The Man of God from Judah

¹A wela tsela. Ka morago tau ya mo hwetša tseleng ya mmolaya gomme setopo sa gagwe sa rapalala tseleng. Pokolo le tau di be di eme hleng ga setopo seo."

²Bjale go be go na le batho bao ba bego ba feta ka tsela, gomme ba ile ba bona setopo se rapaletše tseleng gomme tau e eme hleng ga sona. Ke moka ba tla ba bolela ka taba yeo motseng woo moporofeta yo a tšofetšego a bego a dula go wona."

³Ge moporofeta yo a mo gomišitšego tseleng a ekwa ka seo, gateetee a re: “Monna yoo ke monna wa Modimo wa therešo yo a rabetšego taelong ya Jehofa; ka gona Jehofa o mo gafetše tau gore e mo gagoganye e mmolaye, ka go dumelelana le lentšu leo Jehofa a mmoditšego lona.”"

⁴Ka gona a re go barwa ba gagwe: “Rwešang pokolo ya ka sala.” Ke moka ba e rweša."

⁵A tsena tseleng gomme a hwetša setopo sa monna yoo se rapaletše tseleng, pokolo le tau di eme hleng ga sona. Tau e be e se ya ja setopo seo goba go gagoganya pokolo."

⁶Moporofeta yoo a rwala setopo sa monna wa Modimo wa therešo a se bea godimo ga pokolo a boela le sona morago. Ka go re’alo moporofeta yo a tšofetšego a tla motseng wa gabo go tlo mo llela le go mmoloka."

⁷Ke moka a boloka setopo sa monna yoo lebitleng la gagwe; ba mo llela ba re: “Joo, ngwanešo!”"

⁸Ya re ka morago ga ge a mmolokile a bolela le barwa ba gagwe a re: “Ge ke hwile le mpolokeng lebitleng leo monna wa Modimo wa therešo a bolokilwego go lona. Le beeng marapo a ka hleng ga a gagwe."

⁹Gobane lentšu leo a le laetšwego ke Jehofa la gore a goelele aletare ya Bethele le dintlo ka moka tša mafelong a phagamego a lego metseng ya Samaria, le tla phethagala.”"

¹⁰Ka morago ga dilo tše Jeroboama ga se a ka a tlogela tsela ya gagwe e mpe, eupša o ile a bea batho feela gore e be baperisita ba mafelong a phagamego. Motho le ge e le ofe yo a bego a kgahlwa ke seo o be a mo nea matla a boperisita, a re: “Anke e be yo mongwe wa baperisita ba mafelong a phagamego.”"

¹¹Selo seo e bile sebe sa ba lapa la Jeroboama seo se dirilego gore ba bolawe le go fedišwa mo nageng."

¹²Ka nako yeo Abija morwa wa Jeroboama a babja."

¹³Ka gona Jeroboama a re go mosadi wa gagwe: “Ema hle, o ikgakanye gore ba se tsebe gore o mosadi wa ka, ke moka o ye Shilo. Gona moo go na le moporofeta Ahija. Ke yena yoo a boletšego ka nna gore ke tla ba kgoši ya setšhaba se."

¹⁴O tšee dinkgwa tše lesome, senkgwa le legapa la dinose ka seatla sa gago gomme o ye go yena. Ke yena a tlago go go botša seo se tlago go diragalela mošemane yo.”"

¹⁵Ke moka mosadi wa Jeroboama a dira ka wona mokgwa woo. A ema a ya Shilo gomme a fihla ntlong ya Ahija. Bjale Ahija yena o be a sa bone, gobane mahlo a gagwe a be a swifetše ka baka la botšofadi."

¹⁶Jehofa yena o be a boditše Ahija gore: “Mosadi wa Jeroboama o etla gore a tle a go botšiše ka morwa wa gagwe; gobane morwa yoo o a babja. O bolele le yena ka gore le ka gore. E tla re ge a fihla, a be a šetše a ikgakantšhitše.”"

¹⁷Ya re gateetee ge Ahija a ekwa mošito wa dikgato tša gagwe ge a tsena mojako, a re go yena: “Tsena, wena mosadi wa Jeroboama. Ke ka baka la’ng o ikgakanya mola ke romilwe go wena ka molaetša o šoro?"

