David's Charge; Solomon Established

¹Bjale ke ikana ka Jehofa yo a phelago, yoo a ntlhomilego ka go tia, yoo a mpeilego mo sedulong sa bogoši sa Dafida tate le yoo a nkagetšego ntlo feela bjalo ka ge a boletše, ke ikana gore lehono Adonija o tlo bolawa.”"

²Gateetee Kgoši Solomone a romela lentšu ka Benaya morwa wa Jehoyada; ke moka a mo hlasela gomme a hwa."

³Kgoši ya bolela le moperisita Abiathara ya re: “Eya Anathothe mašemong a gago! Gobane wena o swanelwa ke lehu; eupša nka se go bolaye lehono, ka gobane o ile wa rwala areka ya Mmuši Morena Jehofa mehleng ya Dafida tate, le ka gobane o ile wa tlaišega nakong ka moka ya ge tate a be a tlaišega.”"

⁴Ka gona Solomone a raka Abiathara gore a se sa hlankela e le moperisita wa Jehofa, e le gore a phethagatše lentšu leo Jehofa a bego a le boletše ka ba ntlo ya Eli kua Shilo."

⁵Pego yeo ya tla go Joaba—gobane Joaba o be a rata go latela Adonija, le ge a be a sa rate go latela Abesalomo—gomme Joaba a tšhabela ka tenteng ya Jehofa a swara manaka a aletare."

⁶Ke moka Kgoši Solomone a botšwa gore: “Joaba o tšhabetše tenteng ya Jehofa gomme o eme hleng ga aletare.” Solomone a romela Benaya morwa wa Jehoyada, a re: “Eya o mo hlasele!”"

⁷Ka gona Benaya a tla tenteng ya Jehofa a bolela le Joaba a re: “Se ke seo kgoši e se boletšego: ‘Etšwa ka moo!’” Eupša yena a re: “Nka se tšwe! Ka gobane ke tlo hwela mo.” Ge a re’alo Benaya a tliša lentšu go kgoši a re: “Joaba o mpoditše se le se, le gona o nkarabile ka gore le ka gore.”"

⁸Ka gona kgoši ya re go yena: “Dira feela bjalo ka ge a boletše gomme o mo hlasele; o mmoloke ke moka madi ao Joaba a a tšholotšego e se ka tshwanelo, o a tloše pele ga ka le pele ga ba ntlo ya tate."

⁹Jehofa o tla lefetša madi a gagwe godimo ga hlogo ya gagwe, ka gobane o ile a hlasela banna ba babedi bao ba bego ba lokile e bile ba le kaone go mo feta, o ba bolaile ka tšhoša Dafida tate a sa tsebe. Bona ke Abenere morwa wa Nere molaodi wa madira a Isiraele le Amasa morwa wa Jethere molaodi wa madira a Juda."

¹⁰Madi a bona a boele hlogong ya Joaba le hlogong ya bana ba gagwe go iša mehleng ya neng le neng; eupša go Dafida, bana ba gagwe, ba ntlo ya gagwe le sedulong sa gagwe sa bogoši, go tla ba le khutšo e tšwago go Jehofa go iša mehleng ya neng le neng.”"

¹¹Ke moka Benaya morwa wa Jehoyada a rotoga a mo hlasela a ba a mmolaya; a bolokwa ntlong ya gagwe lešokeng."

¹²Ka baka leo kgoši ya bea Benaya morwa wa Jehoyada legatong la gagwe gore a okamele madira; ke moka kgoši ya bea moperisita Tsadoko legatong la Abiathara."

¹³Mafelelong kgoši ya romela lentšu gore go bitšwe Shimei, ya re go yena: “Ikagele ntlo Jerusalema gomme o dule gona, le gona o se ke wa tšwa gona wa ya kua le kua."

¹⁴Letšatšing leo o ka tšwago gomme wa feta moeding wa mafula wa Kidirone, gona o tsebe gore o tlo hwa. O tla ba le molato wa madi hlogong ya gago.”"

