Elijah and Ahaziah

¹Bjale Eliya a re go yena: “Elisha, hle šala mo, ka gobane Jehofa o nthomile Nokeng ya Jorodane.” Eupša yena a re: “Ke ikana ka Jehofa yo a phelago le ka moya wa gago o phelago gore nka se go tlogele.” Ka gona ba ya ka bobedi bja bona."

²Go be go na le banna ba masomehlano ba barwa ba baporofeta bao ba ilego ba emela kgojana moo ba bego ba kgona go ba bona; eupša ge e le bobedi bja bona, ba ile ba ema Nokeng ya Jorodane."

³Ke moka Eliya a tšea seaparo sa gagwe sa baporofeta a se phutha gomme a itia meetse ka sona, meetse ao a feleletša a arogane a butše tsela, moo bobedi bja bona ba ilego ba phatša mmung o omilego."

⁴Ya re gateetee ge ba fetša go tshelela ka mošola, Eliya a re go Elisha: “Nkgopele seo o nyakago ke go direla sona pele ke tlošwa go wena.” Ge a re’alo Elisha a re: “Hle ke kgopela go newa dikarolo tše pedi tša moya wa gago.”"

⁵Ge a re’alo yena a re: “O kgopetše selo se sethata. Ge o ka mpona nakong ya ge ke tlošwa go wena, gona go tla direga kamoo o kgopetšego ka gona; eupša ge e ba o ka se mpone, gona go ka se be bjalo.”"

⁶Ya re ge ba dutše ba sepela ba tšama ba bolela, ba bona go tšwelela koloi ya ntwa ya mollo le dipere tša mollo gomme tša ba aroganya; ke moka Eliya a rotogela magodimong ka ledimo."

⁷Nako ye ka moka ke ge Elisha a bona tšeo, gomme a goeletša a re: “Tate, tate, bona koloi ya ntwa ya Isiraele le banamedi ba yona ba dipere!” Ke moka a se sa hlwa a mmona. A tšea diaparo tša gagwe a di gagola ka diripa tše pedi."

⁸Ka morago ga moo a topa seaparo sa Eliya sa baporofeta seo se welego go yena, a boela morago a ya a ema lešing la Noka ya Jorodane."

⁹Ke moka a tšea seaparo seo sa Eliya seo se welego go yena gomme a itia meetse a re: “O kae Jehofa Modimo wa Eliya, ke ra Yena?” Ge a itia meetse, wona a arogana a bula tsela, moo Elisha a ilego a napa a phatša."

¹⁰Ge barwa ba baporofeta bao ba bego ba le Jeriko ba mmona a sa le kgole, ba re: “Moya wa Eliya o godimo ga Elisha.” Ka gona ba tla ba mo gahlanetša gomme ba mo khunamela."

¹¹Ba re go yena: “Rena bahlanka ba gago re na le banna ba masomehlano, bao e lego bagale. Hle anke ba ye go nyaka mong wa gago. Mohlomongwe moya wa Jehofa o mo kukile wa mo lahlela go e nngwe ya dithaba goba go o mongwe wa meedi.” Eupša yena a re: “Le se ke la ba roma.”"

¹²Ba mo phegelela go fihlela a hlabja ke dihlong, moo a ilego a re: “Ba romeng.” Bjale ba roma banna bao ba masomehlano; bona ba fetša matšatši a mararo ba nyaka, eupša ba se mo hwetše."

¹³Ge ba boela go yena, ba hwetša a dula Jeriko. Ke moka a re go bona: “Na ga se ka le botša gore: ‘Le se ke la ya’?”"

¹⁴Ka morago ga nako batho ba motseng ba re go Elisha: “Bjale ka ge mong wa rena a bona, mo motse wo o lego gona ke mo gobotse; eupša meetse wona ke a mabe, le gona naga ye e dira gore basadi bao ba imilego ba senyegelwe.”"

¹⁵Ge ba re’alo yena a re: “Ntlišetšeng moruswi o mofsa o monyenyane le tšheleng letswai ka gare ga wona.” Ba mo tlišetša wona."

¹⁶Ka gona a ya mothopong wa meetse a tšhela letswai ka go wona, a re: “Se ke seo Jehofa a se boletšego: ‘Ke dira gore meetse a a phediše. A ka se sa bolaya goba a dira gore basadi bao ba imilego ba senyegelwe.’”"

¹⁷Meetse ao a alafega go ba go fihla lehono le, feela bjalo ka ge Elisha a boletše."

¹⁸A tloga moo a rotogela Bethele. Ge a le tseleng a rotoga, gwa tšwelela bašemane ba banyenyane bao ba bego ba etšwa motseng, ba mo kwera ba re: “Rotoga lefatla tena! Rotoga lefatla tena!”"