Miscellaneous Laws

¹“Ge barwa ba motho ba dula gotee gomme yo mongwe wa bona a hwa a se na morwa, gona mosadi wa mohu a se tšewe ke monna yo mongwe o šele. Ngwanabo mohu a ye go yena a mo tšee e be mosadi wa gagwe, a mo nyale."

²Tatago leitšibulo leo mosadi yoo a tlago go le belega a le reele leina la ngwanabo yo a hwilego, e le gore leina la yoo ngwanabo le se ke la hwelela mo go Isiraele."

³“Bjale ge e ba monna yoo a sa nyake go nyala mosadi wa ngwanabo, gona mosadi yoo a rotogele kgorong go banna ba bagolo a re go bona: ‘Ngwanabo monna wa ka o ganne go tsoša leina la ngwanabo mo go Isiraele. Ga se a dumela go nnyala, nna mosadi wa ngwanabo.’"

⁴Gona banna ba bagolo ba motseng wa gabo ba mmitše ba bolele le yena, gomme a eme a re: ‘Ga ke nyake go tšea mosadi yo.’"

⁵Ka morago mosadi wa ngwanabo yo a hwilego a mmatamele pele ga mahlo a banna ba bagolo a mo role ramphašane, a mo tshwele ka mare sefahlegong ke moka a re: ‘Ke kamoo monna yo a ganago go tsoša lapa la ngwanabo a dirwago ka gona.’"

⁶Mo go Isiraele ntlo ya gagwe e bitšwe ka gore: ‘Ntlo ya yo a rotšwego ramphašane.’"

⁷“Ge monna a ka re a elwa le yo mongwe gomme mosadi wa yo a fenywago a tla go hlakodiša monna wa gagwe go yoo a mo itiago, ke moka a otlolla seatla sa gagwe a swara monna yoo yo mongwe ka ditho tša bong,"

⁸gona o mo kgaole seatla. Leihlo la gago le se ke la mo kwela bohloko."

⁹“Ka mokotleng wa gago o se ke wa ba le mehuta e mebedi ya dikala, se segolo le se senyenyane."

¹⁰Ka ntlong ya gago o se be le mehuta e mebedi ya diroto, se segolo le se senyenyane."

¹¹O be le keloboima e nepagetšego le e lokilego. O be le seroto sa tekanyo e nepagetšego le e lokilego, e le gore o atelwe ke matšatši nageng yeo Jehofa Modimo wa gago a go neago yona."

¹²Gobane yo mongwe le yo mongwe yo a dirago dilo tše, mang le mang yo a dirago tša go hloka toka, ke selo se se šišimišago go Jehofa Modimo wa gago."

¹³“Le gopole seo Baamaleke ba le dirilego sona tseleng ya ge le be le etšwa Egipita,"

¹⁴kamoo ba ilego ba gahlana le lena tseleng gomme ba bolaya bao ba bego ba ikgoga ba le šetše morago, mola le be le lapile e bile le fedile matla. Ba be ba sa boife Modimo."

¹⁵E re ge Jehofa Modimo wa gago a go khutšišitše manabeng a gago ka moka ao a go dikologilego mo nageng yeo Jehofa Modimo wa gago a go neago yona e le bohwa gore o e tšee e be ya gago, o fediše leina la Baamaleke ka tlase ga magodimo. O se ke wa lebala seo."

¹⁶“Ge mafelelong o tsene nageng yeo Jehofa Modimo wa gago a go neago yona e le bohwa, o e tšere e le ya gago e bile o dula go yona,"

¹⁷gona o tšee tše dingwe tša dithakangwaga tša dienywa ka moka tša nageng ya geno tšeo o tlago go di tliša di etšwa nageng yeo Jehofa Modimo wa gago a go neago yona, ke moka o di tsenye ka serotong o ye lefelong leo Jehofa Modimo wa gago a tlago go kgetha gore leina la gagwe le dule go lona."

¹⁸O tle go moperisita yo a tla bego a hlankela mehleng yeo, o re go yena: ‘Lehono ke swanetše go begela Jehofa Modimo wa gago gore ke gorogile nageng yeo Jehofa a enetšego borakgolokhukhu ba rena gore o tla re nea yona.’"

¹⁹“Moperisita a tšee seroto seo seatleng sa gago a se bee pele ga aletare ya Jehofa Modimo wa gago."