2Corinthians 11

¹Ee, ke tseba motho yo bjalo eupša ga ke tsebe gore e be e le ka mmele goba e se ka wona, go tseba Modimo."

²Ke tseba gore o ile a išwa paradeiseng gomme a kwa mantšu a sa bolelegego ao go sa dumelelwego ke molao gore motho a a bolele."

³Ke tla ikgantšha ka motho yo bjalo, eupša nka se ikgantšhe ka nna, ge e se ka mafokodi a ka."

⁴Gobane le ge e ba nka nyaka go ikgantšha, nka se be yo a hlokago tlhaologanyo, gobane ke tla bolela therešo. Eupša ke efoga seo e le gore go se be le yo a nkgodišago go feta kamoo a bonago ke le ka gona goba ka seo a se kwago go nna,"

⁵feela ka baka la ge ke hweditše dikutollo tše bjalo tše di makatšago. Ka gona e le gore ke se ke ka ikwa ke phagame go feta tekanyo, ke ile ka newa mootlwa nameng, e lego morongwa wa Sathane, gore a dule a mphasola, e le gore ke se ke ka phagama go feta tekanyo."

⁶Ka gona ke ile ka lopa Morena ka makga a mararo mabapi le se gore o tloge go nna."

⁷Fela o ile a re go nna: “Botho bja ka bjo bogolo bo go lekane; gobane matla a ka a phethagatšwa bofokoding.” Ka gona, ke tla thabela go ikgantšha ka mafokodi a ka e le gore matla a Kriste a ntšhireletše bjalo ka tente."

⁸Ka gona ke thabišwa ke mafokodi, dithogako, dinako tša go hloka, ditlaišo le mathata ka baka la Kriste. Gobane ge ke fokola, ke gona ke lego matla."

⁹Ke fetogile yo a hlokago tlhaologanyo. Le nkgapeleditše gore ke be bjalo gobane ke be ke swanetše go ba ke boletšwe gabotse ke lena. Gobane ga se ka ipontšha ke le wa tlase le selong setee go baapostola ba lena ba lokilego kudu, gaešita le ge ke se selo."

¹⁰Ka kgonthe dipontšho tša moapostola di tšweleditšwe gare ga lena ka kgotlelelo e kgolo, le ka dipontšho le dika le mediro e matla."

¹¹Gobane ke bjang mo le bilego tlase go feta diphuthego tše dingwe ka moka, ge e se gore nna ga se ka ka ka le rweša boima? Hle ntshwareleng phošo ye."

¹²Bonang! Le ke lekga la boraro ke itokišeditše go tla go lena, fela nka se be morwalo. Gobane ga ke nyake dilo tša lena, eupša ke nyaka lena; gobane bana ga se ba swanela go kgobelela batswadi ba bona dithoto, eupša ke batswadi bao ba swanetšego go kgobelela bana ba bona dithoto."

¹³Ge e le nna ke tla ikgafa ka lethabo kudu gomme ka gafiwa ka mo go feletšego bakeng sa meoya ya lena. Ge e ba ke le rata kudu, na nna ke swanetše go ratwa go se nene?"

¹⁴Eupša le ge go ka ba bjalo, ga se ka ka ka le imetša. Lega go le bjalo, le re ke be ke le “moradia” gomme ka le swara “ka bohwirihwiri.”"

¹⁵Na ke ile ka ikhola ka lena ka motho le ge e le ofe wa bao ke ilego ka ba roma go lena?"

¹⁶Ke ile ka opeletša Tito gomme ka mo roma le ngwanabo rena. Na Tito o ile a ka a ikhola ka lena? Na ga se ra sepela ka moya o swanago? Na ga se ra gata ka tsela e swanago?"

¹⁷Na nakong ye ka moka le be le dutše le nagana gore re be re itwela go lena? Re bolela pele ga Modimo re le balatedi ba Kriste. Eupša baratiwa, sohle se re se dirago ke gore re le age."

¹⁸Gobane ke boifa gore ka tsela e itšego ge ke fihla, nka le hwetša le se kamoo ke bego nka rata ka gona gomme nna ke se kamoo le bego le ka rata ka gona, eupša go e na le moo gwa ba le tshele, lehufa, dikgalefo, dikarogano, go senyana maina, masebo, ba bangwe bao ba ikgogomošago le tlhakatlhakano."

¹⁹Mohlomongwe ge ke etla gape, Modimo wa ka a ka nkokobetša pele ga lena gomme ka swanelwa ke go llela ba bantši bao pele ba kilego ba dira sebe, fela ba se ke ba itsholela go se hlweke ga bona, bootswa le boitshwaro bjo bo hlephilego bjo ba ilego ba tlwaela go bo dira."

²⁰Le ke lekga la boraro ke etla go lena. “Taba e nngwe le e nngwe e swanetše go tiišwa ka molomo wa dihlatse tše pedi goba tše tharo.”"

²¹Gaešita le ge ke se gona ga bjale, go bjalo ka ge eka ke gona ka lekga la bobedi gomme ke bušeletša temošo ya ka go bao ba ilego ba dira sebe pele le ba bangwe ka moka, gore ge e ba nka tla gape nka se ba babalele,"

²²ka ge le nyaka bohlatse bja ge Kriste a bolela ka nna, yena Kriste yo a sa fokolego go lena eupša e le yo matla gare ga lena."

²³Ruri ke therešo gore o ile a kokotelwa koteng a se na matla, eupša o a phela ka baka la matla a Modimo. Le gona ke therešo gore re fokola le yena, eupša re tla phela gotee le yena ka baka la matla a Modimo go lena."

²⁴Dulang le itekola go bona ge e ba le sa le tumelong, dulang le itlhatsela seo lena ka noši le lego sona. Goba na ga le tsebe gore Jesu Kriste o boteeng le lena? Ka ntle le ge le sa amogelege."

²⁵Ruri ke holofela gore le tla lemoga gore ga re bao ba sa amogelegego."

²⁶Bjale re rapela Modimo gore le se ke la dira selo sa phošo, e sego gore rena re bonagale re amogelega eupša gore le dire botse, le ge rena re ka bonagala re sa amogelege."

²⁷Gobane re ka se dire selo ka go lwantšhana le therešo eupša re ka se dira feela ka go lwela therešo."

²⁸Ka kgonthe re a thaba neng le neng ge re fokola eupša lena le le matla; gomme re rapelela se, gore le bušetšwe tseleng."

²⁹Ke ka baka leo ke ngwalago dilo tše ge ke se gona, gore ge ke le gona ke se ke ka dira dilo ka bogale ke diriša bolaodi bjo Morena a mphilego bjona gore ke age e sego go phušola."

³⁰Sa mafelelo bana bešo, tšwelang pele le thaba, le bušetšwa tseleng, le homotšega, le nagana ka go dumelelana, le phela ka khutšo; Modimo wa lerato le khutšo o tla ba le lena."

³¹Dumedišanang ka katlo e kgethwa."

³²Bakgethwa ka moka ba a le dumediša."

³³Botho bjo bogolo bja Morena Jesu Kriste le lerato la Modimo le go abelana moya o mokgethwa di be le lena ka moka."