The Writing on the Wall

¹Ka bjona bošego bjoo kgoši Belshatsara wa Mokaladea o ile a bolawa"

²gomme Dario wa Momede a tšea mmušo a na le nywaga e ka bago e masometshela-pedi."

³Dario o bone e le mo gobotse gore a hlome babušiši ba lekgolo-masomepedi (120) mmušong wa gagwe, bao ba bego ba tla buša mmušo ka moka;"

⁴a hloma matona a mararo gore a ba okamele, bao Daniele e bego e le yo mongwe wa bona, e le gore babušiši ba ba tšwele pele ba ba tlišetša pego gore kgoši e se ke ya loba."

⁵Bjale Daniele o ile a dula a phala matona ao a mangwe le babušiši ka gobane o be a na le moya o sa tlwaelegago; kgoši e be e ikemišeditše go mmea maemong a godimo mmušong ka moka."

⁶Matona le babušiši ba napa ba tšwela pele ba nyaka go hwetša seo se ka dirago gore Daniele a solege ditabeng tša mmušo; eupša le gatee ba se kgone go hwetša seo se solegago goba kgobogo go yena, ka gobane o be a botega gomme le gatee ga se gwa hwetšwa bošaedi goba kgobogo go yena."

⁷Ka baka leo bannatia bao ba re: “Re ka se hwetše selo le setee seo se ka dirago gore Daniele yo a solege, ka ntle le ge re ka nyaka seo re ka mo solago ka sona se se thulanago le molao wa Modimo wa gagwe.”"

⁸Ka gona matona ao le babušiši ba tsena mo go lego kgoši e le lešaba gomme ba re go yena: “A kgoši Dario a phele go iša mehleng ya neng le neng."

⁹Matona ka moka a mmušo, bakgoma le babušiši, batseta ba mošate le babuši, ba eletšane gore go bewe molao wa bogošing le kiletšo ya gore ka matšatši a masometharo, mang le mang yo a ka rapelago modimo le ge e le ofe goba motho le ge e le ofe ge e se wena kgoši, a lahlelwe moleteng wa ditau."

¹⁰Bjale wena kgoši, anke o bee molao wo gomme o tiiše lengwalo le ka seka, gore o se ke wa fetošwa go ya ka molao wa Bamede le Baperesia woo o sa fetolwego.”"

¹¹Kgoši Dario a dumelelana le seo gomme a tiiša lengwalo leo le kiletšo yeo ka seka."

¹²Eupša eitše ge Daniele a tsebile gore lengwalo leo le tiišitšwe ka seka, a tsena ka ntlong ya gagwe yeo mafasetere a yona ao a lebeletšego Jerusalema a bego a butšwe, a khunama ka matolo gararo ka letšatši a rapela Modimo wa gagwe le go mo tumiša, go etša ge a be a tlwaetše go dira bjalo peleng."

¹³Bannatia bao ba napa ba tsena kamoo e le lešaba gomme ba hwetša Daniele a rapela e bile a kgopela gore Modimo wa gagwe a mo dire ka botho."

¹⁴Ke moka ba ya go kgoši ba bolela ka kiletšo yela ba re: “Na ga go na kiletšo yeo o e tiišitšego ka seka ya gore ka matšatši a masometharo, mang le mang yo a ka rapelago modimo le ge e le ofe goba motho le ge e le ofe ge e se wena kgoši, a lahlelwe moleteng wa ditau?” Kgoši ya fetola ya re: “Taba yeo e tiišitšwe go ya ka molao woo o sa fetolwego wa Bamede le Baperesia.”"

¹⁵Gateetee ba re go kgoši: “Daniele yo e lego yo mongwe wa mathopša a Bajuda ga se a go hlompha wena kgoši, goba a hlompha kiletšo yeo o e tiišitšego ka seka, eupša o rapela gararo ka letšatši.”"