¹⁵Ge kgoši e re’alo Shimei a re: “Lentšu leo le a kwagala. Nna mohlanka wa gago ke tla dira ka mokgwa wo wena kgoši mong wa ka o boletšego ka gona.” Shimei a dula Jerusalema nako e telele."

¹⁶Bofelong bja nywaga e meraro makgoba a mabedi a Shimei a tšhabela go Akishe morwa wa Maaka kgoši ya Gathe; batho ba botša Shimei gore: “Tseba gore makgoba a gago a ile kua Gathe.”"

¹⁷Gateetee Shimei a ema a rweša pokolo ya gagwe sala gomme a ya Gathe go Akishe go yo nyaka makgoba a gagwe; ka morago ga moo Shimei a boa le makgoba a gagwe go tšwa Gathe. 41"

¹⁸Solomone a botšwa gore: “Shimei o tšwile mo Jerusalema a ya Gathe gomme o boile.”"

¹⁹Ge kgoši e ekwa seo ya romela lentšu la gore Shimei a bitšwe, gomme ya re go yena: “Na ga se ka go eniša ka Jehofa gore ke go lemoše, ka re: ‘Letšatšing leo o ka tšwago wa ya kua le kua o tsebe gore o tlo hwa,’ gomme na wena ga se wa re: ‘Lentšu leo ke le kwelego le a kwagala’?"

²⁰Bjale go re’ng o tshetše keno ya Jehofa le taelo yeo ke go laetšego yona?”"

²¹Kgoši ya iša pele ya re go Shimei: “Wena ka pelong ya gago o tseba gabotse mahloko ka moka ao o a baketšego Dafida tate; ka gona hlogong ya gago Jehofa o tla lefeletša mahloko ao o a dirilego."

²²Eupša nna Kgoši Solomone ke tla šegofatšwa gomme sedulo sa bogoši sa Dafida se tla thewa sa tia pele ga Jehofa ka mo go sa felego.”"

²³Ka go re’alo kgoši ya laela Benaya morwa wa Jehoyada, yoo a ilego a napa a tšwa a yo mo hlasela gomme a mmolaya. Mmušo wa thewa ka go tia seatleng sa Solomone."

²⁴Solomone a nyalelana le Farao kgoši ya Egipita gomme a tšea morwedi wa Farao a mo tliša Motseng wa Dafida, go fihlela a feditše go aga ntlo ya gagwe le ntlo ya Jehofa gotee le morako wa Jerusalema ka gohle."

²⁵Eupša batho ba be ba direla dihlabelo mafelong a phagamego, ka gobane go ba go fihla mehleng yeo, go be go se gwa agwa ntlo ya go bitšwa ka leina la Jehofa."

²⁶Solomone a rata Jehofa ka go sepela ka melao ya Dafida tatagwe. Eupša ka mehla o be a dira dihlabelo le go thuntšha muši wa dibego mafelong a phagamego."

²⁷Kgoši ya ya Gibeoni go yo dira dihlabelo moo, ka gobane leo e be e le lefelo le le tumilego leo le phagamego. Solomone a dira dihlabelo tša go fišwa tše sekete (1 000) aletareng yeo."

²⁸Gona moo Gibeoni Jehofa a iponagatša go Solomone ka toro bošego; Modimo a re: “Nkgopele seo o nyakago ke go nea sona.”"

²⁹Ke moka Solomone a re: “Wena o bontšhitše Dafida tate mohlanka wa gago botho bjo bogolo ka ge a be a sepela pele ga gago ka therešo, ka toko le ka pelo e lokilego; wa mmontšha botho bjo, moo o ilego wa mo nea morwa gore a dule sedulong sa gagwe sa bogoši go ba go fihla le lehono."

³⁰Bjale wena Jehofa Modimo wa ka, o beile nna mohlanka wa gago gore ke be kgoši legatong la Dafida tate, gomme ke fo ba mošemanyana. Ga ke tsebe go tšwa le go tsena."

