2Thessalonians 2

¹Nna Paulo, moapostola wa Kriste Jesu ka taelo ya Modimo Mophološi wa rena le ya Kriste Jesu, kholofelo ya rena,"

²ke ngwalela wena Timotheo ngwana wa kgonthe tumelong ke re: Eka o ka ba le botho bjo bogolo bja Modimo, kgaugelo le khutšo tše di tšwago go Modimo Tate le go Kriste Jesu Morena wa rena."

³Bjalo ka ge ke go kgothaleditše go dula Efeso ge ke be ke le kgauswi le go ya Matsedonia, ke sa go kgothatša le bjale e le gore o laele ba bangwe gore ba se rute thutatumelo e fapanego,"

⁴le ge e le go ela hloko dikanegelo tša maaka le ditaba tša go nyakišiša mašika a sa felego. Dilo tše bjalo di feleletša ka dilo tše di se nago mohola gomme di rotoša dipotšišo tše di sa rego selo go e na le go nea selo le ge e le sefe se se tšwago go Modimo sa mabapi le tumelo."

⁵Ruri boikemišetšo bja taelo ye ke lerato le le tšwago pelong e hlwekilego le leo le tšwago letswalong le lebotse le leo le tšwago tumelong e se nago boikaketši."

⁶Ka go fapoga dilong tše ba bangwe ba arošeditšwe polelong ya lefeela."

⁷Ba nyaka go ba barutiši ba molao, eupša ba sa kwešiše dilo tšeo ba di bolelago goba dilo tšeo ba gatelelago ka matla gore di be bjalo."

⁸Bjale re tseba gore Molao o lokile ge feela motho a o diriša gabotse"

⁹ka go lemoga gore molao ga wa direlwa moloki, eupša o diretšwe batho ba go hloka molao le bao ba rabelago, ba ba sa boifego Modimo le badiradibe, ba ba sa botegego, ba ba gobogilego, ba ba bolayago botatago bona le bommago bona le ba ba bolayago batho,"

¹⁰diotswa, banna ba ba robalago le banna, bao ba utswago batho, baaketši, bao ba enago ka maaka, le selo le ge e le sefe se se ganetšanago le thuto e phelago"

¹¹go ya ka ditaba tše dibotse tša letago tša Modimo yo a thabilego tšeo ke di gafetšwego."

¹²Ke leboga Kriste Jesu Morena wa rena, yo a mphilego matla, gobane o mpone ke botega ka go nkabela bodiredi,"

¹³gaešita le ge pele ke be ke le morogaki, motlaiši le motho wa mereba. Lega go le bjalo, ke gaugetšwe, gobane ke dirile ka go se tsebe le ka go hloka tumelo."

¹⁴Eupša botho bjo bogolo bja Morena wa rena bo ile bja ata ka go fetišiša gotee le tumelo le lerato leo le lego go Kriste Jesu."

¹⁵Taba ya gore Kriste Jesu o tlile lefaseng go tlo phološa badiradibe e a botega e bile e swanelwa ke go amogelwa ka botlalo. Ke nna yo mobe go bona ka moka."

¹⁶Lega go le bjalo, ke ile ka gaugelwa e le gore ka nna ke le modiradibe go ba feta, Kriste Jesu a bontšhe go se fele pelo ga gagwe ka moka gore e be mohlala go bao ba tlago go dumela go yena gore ba hwetše bophelo bjo bo sa felego."

¹⁷Bjale anke go Kgoši ya bosafelego, yeo e sa senyegego, yeo e sa bonagalego, Modimo a nnoši, e be kgodišo le letago go iša mehleng ya neng le neng! Amene."