Various Laws

¹“Seaparo sa monna se se ke sa apešwa mosadi, le monna a se ke a apara seaparo sa mosadi; ka gobane motho le ge e le mang yo a dirago dilo tše, ke selo se se šišimišago go Jehofa Modimo wa gago."

²“Ge o ka hwetša sehlaga sa nonyana mo tseleng, se le sehlareng le ge e le sefe goba se le mo fase se na le mafotwana goba mae gomme mafotwana ao a duletšwe ke mmago ona goba nonyana yeo e alametše mae ao, o se ke wa e tšea le mafotwana a yona."

³O rake mmago ona, eupša o ka itšeela mafotwana ao, e le gore dilo di go sepelele gabotse gomme o atelwe ke matšatši."

⁴“Ge o ka aga ntlo e mpsha, o age le mmotwana ka godimo ga tlhaka ya gago, e le gore ntlo yeo ya gago e se be le molato wa madi ka gobane motho a ka wa go yona."

⁵“Serapeng sa gago sa merara o se ke wa bjala mehuta e mebedi ya peu, ka ge dienywa tša serapa sa merara le puno ka moka ya peu yeo o ka e bjalago di ka gafelwa sekgethweng."

⁶“O se ke wa lema ka poo le pokolo o di panne gotee."

⁷“O se ke wa apara seaparo se se dirilwego ka go logaganya boya le lešela la linene."

⁸“O itirele mašaphu merumong ya diaparo tša gago tšeo o di aparago."

⁹“Ge monna a ka nyala mosadi gomme a robala le yena, ke moka ka morago a se sa hlwa a mo rata,"

¹⁰a mmea molato wa gore o dirile selo se sebe gomme a goboša leina la gagwe, a re: ‘Yo ke mosadi yo ke mo nyetšego, ka robala le yena gomme ka se hwetše bohlatse bja gore ke kgarebe’;"

¹¹gona tatago ngwanenyana yoo le mmagwe ba tšee bohlatse bja go ba kgarebe ga ngwanenyana yoo ba bo tliše go banna ba bagolo ba motse kgorong ya wona;"

¹²ke moka tatago ngwanenyana yoo a botše banna ba bagolo a re: ‘Ke neile monna yo morwedi wa ka gore e be mosadi wa gagwe, bjale ga a sa mo rata."

¹³Bjale šo o bea morwedi wa ka molato wa gore o dirile selo se sebe, o re: “Ke hweditše gore morwedi wa gago ga a na bohlatse bja gore ke kgarebe.” Bjale bohlatse bja gore morwedi wa ka ke kgarebe še bo.’ Ke moka ba phurolle seaparo seo sa bohlatse pele ga banna ba bagolo ba motse."

¹⁴Banna ba bagolo ba motse woo ba tšee monna yoo ba mo otle."

¹⁵Ba mo lefiše dishekele tše lekgolo tša silifera ba di nee tatago ngwanenyana yoo, ka gobane o diretše kgarebe ya Isiraele leina le lebe; ngwanenyana yoo a tšwele pele e le mosadi wa gagwe. Monna yoo a ka se dumelelwe go mo hlala mehla ka moka ya ge a sa phela."

¹⁶“Eupša ge taba yeo go ka hwetšwa gore ke therešo, gwa hwetšwa gore ga go na bohlatse bja gore ngwanenyana yoo e be e le kgarebe,"

¹⁷gona ba ntšhetše ngwanenyana yoo ka ntle ga mojako wa ntlo ya tatagwe gomme banna ba motse ba mo kgatle ka maswika a hwe, ka gobane o dirile bošilo bjo bo hlabišago dihlong Isiraeleng ka go gweba ka mmele ntlong ya tatagwe. Ka go re’alo o tloše selo se sebe mo go wena."

¹⁸“Ge e ba monna a ka hwetšwa a robetše le mosadi wa monna yo mongwe, bobedi bja bona ba bolawe, go bolawe monna yo a robetšego le mosadi yoo gotee le yena mosadi yoo. Ka go re’alo o tloše se sebe Isiraeleng."

¹⁹“Ge e ba go ka ba le ngwanenyana wa kgarebe yo a beeleditšwego ke monna gomme monna yo mongwe a mo hwetša motseng a robala le yena,"

²⁰bobedi bja bona le ba ntšhetše ka ntle ga kgoro ya motse woo le ba kgatle ka maswika ba hwe; ngwanenyana yoo a hwe ka gobane ga se a goeletša moo motseng, gomme monna yoo a hwe ka gobane o gobošitše mosadi wa wa gabo. Ka go re’alo o tloše se sebe mo go wena."

²¹“Ge e ba ngwanenyana yo a beeleditšwego a hweditšwe ke monna nageng gomme a mo swara a robala le yena, gona monna yo a robetšego le yena a bolawe a nnoši,"

²²eupša ngwanenyana yoo o se ke wa mo dira selo. Ngwanenyana yoo ga se a dira sebe seo se swanelwago ke lehu, ka gobane taba ye e etša ge monna a ka tsogela wa gabo gomme a mmolaya, a fediša bophelo bja gagwe."

²³Monna yoo o hweditše ngwanenyana yoo nageng. Ngwanenyana yo a beeleditšwego o ile a goeletša eupša a hloka wa go mo hlakodiša."

²⁴“Ge monna a ka hwetša ngwanenyana yo e lego kgarebe yeo e sego ya beeletšwa gomme a mo swara a robala le yena, ke moka ba hwetšwa,"

²⁵gona monna yoo a robetšego le yena a nee tatago ngwanenyana dishekele tše masomehlano tša silifera gomme ngwanenyana yoo e tla ba mosadi wa gagwe ka ge a mo gobošitše. Monna yoo a ka se dumelelwe go mo hlala mehla ka moka ya ge a sa phela."

²⁶“Go se be le monna yo a tšeago mosadi wa tatagwe, e le gore a se ke a goboša tatagwe."

²⁷“Phuthegong ya Jehofa go se ke gwa tla monna yo a opafetšego ka go kgatlelwa dithaka tša gagwe tša peu ya bonna goba yo a kgaotšwego setho sa gagwe sa botona."

²⁸“Go se be le ngwana yo e sego wa molao yo a tlago phuthegong ya Jehofa. Go se be le o tee wa gabo go ba go fihla molokong wa lesome yo a tlago phuthegong ya Jehofa."

²⁹“Go se be le Moamoni goba Momoaba yo a tlago phuthegong ya Jehofa. Gaešita le go fihla molokong wa lesome, mo go bona go se be le yo a tlago phuthegong ya Jehofa go iša mehleng ya neng le neng,"

³⁰ka ge ba sa ka ba le thuša ka senkgwa le meetse ge le be le le tseleng ya go tšwa Egipita, le ka ge ba ile ba le thwalela Bileama morwa wa Beoro yo a tšwago Phethore ya Mesopotamia gore a tlo le rogaka."