³¹Nna mohlanka wa gago ke gare ga setšhaba seo o se kgethilego, sona setšhaba se sentšintši seo se sa balegego goba seo go ka se tsebjego palo ya sona."

³²O nee nna mohlanka wa gago pelo yeo e kwago gore ke ahlole setšhaba sa gago, ke lemoge se se lokilego le se sebe; ka gobane ke mang yo a ka kgonago go ahlola setšhaba se sa gago se thata?”"

³³Seo se be se kgahliša mahlong a Jehofa, ka ge Solomone a kgopetše seo."

³⁴Modimo a re go yena: “Ka ge o kgopetše seo gomme o sa ikgopelela matšatši a mantši goba wa ikgopelela mahumo goba wa ikgopelela meoya ya manaba a gago, eupša wa ikgopelela kwešišo ya go kwa ditaba tša boahlodi,"

³⁵gona tseba gore ke tla dira ka go dumelelana le mantšu a gago. Tseba gore ke tla go nea pelo e bohlale le ya kwešišo, moo e lego gore pele ga gago go tla be go se gwa ka gwa ba le yo a swanago le wena e bile le ka morago ga gago go ka se be le yo a tlago go swana le wena."

³⁶Le gona ke tla go nea le tšeo o sa kago wa di kgopela, e lego mahumo le letago, moo e lego gore gare ga dikgoši go ka se be le yeo e swanago le wena, mehleng ka moka ya ge o sa phela."

³⁷Le gona ge e ba o ka sepela ditseleng tša ka ka go lota ditaelo tša ka le melao ya ka, feela bjalo ka ge Dafida tatago a sepetše, gona ke tla go atišetša le matšatši.”"

³⁸Ge Solomone a phafoga, a lemoga gore seo e be e le toro. Ke moka a tla Jerusalema, a ema pele ga areka ya kgwerano ya Jehofa, a dira dihlabelo tša go fišwa, a neela dibego tša mohlakanelwa a ba a direla bahlanka ba gagwe ka moka monyanya."

³⁹Ka nako yeo, basadi ba babedi ba bagweba-ka-mmele ba ile ba tsena moo kgoši e lego gona gomme ba ema pele ga yona."

⁴⁰Ke moka yo mongwe wa basadi bao a re: “Tshwarelo hle mong wa ka, nna le mosadi yo re dula ka ntlong e tee, moo ke ilego ka belegela kgauswi le yena ka ntlong."

⁴¹Letšatšing la boraro la ge nna ke belege, mosadi yo le yena o ile a belega. Re be re le gotee. Re be re se na motho yo mongwe ka ntlong, go se na motho ge e se rena ba babedi ka ntlong."

⁴²Ka morago morwa wa mosadi yo bošego a hwa, ka gobane o ile a robala godimo ga gagwe."

⁴³Ka gona a tsoga gare ga bošego a tšea morwa wa ka hleng ga ka mola nna lekgoba la gago ke be ke robetše, ke moka a mo robatša sehubeng sa gagwe gomme morwa wa gagwe yo a hwilego a mo robatša sehubeng sa ka."

⁴⁴Mesong ge ke tsoga gore ke amuše morwa wa ka, ke ile ka hwetša a hwile. Ka gona mesong yeo ke ile ka mo hlahlobišiša gomme ka hwetša gore ga se morwa wa ka yo ke mmelegego.”"

⁴⁵Eupša mosadi yola yo mongwe a re: “Aowa, morwa wa ka ke yo a phelago gomme wa gago ke yo a hwilego!” Nakong yeo ka moka mosadi yo mongwe o be a re: “Aowa, morwa wa gago ke yo a hwilego gomme morwa wa ka ke yo a phelago.” Ba be ba ngangišana pele ga kgoši."

⁴⁶Mafelelong kgoši ya re: “Yo mongwe o re: ‘Morwa wa ka ke yo a phelago gomme morwa wa gago ke yo a hwilego!’ Yo mongwe le yena o re: ‘Aowa, morwa wa gago ke yo a hwilego gomme morwa wa ka ke yo a phelago!’”"