Various Laws; The King

¹gona monna goba mosadi yoo a dirilego selo se se sebe o mo ntšhetše ka ntle ga dikgoro tša gago, ee, monna yoo goba mosadi yoo, o mo kgatle ka maswika a hwe."

²A bolawe ka bohlatse bja molomo wa dihlatse tše pedi goba tše tharo. A se bolawe ka bohlatse bja molomo wa hlatse e tee."

³Diatla tša dihlatse tšeo e be tšona tša pele di mmolayago, ke moka ka morago go latele diatla tša setšhaba ka moka; o tloše se sebe mo go wena."

⁴“Ge e ba o ka thatafalelwa ke molato wo o nyakago go sekwa, woo go wona go bilego le tšhollo ya madi gomme o begilwe molaong, goba go dirilwe bošoro, e lego taba yeo e tsošitšego ngangišano ka gare ga dikgoro tša gago, gona o eme o rotogele lefelong leo Jehofa Modimo wa gago a tlago go le kgetha,"

⁵o ye go baperisita, e lego Balefi, le go yoo e tla bago e le moahlodi mehleng yeo, o ye o botšiše gomme bona ba tla go botša kamoo molato o ka ahlolwago ka gona."

⁶O dire ka go dumelelana le seo ba tlago go go botša sona ba le lefelong leo Jehofa a tlago go le kgetha; o ele hloko gore o dira tšohle tšeo ba go laelago tšona."

⁷O dire ka go dumelelana le molao le kahlolo tšeo ba tlago go go nea tšona. O se ke wa aroga lentšung leo ba tlago go go botša lona, wa arogela ka go le letona goba le letshadi."

⁸Monna yo a bontšhago go ikgodiša ka go se theetše moahlodi goba moperisita yo a emego gore a hlankele Jehofa Modimo wa gago, yena a bolawe; wena o fediše se sebe Isiraeleng."

⁹Setšhaba ka moka se tla kwa seo ke moka sa boifa gomme sa se sa ikgodiša."

¹⁰“Ge mafelelong o goroga nageng yeo Jehofa Modimo wa gago a go neago yona, gomme o e tšere e le ya gago o dula go yona, e bile o itše: ‘E re ke ipeele kgoši go etša ditšhaba tše dingwe ka moka tšeo di ntikologilego,’"

¹¹gona o bee kgoši yeo Jehofa Modimo wa gago a tlago go e kgetha. O bee kgoši go tšwa baneng beno. O ka se dumelelwe go bea motho o šele yo e sego ngwaneno."

¹²Ke feela gore yena a se ke a ikokeletša dipere goba a bušetša setšhaba Egipita e le gore a oketše dipere; mola e le gore Jehofa o itše go lena: ‘Le se ke la hlwa le boela Egipita.’"

¹³Le gona a se ke a ikatišetša basadi, e le gore pelo ya gagwe e se ke ya aroga; e bile a se ke a ikgobelela silifera le gauta tše ntši."

¹⁴E re ge a dula sedulong sa bogoši mmušong wa gagwe, a ingwalele kopi ya molao wo ka pukung, wona molao woo o hlokometšwego ke baperisita, e lego Balefi."

¹⁵“A dule a e swere, a e bale matšatši ka moka a bophelo bja gagwe, e le gore a ithute go boifa Jehofa Modimo wa gagwe, a boloke mantšu ka moka a molao wo le ditaelo tše ka go di phetha;"

¹⁶e le gore pelo ya gagwe e se ke ya iphagamišetša bana babo le gore a se ke a aroga go seo a se laetšwego, a arogela ka go le letona goba le letshadi, e le gore a atelwe ke matšatši mmušong wa gagwe, yena le bana ba gagwe gare ga Isiraele."

¹⁷“Baperisita, e lego Balefi, wona moloko ka moka wa Lefi, ba se ke ba ngwathelwa kabelo goba bohwa bja Isiraele. Ba je dibego tša Jehofa tšeo di fišitšwego ka mollo, bjona bohwa bja gagwe."

¹⁸Lefi a se ke a abelwa bohwa gare ga bana babo. Jehofa ke bohwa bja gagwe, feela bjalo ka ge a mmoditše."

¹⁹“Seo baperisita ba swanetšego go dula ba se newa ke setšhaba, ba se newa ke bao ba dirago sehlabelo ka poo goba ka nku se se: Moperisita a newe letsogo, mehlagare le mogodu."

²⁰O mo nee dithakangwaga tša mabele a gago, tša beine ya gago le tša makhura a gago gotee le boya bja mathomo bjo o bo kotilego mohlapeng wa gago wa dihuswane."