴“Ka nako yeo ra tšea naga seatleng sa dikgoši tšeo tše pedi tša Baamore tšeo di bego di le seleteng sa Noka ya Jorodane, go tloga ka moedi wa mafula wa Arinoni go fihla ka Thaba ya Heremone;"

⁵(Basidone ba be ba bitša Heremone ba re ke Sirione gomme Baamore ba e bitša Senire,)"

⁶ra tšea metse ka moka yeo e lego molaleng le Gileada ka moka gotee le Bashani ka moka go fihla Salika le Edirei, e lego metse ya mmušo wa Ogo kua Bashani."

⁷Ka gobane go Barefai go be go šetše Ogo kgoši ya Bashani a nnoši. Leako la gagwe la poloko e be e le la tšhipi. Na lona ga le kua Raba ya bana ba Amoni? Botelele bja lona ke dikubiti tše senyane gomme bophara bja lona ke dikubiti tše nne ge le elwa ka moelo o tlwaelegilego wa kubiti."

⁸Ka nako yeo ra tšea naga ye ya ba ya rena; go tloga ka Aroere yeo e lego kgauswi le moedi wa mafula wa Arinoni le seripa sa dithaba tša Gileada gomme metse ya yona ka e nea Barubeni le Bagada."

⁹Ka nea seripa sa moloko wa Manase karolo e šetšego ya Gileada le ya Bashani ka moka ya mmušo wa Ogo. Na selete sa Arigobo sa Bashani ka moka ga se bitšwe naga ya Barefai?"

¹⁰“Jairi morwa wa Manase o tšere selete ka moka sa Arigobo go fihla ka mollwane wa Bageshuri le Bamaakati, ke moka a bitša metsana yeo ya Bashani ka leina la gagwe a re ke Hafothe-jairi, gomme e sa bitšwa bjalo go fihlela le lehono."

¹¹Gileada ke e neile Makiri."

¹²Barubeni le Bagada ka ba nea go tloga ka Gileada go ya moeding wa mafula wa Arinoni, mo bogareng bja moedi wa mafula e le mollwane, le go fihla ka Jaboko, e lego moedi wa mafula wo e lego mollwane wa bana ba Amoni;"

¹³ka ba nea le Araba le tikologo ya Noka ya Jorodane le mollwane wa gona, go tloga Khinerethe go fihla lewatleng leo le lego Araba, Lewatle la Letswai, metheogeng ya Pisiga ka thoko ya bohlabatšatši."

¹⁴“Ka nako yeo ka le laela ka re: ‘Jehofa Modimo wa lena o le neile naga ye gore le e tšee e be ya lena. Lena bagale ka moka le tla fetela ka kua le itlhamile le etile bana babo lena pele, e lego bana ba Isiraele."

¹⁵Metseng ya lena yeo ke le neilego yona go tla dula feela basadi ba lena le bana ba lena gotee le diruiwa tša lena (ke tseba gabotse gore le na le diruiwa tše ntši kudu),"

¹⁶go fihlela Jehofa a khutšiša bana babo lena le lena, le go fihlela ba dutše nageng yeo Jehofa Modimo wa lena a ba neago yona ka mošola wa Noka ya Jorodane; ka morago ga moo le boe, yo mongwe le yo mongwe a boele nageng yeo ke le neilego yona.’"

¹⁷“Ka nako yeo ka laela Joshua ka re: ‘Mahlo a gago a bone tšohle tšeo Jehofa Modimo wa lena a di dirilego dikgoši tše tše pedi. Jehofa o tla dira se se swanago go mebušo ka moka yeo o tlago go feta go yona."

¹⁸Le se ke la e boifa ka gobane Jehofa Modimo wa lena ke Yena a le lwelago.’"

¹⁹“Ka nako yeo ka kgopela kgaugelo go Jehofa, ka re:"

²⁰‘Wena Mmuši Morena Jehofa, o dirile gore nna mohlanka wa gago ke thome go bona bogolo bja gago le letsogo la gago le matla, gobane ke modimo ofe magodimong goba lefaseng yo a dirago ditiro tše etšago tša gago le mediro e matla e swanago le ya gago?"

²¹Hle ntumelele ke fete ke yo bona naga e botse yeo e lego ka mošola wa Noka ya Jorodane, dithabeng tše tše botse gotee le Libanoni.’"

²²Jehofa a nkgalefela o šoro ka baka la lena gomme a se ke a ntheetša; eupša Jehofa a re go nna: ‘Go lekane ka wena! O se sa hlwa o bolela le nna gape ka taba ye."

²³Namela ka godimo ga thaba ya Pisiga o lahlele mahlo a gago ka thoko ya bodikela, ya leboa, ya borwa gotee le ya bohlabela gomme o iponele ka mahlo a gago ka gobane o ka se tshele Noka ye ya Jorodane."

²⁴Roma Joshua, o mo kgothatše o be o mo matlafatše, ka gobane ke yena a tlago go eta setšhaba se pele go tshelela ka mošola, le gona ke yena a tlago go dira gore se tšee naga yeo o tlago go e bona gore e be bohwa bja sona.’"

²⁵Nakong ye ka moka re be re dula moeding wo o lego ka pele ga Bethe-peoro."

²⁶“Bjale lena Baisiraele, theetšang ditaelo le dikahlolo tšeo ke le rutago gore le di phethe, e le gore le phele le gore le tsene le dule nageng yeo Jehofa Modimo wa borakgolokhukhu ba lena a le neago yona."

²⁷Le se ke la oketša lentšung leo ke le laelago lona goba la fokotša go lona, e le gore le lote ditaelo tša Jehofa Modimo wa lena tšeo ke le laelago tšona."

²⁸“Mahlo a lena a bone seo Jehofa a se dirilego tabeng ya modimo wa Baali wa Peoro, ge Jehofa Modimo wa lena a fediša mo gare ga lena yo mongwe le yo mongwe yo a bego a latela Baali wa Peoro."

²⁹Eupša lena bao le kgomaretšego Jehofa Modimo wa lena, ka moka ga lena le a phela lehono."