Elijah at Horeb

¹‘Silifera ya gago le gauta ya gago ke tša ka, le gona basadi ba gago ba babotse le bana ba gago ba babotse ke ba ka.’”"

²Ge a re’alo kgoši ya Isiraele ya re: “Bjalo ka ge o boletše kgoši mong wa ka, nna ke wa gago le tšohle tše e lego tša ka.”"

³Ka morago baromiwa ba boa gomme ba re: “Se ke seo Bene-hadada a se boletšego: ‘Ke go rometše molaetša ka re: “Wena o tla nnea silifera ya gago, gauta ya gago, basadi ba gago le bana ba gago."

⁴Eupša gosasa ke tla romela bahlanka ba ka go wena ka yona nako ye, gomme ba tla putuka ntlo ya gago le dintlo tša bahlanka ba gago; ke moka selo le ge e le sefe seo se rategago mahlong a gago ba tla se tšea ka diatla tša bona ba tloga le sona.”’”"

⁵Ge ba re’alo kgoši ya Isiraele ya bitša banna ka moka ba bagolo ba naga ya re: “Hle hlokomelang gomme le bone gore monna yo o nyaka go tliša bošula; gobane o rometše lentšu la gore o nyaka basadi ba ka, bana ba ka, silifera ya ka le gauta ya ka, gomme nna ga ka mo gana ka tšona.”"

⁶Ke moka banna bohle ba bagolo le setšhaba ka moka ba re go yena: “O se ke wa mo kwa e bile o se ke wa dumela.”"

⁷Ka gona a botša baromiwa ba Bene-hadada a re: “Botšang kgoši mong wa ka gore: ‘Tšohle tšeo o di boditšego nna mohlanka wa gago ka lekga la pele, ke tla di dira; eupša se o mpotšago sona ga bjale nka se kgone go se dira.’” Ge a re’alo baromiwa bao ba tloga ba iša karabo yeo go yena."

⁸Bjale Bene-hadada a romela molaetša go yena a re: “Anke medimo e ntire kamoo e ratago e be e oketše go seo, ge e ba lerole la Samaria le ka tlala ka seatleng sa yo mongwe le yo mongwe wa batho bao ba ntatelago!”"

⁹Kgoši ya Isiraele ya buša ya mo araba ya re: “Bolelang le yena le re: ‘Pele ntwa e thoma, o se ithete bjalo ka ge eka o šetše o e fentše.’”"

¹⁰Ya re gateetee ge a ekwa lentšu leo, ge yena le dikgoši tše dingwe ba be ba enwa bjala mešašeng, kapejana a re go bahlanka ba gagwe: “Itokišeng!” Ke moka ba itokišeletša go lwa le motse."

¹¹Bjale moporofeta yo mongwe a tla go Ahaba kgoši ya Isiraele a re: “Se ke seo Jehofa a se boletšego: ‘Na o bone lešaba leo ka moka le legolo? Ke le gafela seatleng sa gago lehono, gomme o tla tseba gore ke nna Jehofa.’”"

¹²Ke moka Ahaba a re: “Yena o tla dira seo ka mang?” Moporofeta a re: “Se ke seo Jehofa a se boletšego: ‘O tla dira seo ka masogana a kgošana ya dilete.’” Mafelelong Ahaba a re: “Ke mang yo a tlago go thoma ntwa?” Moporofeta a re: “Ke wena!”"

¹³Ahaba a bala masogana a kgošana ya dilete gomme palo ya bona ya ba ba makgolopedi-masometharo-pedi (232); ge a fetša ka bona a bala madira ka moka, ona madira ka moka a bana ba Isiraele, ya ba a dikete tše šupago (7 000)."

¹⁴Ke moka a tšwa e le mosegare nakong ya ge Bene-hadada a be a enwa gore a tagwe kua mešašeng, yena gotee le dikgoši tše dingwe tše masometharo-pedi tšeo di bego di mo thuša."

¹⁵Ge masogana a kgošana ya dilete a etla, gateetee Bene-hadada a romela ba bangwe ba banna ba gagwe; ke moka ba tla ba mmotša gore: “Go na le banna ba ba tlilego go tšwa Samaria.”"

¹⁶Ge ba re’alo a re go bona: “Go sa šetšwe gore ba tla ka khutšo, le ba swareng ba sa phela; le gona go sa šetšwe gore ba tla ka ntwa, le ba swareng ba sa phela.”"

¹⁷Bao ba bego ba tšwile motseng e be e le masogana a kgošana ya dilete le madira ao a bego a ba šetše ka morago."

¹⁸Ka gona yo mongwe le yo mongwe a bolaya motho yo a bego a elwa le yena; ke moka Basiria ba tšhaba, Baisiraele ba ba rakediša, eupša Bene-hadada kgoši ya Siria a phonyokga a nametše pere a na le banamedi ba dipere."

¹⁹Eupša kgoši ya Isiraele ya tšwa ya yo bolaya dipere le go wiša dikoloi, ya bolaya Basiria ka bontši."

²⁰Ka morago moporofeta a batamela kgoši ya Isiraele a re: “Sepela o yo imatlafatša o be o naganišiše ka seo o tlago go se dira; ka gobane mathomong a ngwaga, kgoši ya Siria e tla rotoga gore e tlo lwa le wena.”"

²¹Ge e le bahlanka ba kgoši ya Siria ba re go yona: “Modimo wa bona ke Modimo wa dithaba. Ke ka baka leo ba bego ba le matla go re feta. Ka gona a re lweng le bona mo e lego molala gomme re bone ge re ka se ba fenye."