¹⁶Ke moka ya re ge kgoši a ekwa mantšu ao, a se ke a mo kgahla le gatee, a nagana kamoo a ka hlakodišago Daniele ka gona; letšatši la ba la sobela a katanela go mo phološa."

¹⁷Mafelelong bannatia bao ba tla go kgoši e le lešaba ba re go yona: “Anke kgoši e lemoge gore molao wa Bamede le Baperesia o re kiletšo le ge e le efe goba molao woo o beilwego ke kgoši o se fetolwe.”"

¹⁸Ka gona kgoši ya laela gore Daniele a tlišwe gomme a lahlelwe ka moleteng wa ditau. Kgoši ya re go Daniele: “Modimo wa gago yoo o mo hlankelago ka go se kgaotše o tla go hlakodiša.”"

¹⁹Gwa tlišwa leswika la bewa molomong wa molete gomme kgoši ya le tiiša ka seka sa palamonwana ya yona le ya bakgomana ba yona, e le gore go se ke gwa fetolwa selo tabeng ya Daniele."

²⁰Kgoši ya napa ya ya ntlong ya yona ya mošate gomme ya lala e ikonne dijo, ya se leletšwe le mmino, ya tšhabelwa ke boroko."

²¹Mafelelong kgoši ya tsoga ka masa, ya re ge go thoma go esa ya akgofela moleteng woo wa ditau."

²²Eitše ge kgoši e batamela moleteng wa ditau, ya goeletša Daniele ka lentšu leo le nyamilego. Ya re go yena: “Wena Daniele mohlanka wa Modimo yo a phelago, na Modimo wa gago yoo o mo hlankelago ka go se kgaotše o kgonne go go hlakodiša ditaung?”"

²³Daniele a napa a fetola kgoši a re: “A kgoši e phele go iša mehleng ya neng le neng."

²⁴Modimo wa ka o romile morongwa wa gagwe a tswalela melomo ya ditau gomme ga se tša nkgobatša, ka ge ke hweditšwe ke se na molato pele ga gagwe; le gona ga se ka senya selo pele ga gago, wena kgoši.”"

²⁵Ka gona kgoši ya thaba kudu, ya laela gore Daniele a ntšhwe moleteng wa ditau. Daniele a ntšhwa ka moo moleteng gomme a hwetšwa a se a gobala le gatee, gobane o be a botile Modimo wa gagwe."

²⁶Kgoši ya laela gore go tlišwe bannatia ka moka bao ba bego ba latofaditše Daniele, ba ba lahlela ka moleteng wa ditau le bana ba bona le basadi ba bona; eitše ba sešo ba fihla tlase ditau tša ba di šetše di ba kamile gomme tša robaganya marapo a bona ka moka."

²⁷Ke moka kgoši Dario a ngwalela batho ba merafo ka moka le ditšhaba ka moka le maleme ka moka bao ba dulago lefaseng ka moka a re: “Anke le atelwe ke khutšo!"

²⁸Ke ntšhitše taelo ya gore seleteng se sengwe le se sengwe sa mmušo wa ka, batho ba thothomele le go boifa pele ga Modimo wa Daniele. Ka ge e le Modimo yo a phelago e bile E le wa go iša mehleng ya neng le neng, mmušo wa gagwe o ka se ke wa fedišwa gomme pušo ya gagwe ke ya ka mo go sa felego."

²⁹O a hlakodiša e bile o a phološa. O dira mehlolo le matete magodimong le lefaseng, ka gobane o hlakodišitše Daniele marofeng a ditau.”"

³⁰Ge e le Daniele yena dilo tša mo sepelela gabotse mmušong wa Dario le mmušong wa Korese wa Moperesia."

³¹Ka ngwaga wa pele wa pušo ya Belshatsara kgoši ya Babilona, Daniele o ile a lora gomme a bona dipono a le malaong. A napa a ngwala toro yeo. A bolela ka botlalo ka ditaba tšeo."