The Birth of Samuel

¹Mogadikane wa gagwe o be a mo dira seo ngwaga o mongwe le o mongwe, a dira seo ka mehla ge ba rotogela ntlong ya Jehofa. O be a mo ješa di sa welego, moo Hanna a bego a lla e bile a sa je."

²Elikana monna wa gagwe a re go yena: “Hanna o llela’ng, o reng o sa je, le gona o reng o nyamile? Na go wena ga ke phale barwa ba lesome?”"

³Hanna a ema ka morago ga ge ba jele e bile ba nwele kua Shilo, moperisita Eli yena o be a dutše sedulong seo se lego kgauswi le foreime ya lebati la tempele ya Jehofa."

⁴Hanna o be a kwele bohloko moyeng, a rapela Jehofa gomme a lla gabohloko."

⁵A ena a re: “Wena Jehofa wa madira, ge e ba o ka ela hloko tlaišego ya lekgoba la gago la mosadi gomme wa nkgopola, wa se le lebale, wa le nea ngwana wa mošemane, ke tla mo nea Jehofa bophelong bja gagwe ka moka le gona a ka se ke a beolwa hlogo ka legare.”"

⁶Eli o be a šeditše molomo wa Hanna ge a be a rapela nako e telele pele ga Jehofa."

⁷Hanna o be a rapelela ka pelong ya gagwe; melomo ya gagwe ke yona feela e bego e benyabenya, modumo wa lentšu la gagwe o sa kwale. Eli yena o be a nagana gore o tagilwe."

⁸Eli a re go yena: “O tla dula o tagilwe go fihla neng? Tlogela go nwa beine.”"

⁹Hanna a araba a re: “Aowa, mong wa ka! Nna ke mosadi yo a kwelego bohloko kudu; ga se ka nwa beine le bjala, eupša ke ntšhetša Jehofa sa mafahleng a ka."

¹⁰O se ke wa lebelela lekgoba la gago la mosadi le le bjalo ka mosadi yo a sa rego selo, ka gobane ke boledišwa ke matshwenyego a ka a mantši le tlaišego ya ka.”"

¹¹Ke moka Eli a re: “Sepela ka khutšo, eka Modimo wa Isiraele a ka go nea seo o mo kgopetšego sona.”"

¹²Ge a re’alo, Hanna a re: “Anke mohlanka wa gago wa mosadi a hwetše kgaugelo mahlong a gago.” Ka morago a sepela a yo ja, a se hlwe a bonagala a tshwenyegile."

¹³Ba tsoga e sa le ka masa ba khunamela Jehofa, ka morago ga moo ba boela ntlong kua Rama. Elikana a robala le Hanna mosadi wa gagwe, ke moka Jehofa a gopola Hanna."

¹⁴Ge ngwaga o eya swiswing Hanna a ima a belega morwa a mo rea leina la Samuele, a re ke ka gobane, “ke mo kgopetše go Jehofa.”"

¹⁵Elikana a rotoga a na le lapa la gagwe ka moka go yo direla Jehofa sehlabelo, e lego sehlabelo sa ngwaga le ngwaga, a dira le sebego sa keno ya gagwe."

¹⁶Hanna yena ga se a rotoga, ka ge a ile a re go monna wa gagwe: “Gateetee ge mošemane a tshwele letswele, ke tla tla le yena, a tle pele ga Jehofa gomme a dule moo go iša mehleng ya neng le neng.”"

¹⁷Ge a re’alo Elikana monna wa gagwe a re go yena: “Dira seo o bonago se lokile mahlong a gago. Dula ka gae go fihlela o mo tshweša letswele. Anke Jehofa yena a phethagatše lentšu la gagwe.” Ke moka Hanna a dula ka gae a nyantšha morwa wa gagwe go fihlela ge a mo tshweša letswele."

¹⁸Gateetee ge a mo tshwešitše letswele a rotoga a tla le yena a na le poo ya nywaga e meraro le seroto sa bupi gotee le sebjana se segolo seo se tletšego beine gomme a tsena ntlong ya Jehofa kua Shilo. Mošemane o be a na le yena."

¹⁹Ba hlaba poo gomme ba tliša mošemane go Eli."

²⁰Hanna a re: “Ntshwarele hle mong wa ka! Ke ikana pele ga gago mong wa ka ke re, ke nna mosadi yola a bego a eme pele ga gago gona mo ke rapela Jehofa."

²¹Thapelo ya ka e be e le ya go kgopela mošemane yo gomme Jehofa o mphile seo ke mo kgopetšego sona."

²²Nna ke mo nea Jehofa. Ke yena yo a gafetšwego Jehofa matšatši ka moka a bophelo bja gagwe. Elikana a inama moo pele ga Jehofa.”"

²³Hanna a rapela a re: “Pelo ya ka e thabišwa ke Jehofa, Jehofa o nneile matla. Molomo wa ka o bulegile gore ke tsebe go araba manaba a ka, Ke thabela go phološwa ke wena."

²⁴Ga go yo mokgethwa go swana le Jehofa, ga go yo mongwe ge e se wena; Ga go leswika leo le etšago Modimo wa rena."

²⁵Le se ke la bolela ka go ikgogomoša kudu, Le se ke la bolela le sa nagane, Ka gobane Jehofa ke Modimo yo a tsebago tšohle, O lekanya mediro yohle ka go loka."

²⁶Bagale bao ba swerego bora ba a tšhoga, Eupša bao ba kgopšago ba ba le matla."

²⁷Bao ba kgotsofetšego ba tla šoma gore ba hwetše senkgwa, Bao ba swerwego ke tlala e ka se sa ba swara. Mosadi wa moopa o belege bana ba šupago, Yo a bego a na le bana ba bantši ga a sa tlo ba le bona."

²⁸Jehofa o kgona go bolaya le go phološa bophelo, O kgona go iša motho Bodulabahu, le go mo ntšha go bjona."