¹⁸Sepela o yo botša Jeroboama o re: ‘Se ke seo Jehofa Modimo wa Isiraele a se boletšego: “Ka baka la ge ke go emišitše gare ga setšhaba sa geno, gore ke go dire moetapele wa setšhaba sa ka sa Isiraele,"

¹⁹ka phamola mmušo go ba ntlo ya Dafida ka go nea wona, gomme wena wa se swane le Dafida mohlanka wa ka yo a ilego a lota ditaelo tša ka le go sepela ka morago ga ka ka pelo ya gagwe ka moka ka go dira feela se se lokilego mahlong a ka,"

²⁰eupša wa dira tše mpe go feta bohle bao ba bilego gona pele ga gago, wa ya wa itirela modimo o mongwe le medimo ya diswantšho e le gore o nkgopiše, ke moka nna wa ntahlela ka morago ga gago;"

²¹ka baka leo ke tliša bošula go ba ntlo ya Jeroboama, le gona mo go Jeroboama ke tla fediša monna yo mongwe le yo mongwe yo a se nago thušo le yo a hlokago mohola Isiraeleng; ke tla swiela ba ntlo ya Jeroboama go etša motho yo a tlošago boloko go fihlela a bo lahla."

²²Wa Jeroboama yo a tlago go hwela motseng o tla jewa ke dimpša; yo a tlago go hwela nageng o tla jewa ke dinonyana tša magodimong, ka gobane Jehofa o boletše seo.”’"

²³“Wena ema o boele ntlong ya gago. Ge o fihla motseng wa geno ngwana yoo o tlo hwa."

²⁴Baisiraele ka moka ba tla mo llela gomme ba mmoloka, ka gobane ke yena feela wa Jeroboama yo a tlago go bolokwa lebitleng; ka gobane Jehofa Modimo wa Isiraele o hweditše se sebotse go yena mo go ba ntlo ya Jeroboama."

²⁵Mo Isiraeleng Jehofa o tla itsošetša kgoši yeo e tlago go fediša ba ntlo ya Jeroboama ka letšatši leo le beilwego. Le gona o ka re’ng ge a ka dira seo gona bjale?"

²⁶Jehofa o tla otla Isiraele, feela bjalo ka ge lehlaka le akgaakgega ka meetseng; o tla tumola Baisiraele mo nageng ye e botse yeo a e neilego borakgolokhukhu ba bona, ke moka a ba gašanya go fihla ka mošola wa Noka, ka gobane ba dirile dikota tša bona tše kgethwa e le gore ba kgopiše Jehofa."

²⁷Le gona o tla lahla Isiraele ka baka la dibe tša Jeroboama tšeo a di dirilego le tšeo ka tšona a dirilego gore Isiraele e dire sebe.”"

²⁸Ka nako yeo mosadi wa Jeroboama a ema a sepela a fihla Thiritsa. Ge a batamela mojakong wa ntlo, mošemane yola a hwa."

²⁹Ka gona ba mmoloka, gomme Isiraele ka moka ya mo llela, gwa direga go ya ka lentšu la Jehofa leo a le boletšego ka mohlanka wa gagwe e lego moporofeta Ahija."

³⁰Ge e le ditaba ka moka tša Jeroboama, tša kamoo a ilego a lwa dintwa le kamoo a bušitšego ka gona, šidile di ngwadilwe pukung ya ditaba tša mehleng ya dikgoši tša Isiraele."

³¹Mehla yeo Jeroboama a bušitšego ka yona e bile nywaga e masomepedi-pedi, gomme ka morago ga moo a robala le borakgolokhukhu ba gagwe; ke moka Nadaba morwa wa gagwe a buša legatong la gagwe."

³²Ge e le Rehoboama morwa wa Solomone, e bile kgoši ya Juda. Rehoboama o be a na le nywaga e masomenne-tee ge a thoma go buša, gomme o bušitše Jerusalema ka nywaga e lesomešupa, wona motse woo Jehofa a bego a o kgethile go meloko ka moka ya Isiraele gore a bee leina la gagwe go wona. Leina la mmagwe e be e le Naema wa Moamoni."

³³Batho ba Juda ba dira tše mpe mahlong a Jehofa, moo ba ilego ba mo dira gore a hufege go feta kamoo borakgolokhukhu ba bona ba dirilego ka gona ka dibe tša bona tšeo ba di dirilego."

³⁴Le bona ba ikagela mafelo a phagamego, dikokwane tše kgethwa le dikota tše kgethwa mmotong o mongwe le o mongwe o phagamego le ka tlase ga sehlare se sengwe le se sengwe se setala."