Manasseh and Amon

¹Ge e le ditaba ka moka tša Amone, e lego tšeo a di dirilego, na ga di a ngwalwa ka pukung ya ditaba tša mehleng ya dikgoši tša Juda?"

²Ka gona ba ile ba mmoloka lebitleng la gagwe serapeng sa Utsa; Josia morwa wa gagwe a buša legatong la gagwe."

³Josia o be a na le nywaga e seswai ge a thoma go buša, gomme o bušitše Jerusalema ka nywaga e masometharo-tee. Leina la mmagwe e be e le Jedida morwedi wa Adaya yo a tšwago Botsikathe."

⁴O ile a dira tše di lokilego mahlong a Jehofa, a ba a sepela ditseleng ka moka tša Dafida rakgolokhukhu wa gagwe, gomme ga se a ka a arogela ka go le letona goba go le letshadi."

⁵Ya re ka ngwaga wa lesomeseswai wa pušo ya Kgoši Josia, kgoši ya roma Shafane morwa wa Atsalia morwa wa mongwaledi Meshulama ntlong ya Jehofa, ya re:"

⁶“Rotogela go Hilikia moperisita yo a phagamego, o mmotše gore a beakanye tšhelete yeo e tlišitšwego ntlong ya Jehofa yeo baletamejako ba e kgobokeditšego e etšwa bathong;"

⁷ke moka ba e nee bašomi bao ba beilwego go hlokomela ntlo ya Jehofa, gore bona ba e nee bašomi ba ntlong ya Jehofa bao ba lokišago menga ya ntlo yeo,"

⁸ba e nee ditsebi, baagi le babetli ba maswika gore ba reke dikota le maswika ao a betlilwego e le gore ba lokiše ntlo yeo."

⁹Go se ke gwa nyakišišwa ka ga tšhelete yeo go banna bao ba e newago, ka gobane ba dira modiro wa bona ka potego.”"

¹⁰Ka morago Hilikia moperisita yo a phagamego a re go mongwaledi Shafane: “Ke hweditše puku ya molao ka ntlong ya Jehofa.” Hilikia a napa a nea Shafane puku yeo gomme yena a e bala."

¹¹Ke moka mongwaledi Shafane a tla go kgoši, a re go yona: “Bahlanka ba gago ba ntšhitše tšhelete yeo e hweditšwego ka ntlong gomme ba e nea bao ba kgethilwego, e lego bao ba bego ba dira mošomo ntlong ya Jehofa.”"

¹²Mongwaledi Shafane a ya go botša kgoši gore: “Go na le puku yeo moperisita Hilikia a nneilego yona.” Ke moka Shafane a e bala a le pele ga kgoši."

¹³Ya re gateetee ge kgoši e kwele mantšu a puku ya molao, ya gagola diaparo tša yona."

¹⁴Ke moka kgoši ya laela moperisita Hilikia, Ahikama morwa wa Shafane, Akiboro morwa wa Mikaya, mongwaledi Shafane le Asaya mohlanka wa kgoši, ya re:"

¹⁵“Eyang le mpotšišetše go Jehofa le be le botšišetše setšhaba se gotee le bohle bao ba lego Juda ka ga mantšu a puku ye e hweditšwego; ka gobane Jehofa o re befeletše kudu ka ge borakgolokhukhu ba rena ba se ba theetša mantšu a puku ye ka gore ba latele tšohle tšeo di ngwadilwego mabapi le rena.”"

¹⁶Ke moka moperisita Hilikia, Ahikama, Akiboro, Shafane le Asaya ba ya go Huluda moporofeta wa mosadi, yo e lego mosadi wa Shalume morwa wa Tikifa morwa wa Harahasi mohlokomedi wa diaparo, ka ge a be a dula karolong e mpsha ya motse wa Jerusalema; ba bolela le yena."

¹⁷Mosadi yoo a re go bona: “Se ke seo Jehofa Modimo wa Isiraele a se boletšego: ‘Botšang monna yoo a le rometšego go nna le re:"

¹⁸“Se ke seo Jehofa a se boletšego: ‘Šefa ke tliša bošula mo lefelong le gotee le go badudi ba lona, e lego ona mantšu ka moka a puku yeo kgoši ya Juda e e badilego;"

¹⁹ka gobane ba ntlogetše ba ya ba thuntšhetša medimo e mengwe muši wa dihlabelo, e le gore ba nkgopiše ka modiro ka moka wa diatla tša bona. Pefelo ya ka e tuketše lefelo le gomme e ka se tingwe.’”’"

²⁰Ge e le kgoši ya Juda yeo e le romilego go tlo botšiša Jehofa, yona le e botše le re: “Se ke seo Jehofa Modimo wa Isiraele a se boletšego: ‘Ge e le mabapi le mantšu ao o a kwelego,"

²¹ka ge pelo ya gago e ile ya letefala moo o ilego wa ikokobeletša nna Jehofa ge o ekwa seo ke se boletšego ka lefelo le gotee le badudi ba lona gore e tla ba selo seo se tlabago le thogako, ke moka wa gagola diaparo tša gago wa ba wa lla o le pele ga ka, tseba gore ge e le nna ke go kwele,” go bolela Jehofa."

²²“Ke ka baka leo ke go išago go borakgolokhukhu ba gago; o tla bolokwa mabitleng a gago ka khutšo gomme mahlo a gago a ka se bone bošula bjohle bjo ke tlago go bo tlišetša lefelo le.’”’” Ke moka ba tliša phetolo go kgoši."

²³Kgoši ya romela molaetša gomme ba kgobokeletša go yona banna ba bagolo ka moka ba Juda le ba Jerusalema."

²⁴Ka morago ga moo kgoši ya rotogela ntlong ya Jehofa e na le banna ka moka ba Juda, badudi ka moka ba Jerusalema, baperisita, baporofeta le setšhaba ka moka, go tloga ka ba banyenyane go fihla ka ba bagolo; ke moka ya ba balela ba hlwaile tsebe mantšu ka moka a puku ya kgwerano, e lego yeo e hweditšwego ntlong ya Jehofa."

²⁵Kgoši ya ema kgauswi le kokwane gomme ya dira kgwerano pele ga Jehofa, gore e latele Jehofa, e lote ditaelo tša gagwe, dikgopotšo tša gagwe le melao ya gagwe ka pelo ya yona ka moka le ka moya wa yona ka moka gore e phethe mantšu a kgwerano ye ao a bego a ngwadilwe ka pukung yeo. Ka morago setšhaba ka moka sa dumelelana le kgwerano yeo."

²⁶Kgoši ya laela Hilikia moperisita yo a phagamego, baperisita ba bangwe le baletamejako gore ba ntšhe ka tempeleng ya Jehofa dibjana ka moka tšeo di diretšwego Baali, tšeo di diretšwego kota e kgethwa le tšeo di diretšwego makoko ka moka a magodimong. Ke moka ya di fišetša ka ntle ga Jerusalema mašemong a mebotong a Kidirone gomme ya tliša melora ya tšona Bethele."