Various Laws

¹“Baperisita, e lego barwa ba Lefi ba batamele, ka gobane ke bona bao Jehofa Modimo wa gago a ba kgethilego gore ba mo hlankele le gore ba šegofatše ka leina la gagwe, yena Jehofa, le bao ka melomo ya bona taba e nngwe le e nngwe yeo go ngangišanwago ka yona ya tiro le ge e le efe ya bošoro e swanetšego go rarollwa."

²Ke moka banna ka moka ba bagolo ba motse woo bao ba lego kgauswi le motho yo a bolailwego ba hlapele diatla godimo ga sethojana seo se kgaotšwego molala moeding wa mafula;"

³ba bolele ba re: ‘Diatla tša rena ga se tša tšholla madi a, le gona mahlo a rena ga se a bona ge a tšhollwa."

⁴Wena Jehofa, o se ke wa rweša setšhaba sa gago sa Isiraele molato, sona seo o se lopolotšego, le gona o se ke wa bea setšhaba sa gago sa Isiraele molato wa gore se tšholotše madi a se nago molato.’ Anke se se ke sa rwešwa molato wa madi."

⁵Ge e le wena o tla phumola molato wa go tšhollwa ga madi a se nago molato mo go wena, ka gobane o tla dira seo se lokilego mahlong a Jehofa."

⁶“Ge o ka ya go lwa le manaba a gago gomme Jehofa Modimo wa gago a a gafela seatleng sa gago wa a thopa;"

⁷ke moka gare ga mathopša wa bona mosadi yo a bopegilego gabotse gomme a go kgahla wa mo tšea gore o mo dire mosadi wa gago,"

⁸gona o mo tliše ka ntlong ya gago. A beole hlogo a be a itokiše dinala,"

⁹o mo apole diaparo tša gagwe tšeo a thopilwego a di apere gomme a dule ntlong ya gago a llele tatagwe le mmagwe kgwedi ka moka; ka morago ga moo o mo nyale gomme o robale le yena, e be mosadi wa gago."

¹⁰Ge e ba o ka hwetša a se sa go kgahla, o mo tlogele a sepele a ye moo moya wa gagwe o ratago go ya gona; eupša o se ke wa mo rekiša ka tšhelete. O se ke wa mo dira tša bošoro ka morago ga ge o mo gapeleditše gore e be mosadi wa gago."

¹¹“Ge monna a ka ba le basadi ba babedi, yo a mo ratago le yo a sa mo ratego, ke moka bona basadi bao, yo a ratwago le yo a sa ratwego, ba mmelegela barwa gomme morwa wa leitšibulo ya ba wa yo a sa ratwego,"

¹²gona e re mohlang monna yoo a nea barwa ba gagwe bohwa go seo a nago le sona, monna yoo a se ke a dumelelwa go tšea morwa wa mosadi yo a ratwago e le leitšibulo la gagwe legatong la morwa wa mosadi yo a sa ratwego, e lego yena leitšibulo."

¹³A tšee morwa wa mosadi yo a sa ratwego e le leitšibulo ka go mo nea dikarolo tše pedi tša selo se sengwe le se sengwe seo a hwetšwago a na le sona, ka gobane morwa yoo ke yena thakaletswalo ya gagwe. Tshwanelo ya go ba leitšibulo ke ya gagwe."

¹⁴“Ge motho a ka ba le morwa wa senganga e bile e le lerabele, a sa theetše lentšu la tatagwe goba la mmagwe, ba mo phošolla eupša a sa ba theetše,"

¹⁵tatagwe le mmagwe ba mo sware ba mo ntšhe gomme ba mo tliše go banna ba bagolo ba motse wa gabo le kgorong ya gabo;"

¹⁶bona ba botše banna ba bagolo ba motse wa gabo ba re: ‘Morwa yo wa rena ke senganga e bile ke lerabele; ga a theetše lentšu la rena ka ge e le sejagobe e bile e le letagwa.’"

¹⁷Gona banna ka moka ba motse wa gabo ba mo kgatle ka maswika a hwe. Ka go re’alo o tloše se sebe mo go wena gomme Baisiraele ka moka ba tla di kwa ba tšhoga."

¹⁸“Ge go ka ba le motho yo a dirilego sebe seo se swanelwago ke kahlolo ya lehu, ke moka a bolawa a fegwa koteng,"

¹⁹gona setopo sa gagwe se se ke sa lala koteng; eupša o mmoloke letšatšing lona leo, ka gobane motho yo a fegwago koteng o etša selo seo se rogakilwego ke Modimo; o se ke wa šilafatša naga ya geno yeo Jehofa Modimo wa gago a go neago yona e le bohwa."

²⁰“O se ke wa re ge o bona poo goba nku ya wa geno e timela wa fo e tlogela. O e gape o e bušetše go wa geno."

²¹Ge e ba wa geno a se kgauswi le wena e bile o sa mo tsebe, gona o ye le yona gae lapeng la gago gomme o dule le yona go fihlela ge wa geno a e tsoma, ke moka o mmušetše yona."

²²Ke kamoo o tlago go dira ka gona ka pokolo ya gagwe, ka seaparo sa gagwe goba ka selo le ge e le sefe sa wa geno seo se timetšego, seo se mo timelelago gomme wena wa se hwetša. Ga se wa dumelelwa gore o se tlogele."

²³“O se ke wa re ge o bona pokolo goba poo ya wa geno e wela fase tseleng wa fo e tlogela. O mo thuše go e tsoša."