Hezekiah's Passover

¹Gwa ba le lethabo le legolo Jerusalema, gobane Jerusalema go be go se gwa ka gwa ba le lethabo le legolo ka tsela ye go tloga mehleng ya Solomone morwa wa Dafida kgoši ya Isiraele."

²Mafelelong Balefi ba baperisita ba ema ba šegofatša setšhaba; mantšu a bona a kwewa, moo thapelo ya bona e ilego ya fihla bodulong bja gagwe bjo bokgethwa, magodimong."

³Gateetee ge ba feditše tše ka moka, Baisiraele ka moka bao ba bego ba le moo ba ile ba tšwa ba ya metseng ya Juda gomme ba pšhatlaganya dikokwane tše kgethwa, ba rema dikota tše kgethwa le go phušola mafelo a phagamego le dialetare tša Juda ka moka, Benjamini, Efuraime le Manase go fihlela ba feditše; ka morago ga moo bana ba Isiraele ka moka ba boela metseng ya bona, yo mongwe le yo mongwe a ya ga gabo."

⁴Ke moka Hesekia a bea dihlopha tša baperisita le tša Balefi go ya ka dihlopha tša bona, se sengwe le se sengwe go ya ka tirelo ya sona ya baperisita le ya Balefi. Di be di neela dibego tša go fišwa le dihlabelo tša mohlakanelwa, di hlankela, di leboga e bile di tumiša Modimo dikgorong tša mešaša ya Jehofa."

⁵Kgoši e be e na le karolo yeo e e neelago ya dibego tša go fišwa go tšwa dithotong tša yona, e le dibego tša go fišwa tšeo di neelwago mesong le mantšiboa gotee le dibego tša go fišwa tšeo di neelwago ka disabatha, dikgweding tše mpsha le dinakong tša menyanya, go ya ka seo se ngwadilwego molaong wa Jehofa."

⁶Go oketša moo, a botša batho, bona badudi ba Jerusalema, gore ba nee baperisita le Balefi karolo ya bona, e le gore ba kgomarele ka go tia molaong wa Jehofa."

⁷Gateetee ge lentšu le kwagetše, bana ba Isiraele ba ile ba oketša dithakangwaga tša mabele, beine e mpsha, makhura, dinose le ditšweletšwa ka moka tša mašemong, gomme ba tliša ka boati karolo ya lesome ya se sengwe le se sengwe."

⁸Bana ba Isiraele le ba Juda bao ba bego ba dula metseng ya Juda, le bona ba tliša karolo ya lesome ya dikgomo le ya dinku gotee le karolo ya lesome ya dilo tše kgethwa, e lego dilo tšeo di kgethagaleditšwego Jehofa Modimo wa bona. Ba di tliša gomme ya ba mekgobokgobo."

⁹Kgweding ya boraro ba ile ba thoma go kgobela mekgobo gomme ba fetša kgweding ya bošupa."

¹⁰Ge Hesekia le dikgošana ba etla gomme ba bona mekgobo yeo, ba reta Jehofa le setšhaba sa gagwe sa Isiraele."

¹¹Ka morago Hesekia o ile a botšiša baperisita le Balefi ka mekgobo yeo."

¹²Ke moka Asaria moperisita yo mogolo wa ntlong ya Tsadoko a mo araba a re: “Go tloga ge ba thoma go tliša meneelo ntlong ya Jehofa, go be go jewa, go khorwa e bile go eba le mašaledi a mantši; ka gobane Jehofa yena o šegofaditše setšhaba sa gagwe gomme tše di šetšego ke tšona tše tše dintši.”"

¹³Ge a re’alo Hesekia a laela gore go lokišwe diphapoši tša go jela tša ntlong ya Jehofa. Ke moka bona ba di lokiša."

¹⁴Ba tliša meneelo le karolo ya lesome gotee le dilo tše kgethwa, ba dira bjalo ka go botega; ge e le Konania wa Molefi o be a ba okametše e le yena moetapele gomme a latelwa ke Shimei ngwanabo."

¹⁵Jehiele, Asasia, Nahathe, Asahele, Jerimothe, Josabadi, Eliele, Isimakia, Mahathe le Benaya e be e le balaodi ba thušana le Konania le Shimei ngwanabo, ba laetšwe ke kgoši Hesekia, gomme Asaria e be e le moetapele ntlong ya Modimo wa therešo."

¹⁶Kore morwa wa Jimina wa Molefi e be e le moletakgoro ka bohlabela, a hlokometše dibego tša boithaopo tša Modimo wa therešo, gore go abje moneelo wa Jehofa le dilo tše kgethwakgethwa."

¹⁷Yena o be a okametše Edene, Miniamini, Jeshua, Shemaya, Amaria le Shekania bao ba bego ba le metseng ya baperisita, ba le maemong a bona ka ge ba botega; ba be ba abela bana babo bona bao ba lego dihlopheng seo se bego se ba swanetše, ba abela yo mogolo le yo monyenyane ka go lekana;"

¹⁸go sa balwe ba batona bao ba ngwadišitšwego go ya ka mašika go tloga ka ba nywaga e meraro go ya godimo, e lego bohle bao ba tlwaetšego go tla ntlong ya Jehofa letšatši le letšatši, gore ba tlo dira tirelo ya bona go ya ka dihlopha tša bona."

¹⁹Le ke lelokelelo la bao ba bego ba ngwadišitšwe la baperisita go ya ka mašika a dintlo tša botatago bona le la Balefi, go tloga ka ba nywaga e masomepedi go ya godimo, go ya ka mediro ya bona dihlopheng tša bona;"

²⁰e lego bao ba ngwadišitšwego go ya ka mašika mo go bana ba bona ka moka, basadi ba bona, barwa ba bona le barwedi ba bona, bakeng sa phuthego ka moka, ka gobane ge ba le maemong ao ba beilwego go ona ka ge ba botega, ba ile ba ikgethagaletša tirelo ya bona e kgethwa;"

²¹le lelokelelo la barwa ba Arone, bona baperisita, bao ba bego ba dula nageng ya mafulo a metse ya bona. Metseng ka moka go be go na le banna bao ba hlaotšwego ka maina gore ba abele monna yo mongwe le yo mongwe gare ga baperisita dijo gotee le Balefi bohle bao ba bego ba ngwadišitšwe go ya ka mašika."

²²Hesekia a dira bjalo Juda ka moka, a dira tše di lokilego le tše botse e bile a botegela Jehofa Modimo wa gagwe."

²³Modiro o mongwe le o mongwe wo a bego a thoma go o dira tirelong ya ntlong ya Modimo wa therešo le molaong gotee le taelong ge a tsoma Modimo wa gagwe, o be a o dira ka pelo ya gagwe ka moka gomme a atlega."

²⁴Ka morago ga dilo tše le go botega ga Hesekia, Sanheribe kgoši ya Asiria o ile a tla a šwahlela Juda gomme a hloma mešaša gore a hlasele metse e šireleditšwego, a nagana gore a e thope ka go e šwahlela."

²⁵Ge Hesekia a bona gore Sanheribe o tlile a itokišeditše go tlo lwa le Jerusalema,"

²⁶o ile a phetha le dikgošana tša gagwe le bagale ba gagwe gore ba thibe methopo ya meetse yeo e bego e le ka ntle ga motse; ka gona ba ile ba mo thuša."

²⁷Ka gona batho ba bantši ba kgobokana, ba ya ba thiba methopo ka moka ya meetse le mafula ao a elelago go phatša naga ka bogare, ba re: “Go re’ng dikgoši tša Asiria di swanetše gore ge di etla mo di hwetše meetse a mantši kudu?”"