God Appears to Solomon Again

¹Morwedi wa Farao a tšwa Motseng wa Dafida a ya ntlong ya gagwe yeo Solomone a mo agetšego yona. Ya ba gona Solomone a agago Mmoto."

²Gararo ka ngwaga Solomone a neela dihlabelo tša go fišwa le dihlabelo tša mohlakanelwa godimo ga aletare yeo a e agetšego Jehofa, gomme gona moo aletareng yeo e bego e le pele ga Jehofa go be go thuntšhwa muši wa dihlabelo; ke moka a fetša ntlo yeo."

³Go be go na le sehlopha sa dikepe tšeo Kgoši Solomone a bego a di dirile kua Etsione-gebere kgauswi le Elothe yeo e bego e le lešing la Lewatle le Lehwibidu nageng ya Edomo."

⁴Hirama a romela bahlanka ba gagwe ka sehlopha seo sa dikepe, a romela le basesiši bao ba bego ba tseba lewatle gotee le bahlanka ba Solomone."

⁵Ba ya kua Ofira gomme gona moo ba tšea ditalente tše makgolonne-masomepedi (420) tša gauta ba di tliša go Kgoši Solomone."

⁶Bjale kgošigadi ya kua Sheba e ile ya kwa pego ya mabapi le Solomone yeo e sepedišanago le leina la Jehofa. Ke moka ya tla go tlo mo leka ka dipotšišo tše di tlabago."

⁷Ya tla Jerusalema e sepela le molokeloke o motelele wa batho le dikamela tše di bego di rwele makhura a bitšwago balesamo, gauta e ntši kudu le maswika a bohlokwa; ya fihla go Solomone ya bolela le yena ka tšohle tšeo di bego di le ka pelong ya yona."

⁸Solomone yena a e araba dipotšišo tša yona ka moka. Ga go taba le ge e le efe e thata yeo kgoši e ilego ya se e hlathollele yona."

⁹Ge kgošigadi ya kua Sheba e bona bohlale ka moka bja Solomone le ntlo yeo a e agilego,"

¹⁰dijo tša tafoleng ya gagwe, kamoo bahlanka ba gagwe ba bego ba dula ka gona tafoleng ya go jela, mokgwa wo bao ba mo solelago ba bego ba šoma ka gona le diaparo tša bona, dino tša gagwe gotee le dihlabelo tša gagwe tša go fišwa tšeo a bego a di dira ka mehla ntlong ya Jehofa, ya šala e ahlame."

¹¹Ke moka ya re go kgoši: “Lentšu leo ke le kwelego nageng ya ka ka ditaba tša gago le bohlale bja gago, ke la therešo."

¹²Ga se ka ka ka dumela mantšu ao go fihlela ke tlile gore ke iponele ka mahlo a ka; gomme tseba gore ke be ke se ka botšwa le seripa sa tšona. Bohlale bja gago le katlego ya gago di feta kgole dilo tšeo ke di kwelego."

¹³Go thaba setšhaba sa gago; go thaba bahlanka ba ba gago bao ba emago pele ga gago ka mehla gomme ba theetša bohlale bja gago!"

¹⁴Anke Jehofa Modimo wa gago a retwe, yena yo a go ratilego ka gore a go bee sedulong sa bogoši sa Isiraele; gobane Jehofa o rata Isiraele go iša mehleng ya neng le neng, moo a go beilego go ba kgoši gore o e ahlolele o be o e sware ka toko.”"

¹⁵Ke moka ya nea kgoši ditalente tše lekgolo-masomepedi (120) tša gauta, makhura a mantšintši a bitšwago balesamo le maswika a bohlokwa. Le ka mohla ga se gwa ka gwa ba le makhura a mantši ka tsela yeo a balesamo ao a lekanago le ao kgošigadi ya kua Sheba e a neilego Kgoši Solomone."

¹⁶Sehlopha sa dikepe tša Hirama tšeo di bego di rwele gauta go tšwa Ofira, di ile tša tliša le dikota tše dintšintši tša dihlare tša merekure le maswika a bohlokwa go tšwa Ofira."

¹⁷Kgoši ya tšea dikota tšeo tša merekure ya dira dithekgo tša ntlo ya Jehofa le tša ntlo ya kgoši, ya dira le diharepa le dikwadi tša diopedi. Dikota tša dihlare tša merekure tše di lekanago le tšeo ka bontši ga se tša ka tša ba gona nageng yeo goba tša bonwa go fihla lehono le."

¹⁸Kgoši Solomone yena a nea kgošigadi ya kua Sheba tšohle tšeo e di ratago tšeo e di kgopetšego, go sa balwe tšeo yena Kgoši Solomone a mo neilego tšona ka seatla sa gagwe se se bulegilego. Ka morago ga moo ya boela morago nageng ya yona, yona gotee le bahlanka ba yona."

¹⁹Boima bja gauta yeo e tlišitšwego go Solomone ka ngwaga o tee ya ba bja ditalente tše makgolotshela-masometshela-tshela (666) tša gauta,"

²⁰go sa akaretšwe dithoto tšeo di tšwago go banna ba basepedi le lešokotšo la barekiši gotee le tše di bego di tlišwa ke dikgoši ka moka tša Maarabia le babuši ba naga."

²¹Kgoši Solomone a dira dikotse tše kgolo tše makgolopedi tša gauta e tswakilwego (kotse e nngwe le e nngwe e kgolo a e manega ka gauta ya dishekele tše makgolotshela),"

²²a dira le dikotsana tše makgolotharo tša gauta e tswakilwego (kotsana e nngwe le e nngwe a e manega ka gauta e tswakilwego ya dimina tše tharo). Ke moka kgoši ya di bea Ntlong ya Sethokgweng sa Libanoni."

²³Kgoši ya dira le sedulo sa bogoši se segolo ka lenaka la tlou gomme ya se manega ka gauta e sekišitšwego."

²⁴Go be go na le manamelo a tshelelago a go ya sedulong sa bogoši, gomme sedulo seo se be se na le sešireletšo ka godimo ga sona; se be se na le matsogwana ka mahlakoreng ka bobedi kgauswi le mo go dulwago gona, e bile go be go eme diswantšho tša ditau tše pedi hleng ga matsogwana ao."

²⁵Go be go na le diswantšho tša ditau tše lesomepedi di eme ka mahlakoreng ka bobedi a manamelo ao a tshelelago. Go be go se mmušo wo o bego o na le sedulo sa go dirwa go etša sona."

²⁶Dinwelo ka moka tša Kgoši Solomone e be e le tša gauta, le dibjana ka moka tša Ntlong ya Sethokgweng sa Libanoni e be e le tša gauta e sekilego. Go be go se na selo sa silifera; yona mehleng ya Solomone e be e tšewa e se selo."

²⁷Kgoši e be e na le sehlopha sa dikepe tša Tarashishi lewatleng tšeo di bego di sepela le sehlopha sa dikepe tša Hirama. Gatee nywageng e mengwe le e mengwe e meraro, sehlopha sa dikepe tša Tarashishi se be se etla se rwele gauta, silifera, lenaka la tlou, dikgabo le diphikoko."

²⁸Ka go re’alo Kgoši Solomone o be a feta dikgoši tše dingwe ka moka tša lefaseng ka mahumo le ka bohlale."