Acts 2

¹Ge e le gabotse, Dafida ga se a rotogela magodimong, eupša yena ka noši o re: ‘Jehofa o itše go Morena wa ka: “Dula ka letsogong la ka la le letona,"

²go fihla ke bea manaba a gago e le bogato bja dinao tša gago.”’"

³Ka gona anke ntlo ka moka ya Isiraele e tsebe gore ruri Modimo o mo dirile Morena le Kriste, yena Jesu yo yoo le mo kokotetšego koteng.”"

⁴Bjale ge ba kwele se ba hlabega dipelong gomme ba re go Petro le baapostola ka moka: “Banna, bana bešo, re dire’ng?”"

⁵Petro a re go bona: “Itsholeng gomme yo mongwe le yo mongwe a kolobetšwe leineng la Jesu Kriste bakeng sa tebalelo ya dibe tša lena, ke moka le tla amogela mpho e sa lefelelwego ya moya o mokgethwa."

⁶Gobane kholofetšo ke ya lena, bana ba lena le bohle bao ba lego kgole, e lego bohle bao Jehofa Modimo wa rena a ka ba biletšago go yena.”"

⁷Le gona ka mantšu a mangwe a mantši o neile bohlatse bjo bo feletšego gomme a tšwela pele a eletša, a re: “Phološwang molokong wo o kgopamego.”"

⁸Ka gona bao ba amogetšego lentšu la gagwe ka pelo ka moka ba ile ba kolobetšwa gomme ka letšatši leo batho ba e ka bago ba dikete tše tharo (3 000) ba tlaleletša palo ya barutiwa."

⁹Ke moka ba tšwela pele ba ikgafela thutong ya baapostola, go abelaneng le ba bangwe, go jeng dijo le dithapelong."

¹⁰Ka kgonthe, poifo ya wela batho ka moka gomme gwa direga mehlolo e mentši le dipontšho ka baapostola."

¹¹Bohle bao ba ilego ba fetoga badumedi ba be ba le gotee tabeng ya go abelana dilo ka moka,"

¹²gomme ba rekiša maruo a bona le dithoto ba abela bohle ditseno, go ya ka dinyakwa tša motho yo mongwe le yo mongwe."

¹³Le gona letšatši le lengwe le le lengwe ba be ba dula ba le tempeleng e le ba go kwana, ba eja dijo tša bona magaeng e bile ba di ja ka lethabo le legolo le ka pelo e botegago,"

¹⁴ba tumiša Modimo gomme ba amogelwa ke batho ka moka. Ka nako e swanago, Jehofa a tšwela pele a ba oketša letšatši le letšatši ka bao ba bego ba phološwa."

¹⁵Bjale Petro le Johane ba be ba rotogela tempeleng nakong ya thapelo, e lego ka iri ya senyane,"

¹⁶gomme go be go rwelwe monna yo mongwe yo a belegwego e le segole. Letšatši le letšatši ba be ba fela ba mmea kgauswi le mojako wa tempele wo o bego o bitšwa o Botse e le gore a kgopele dimpho tša kgaugelo go bao ba tsenago ka tempeleng."

¹⁷Ge a bona Petro le Johane ba le kgauswi le go tsena tempeleng, a kgopela dimpho tša kgaugelo."

¹⁸Eupša Petro le Johane ba mo tsepelela ba re: “Re lebelele.”"

¹⁹Ka gona, a ba tsepelela a letetše go hwetša se sengwe go bona."

²⁰Lega go le bjalo, Petro a re: “Silifera le gauta ga ke natšo eupša seo ke nago le sona ke seo ke go neago sona, ke re: Ka leina la Jesu Kriste wa Monatsaretha, sepela!”"

²¹Ge a re’alo, a mo swara ka seatla sa le letona a mo emiša. Ka yona nako yeo, bogato bja dinao tša gagwe le manakaila a gagwe tša tiišwa;"

²²ya re ge a ema ka maoto, a thoma go sepela. A tsena le bona ka tempeleng a sepela, a taboga e bile a tumiša Modimo."

²³Ke moka batho bohle ba mmona a sepela e bile a tumiša Modimo."

²⁴Godimo ga moo ba thoma go lemoga gore yo ke motho yo a bego a fela a dulela dimpho tša kgaugelo Kgorong e Botse ya tempele, gomme ba makala le go tlabja kudu ke seo se mo diragaletšego."

²⁵Ge monna yo a dutše a swere Petro le Johane, batho bohle ba kitima gotee ba leba go bona, ba le go seo se bego se bitšwa mathudi a dikokwane a Solomone, ba maketše wa go hloka molomo."

