David's Census; Plague

¹Eupša kgoši ya re go Arauna: “Aowa, ke tla di reka go wena ka tšhelete; nka se išetše Jehofa Modimo wa ka dihlabelo tša go fišwa ke se ka lefa selo.” Dafida a reka seboa le dikgomo ka dishekele tše masomehlano tša silifera."

²Dafida a agela Jehofa aletare moo gomme a neela dihlabelo tša go fišwa le tša mohlakanelwa, Jehofa a theetša ditopo tša bona tša gore a gaugele naga, moo kotlo e ilego ya se sa hlwa e wela Isiraele."

³Bjale Kgoši Dafida o be a tšofetše, a godile kudu; ba be ba mo apeša dikobo eupša a sa ruthele."

⁴Ka gona bahlanka ba gagwe ba re go yena: “Wena kgoši mong wa rena, e re ba go nyakele ngwanenyana wa kgarebe, a go hlokomele wena kgoši, e be moledi wa gago; o tla robala kgauswi ga gago, gomme wena kgoši mong wa rena o tla ruthela.”"

⁵Bao ba romilwego ba ya ba nyaka ngwanenyana yo mobotse seleteng ka moka sa Isiraele, mafelelong ba hwetša Abishaga wa Moshunema ke moka ba mo tliša go kgoši."

⁶Ngwanenyana yoo e be e le yo mobotse kudu; ya ba moledi wa kgoši a ba a e hlankela, gomme kgoši ga ya ka ya robala le yena."

⁷Ka nako yeo ka moka Adonija morwa wa Hagithi o be a iphagamiša, a re: “Nna ke tlo ba kgoši ka buša!” Ke moka a ikhweletša koloi le banamedi ba dipere gotee le banna ba masomehlano bao ba bego ba tla kitima pele ga gagwe."

⁸Le ka mohla tatagwe o be a sa nyake go mo kweša bohloko ka go mo phošolla a re go yena: “Go re’ng o dirile sa gore le gore?” Le gona Adonija o be a na le sebopego se sebotse. Mmagwe o be a mmelege ka morago ga Abesalomo."

⁹Adonija a dirišana le Joaba morwa wa Tseruya le moperisita Abiathara, ba mo thuša ya ba balatedi ba gagwe."

¹⁰Ge e le moperisita Tsadoko, Benaya morwa wa Jehoyada, moporofeta Nathane, Shimei, Rei le bagale ba Dafida, bona ga se ba ka ba ema le Adonija."

¹¹Mafelelong Adonija a dira sehlabelo ka dinku, dikgomo le diphoofolo tše di nonnego, a se direla kgauswi le leswika la Tsohelethe yeo e lego hleng ga Ene-rogele, gomme a laletša bana babo ka moka, bona barwa ba kgoši, le banna bohle ba Juda bao e bego e le bahlanka ba kgoši;"

¹²eupša ga a ka a laletša moporofeta Nathane, Benaya, bagale le Solomone ngwanabo."

¹³Bjale Nathane a botša Batseba mmago Solomone a re: “A ga se wa kwa gore Adonija morwa wa Hagithi ke kgoši, gomme Dafida mong wa rena ga a tsebe ka seo le gatee?"

¹⁴Ka gona etla ke go eletše hle. Hlakodiša moya wa gago le moya wa Solomone morwa wa gago."

¹⁵Eya go Kgoši Dafida o mmotše o re: ‘A ga se wena kgoši mong wa ka yo a enetšego nna lekgoba la gago wa re: “Solomone morwa wa gago ke yena e tlago go ba kgoši ka morago ga ka, le gona ke yena a tlago go dula sedulong sa ka sa bogoši”? Bjale ke ka baka la’ng Adonija e le kgoši?’"

¹⁶E tla re ge o sa bolela le kgoši, ke moka nna ka tsena ke go šetše morago gomme ka tiišetša mantšu a gago.”"

¹⁷Batseba a ya a tsena moo kgoši e lego gona ka phapošing ya ka gare. Kgoši e be e tšofetše kudu, gomme Abishaga wa Moshunema o be a e hlankela."

¹⁸Ke moka Batseba a khunama a wela fase pele ga kgoši, gomme kgoši ya re: “O tlile go kgopela’ng?”"

¹⁹Yena a re go kgoši: “Mong wa ka, ke wena o enetšego nna lekgoba la gago ka Jehofa Modimo wa gago wa re: ‘Solomone morwa wa gago ke yena e tlago go ba kgoši ka morago ga ka, le gona ke yena a tlago go dula sedulong sa ka sa bogoši.’"

²⁰Bjale tseba gore Adonija ke kgoši gomme wena kgoši mong wa ka ga o tsebe ka seo le gatee."

²¹O dirile sehlabelo ka dipoo, diphoofolo tše di nonnego le ka dinku tše dintšintši, a laletša barwa ba kgoši ka moka, moperisita Abiathara le Joaba molaodi wa madira; eupša ga se a laletša Solomone mohlanka wa gago."

²²Wena kgoši mong wa ka—mahlo a Baisiraele ka moka a lebeletše wena, gore wena kgoši mong wa ka o ba botše gore ka morago ga gago ke mang yo a tlago go dula sedulong sa gago sa bogoši."

²³E tla re gateetee ge wena kgoši mong wa ka o robetše le borakgolokhukhu ba gago, gona nna le morwa wa ka Solomone re tla tšewa re le manaba.”"

²⁴Ya re a sa bolela le kgoši, moporofeta Nathane a tsena."

²⁵Gateetee ba botša kgoši ba re: “Moporofeta Nathane šo!” Ka morago ga moo a tsena a ema pele ga kgoši gomme a wela fase pele ga kgoši a inamišeditše sefahlego fase."