Jehoshaphat's Reforms

¹Ke moka a re: “Theetšang, lena ka moka ba Juda le badudi ba Jerusalema gotee le wena Kgoši Jehoshafate! Se ke seo Jehofa a le boditšego sona: ‘Le se ke la boifa goba la tšhošwa ke lešaba le le legolo; gobane tlhabano ye ga se ya lena, eupša ke ya Modimo."

²Gosasa le theogeng le yo gahlana le bona ntweng. Šebale ba rotoga ka tsela ya Tsitse; le tla ba hwetša mafelelong a moedi wa mafula go lebana le lešoka la Jeruele."

³Go ka se nyakege gore le lwe mo lebakeng le. Itokišeng, emang pho gomme le bone ge Jehofa a le phološa. Wena Juda le Jerusalema, le se ke la boifa goba la tšhoga. Gosasa etšwang le yo gahlana le bona ntweng gomme Jehofa o tla ba le lena.’”"

⁴Gateetee Jehoshafate a inamišetša sefahlego sa gagwe fase gomme Juda ka moka le badudi ba Jerusalema ba wela fase pele ga Jehofa gore ba khunamele Jehofa."

⁵Balefi bao e lego barwa ba Bakohathe le barwa ba Bakora, ba ema gore ba tumiše Jehofa Modimo wa Isiraele ka lentšu la go hlaboša kudu."

⁶Ba tsoga ka masa gomme ba tšwa ba ya lešokeng la Thekoa. Ge ba etšwa, Jehoshafate a emelela a re: “Wena Juda le badudi ba Jerusalema, ntheetšeng! Ebang le tumelo go Jehofa Modimo wa lena e le gore le tle le phele lebaka le letelele. Ebang le tumelo go baporofeta ba gagwe e le gore le tle le fenye.”"

⁷Go oketša moo, a eletšana le setšhaba, a bea diopedi pele ga Jehofa, a ba a bea le bao ba neago ditumišo ba apere diaparo tše kgethwa nakong ya ge ba etšwa ba etile pele banna bao ba itlhamilego, ba re: “Tumišang Jehofa, gobane botho bja gagwe ke bja go iša mehleng ya neng le neng.”"

⁸Ya re ge ba thoma go goeletša ka lethabo e bile ba tumiša, Jehofa a bea banna gore ba lalele barwa ba Amoni, ba Moaba le ba dithabeng tša Seire bao ba bego ba etla Juda, ke moka ba itiana."

⁹Barwa ba Amoni le ba Moaba ba ema ba hlasela badudi ba dithabeng tša Seire gore ba ba fediše ba be ba ba fetše; gateetee ge ba fedišitše badudi ba Seire, ba ile ba bolayana seng sa bona."

¹⁰Ge e le Bajuda bona, ba ya serokamong sa lešokeng. Ge ba retološetša difahlego tša bona go lešaba lela, ba makala le le moo, ditopo tša lona di wetše fase go se le o tee yo a phonyokgilego."

¹¹Ka gona Jehoshafate le batho ba gagwe ba tla go ba hula gomme mo gare ga bona ba hwetša dithoto, diaparo le dilo tše bohlokwa ka boati; ba ba amoga tšona go fihlela ba se sa kgona go di rwala. Ba fetša matšatši a mararo ba hula dithebola, ka gobane e be e le tše dintši."