²⁶Ge Petro a bona se, a re go batho bao: “Banna ba Isiraele, ke ka baka la’ng le makatšwa ke se, goba ke ka baka la’ng le re lebeletše bjalo ka ge eka ke ka matla a rena ka noši goba boineelo go Modimo ge re dirile gore a sepele?"

²⁷Modimo wa Aborahama, wa Isaka le wa Jakobo, e lego Modimo wa borakgolokhukhu ba rena, o tagafaditše Mohlanka wa gagwe Jesu yo lena le mo gafilego le go mo latola pele ga Pilato ge a be a dirile phetho ya go mo lokolla."

²⁸Ee, le latotše yena yoo yo mokgethwa le wa moloki, la kgopela gore le lokollelwe motho yo e bego e le mmolai,"

²⁹mola le bolaile Moemedi yo Mogolo wa bophelo. Eupša Modimo o mo tsošitše bahung, e lego taba yeo re lego dihlatse tša yona."

³⁰Ke ka leina la gagwe le ka tumelo ya rena leineng la gagwe, ge monna yo yo le mmonago e bile le mo tsebago a ile a tiišwa. Tumelo yeo e lego gona ka yena e dirile gore monna yo a phele gabotse ka tsela ye pele ga lena ka moka."

³¹Bjale bana bešo, ke a tseba gore le dirile ka go se tsebe, go etša ge babuši ba lena le bona ba dirile."

³²Eupša ka tsela ye, Modimo o phethagaditše dilo tšeo a di tsebaditšego e sa le pele ka molomo wa baporofeta ka moka, gore Kriste wa gagwe o tla tlaišega."

³³“Ka gona itsholeng le sokologe e le gore dibe tša lena di phumolwe, gore mehla ya tapologo e tle e etšwa sefahlegong sa Jehofa,"

³⁴le gore a rome Kriste yo le mmeetšwego, e lego Jesu."

³⁵Yena yo o swanetše go dula legodimong go fihlela dinakong tša tsošološo ya dilo ka moka yeo Modimo a e boletšego ka molomo wa baporofeta ba gagwe ba bakgethwa ba mehleng ya bogologolo."

³⁶Ge e le gabotse Moshe o itše: ‘Jehofa Modimo o tla le tsošetša moporofeta wa go swana le nna gare ga bana babo lena. Le theetšeng selo le ge e le sefe seo a le botšago sona."

³⁷Ruri motho le ge e le ofe yo a sa theetšego Moporofeta yoo o tla fedišwa ka mo go feletšego bathong.’"

³⁸Ke moka baporofeta bohle, ge e le gabotse go tloga ka Samuele go ya pele le bao ba ilego ba mo hlatlama, go etša ge bohle ba boletše, le bona ba tsebaditše mehla ye phatlalatša."

³⁹Lena le barwa ba baporofeta le ba kgwerano yeo Modimo a e dirilego le borakgolokhukhu ba lena ge a re go Aborahama: ‘Malapa ka moka a lefase a tla šegofatšwa ka peu ya gago.’"

⁴⁰Modimo ka morago ga go tsoša Mohlanka wa gagwe, o ile a mo roma go lena pele gore a le šegofatše ka go dira gore yo mongwe le yo mongwe wa lena a furalele ditiro tša gagwe tše kgopo.”"

⁴¹Bjale ge ba ba babedi ba be ba dutše ba bolela le batho, baperisita ba bagolo, moetapele wa tempele le Basadutsei ba ba wela godimo."

⁴²Ba be ba selekilwe ke ge ba ruta batho e bile ba tsebatša phatlalatša taba ya go tsoga ga Jesu bahung;"

⁴³ba ba swara ba ba tsenya kgolegong go fihlela letšatšing le le latelago, gobane e be e šetše e le mantšiboa."

⁴⁴Lega go le bjalo, bontši bja bao ba bego ba theeditše polelo yeo ba dumela gomme palo ya banna ya ba mo e ka bago dikete tše hlano (5 000)."

⁴⁵Letšatšing le le latelago, Jerusalema gwa kgobokana babuši ba bona, banna ba bagolo le bamangwalo"

⁴⁶(le Annase moperisita yo mogolo, Kayafa, Johane, Aleksandere le bohle ba leloko la moperisita yo mogolo),"

⁴⁷gomme ba ba emiša gare ga bona, ba botšiša gore: “Le dirile se ka matla afe goba ka leina la mang?”"