The Kingdom Divided

¹‘Se ke seo Jehofa a se boletšego: “Le se ke la rotoga la yo lwa le bana babo lena, e lego bana ba Isiraele. Yo mongwe le yo mongwe a a boele gae, gobane selo se se diregile ka baka la ka.”’” Ka gona ba kwa lentšu la Jehofa gomme ba boela magaeng a bona ka go dumelelana le lentšu leo la Jehofa."

²Jeroboama a aga Shikeme kua dithabeng tša Efuraime a dula gona moo. Go tloga moo a yo aga Penuele."

³Jeroboama a ipotša ka pelong ya gagwe gore: “Bjale mmušo o tlo boela go ba ntlo ya Dafida."

⁴Ge e ba setšhaba se se tšwela pele se rotoga go yo neela dihlabelo ntlong ya Jehofa kua Jerusalema, gona dipelo tša setšhaba se di tlo boela go mong wa sona, e lego Rehoboama kgoši ya Juda; se tla mpolaya ke moka sa boela go Rehoboama kgoši ya Juda.”"

⁵Ka gona kgoši ya nyaka keletšo gomme ya dira dinamane tše pedi tša gauta ke moka ya re go setšhaba: “Taba ya gore le rotogele Jerusalema ke morwalo o mogolo go lena. Lena Baisiraele, Modimo wa lena šo, yena yo a le rotošitšego a le ntšha nageng ya Egipita.”"

⁶Ke moka ya bea e nngwe Bethele gomme e nngwe ya e bea Dani."

⁷Selo seo sa baka gore go dirwe sebe, gomme setšhaba sa sobelela go ba go fihla pele ga namane yeo e bego e le Dani."

⁸Kgoši ya dira ntlo mafelong a phagamego le go kgetha baperisita mo gare ga setšhaba ka kakaretšo, e lego bao e bego e se barwa ba Lefi."

⁹Jeroboama a dira monyanya ka kgwedi ya seswai letšatšing la lesomehlano la kgwedi yeo, ya ba monyanya wa go etša wo o bego o le Juda, e le gore a neele dibego aletareng yeo a e dirilego Bethele, gore a dire dihlabelo bakeng sa dinamane tšeo a di dirilego; kua Bethele a bea baperisita mafelong a phagamego ao a a dirilego."

¹⁰A neela dibego aletareng yeo a e dirilego Bethele, a di neela ka letšatši la lesomehlano la kgwedi ya seswai, e lego kgweding yeo a ikgethetšego yona; a direla bana ba Isiraele monyanya a ba a neela dibego aletareng yeo gore a thuntšhe muši wa dihlabelo."

¹¹Bjale go be go na le monna wa Modimo yo a tlogilego Juda a ya Bethele a laetšwe ke lentšu la Jehofa, a dira seo ge Jeroboama a be a eme kgauswi le aletare gore a thuntšhe muši wa dihlabelo."

¹²A goeletša aletare go ya kamoo lentšu la Jehofa le mo laetšego, a re: “Wena aletare, aletare, se ke seo Jehofa a se boletšego: ‘Bona! Go tlo belegwa morwa ntlong ya Dafida, yoo leina la gagwe e tlago go ba Josia! Yena o tla dira sehlabelo godimo ga gago ka baperisita ba mafelong a phagamego bao ba thuntšhetšago muši wa dihlabelo godimo ga gago, e bile o tla fišetša marapo a banna bao godimo ga gago.’”"

¹³Letšatšing leo a nea seka, a re: “Seka seo Jehofa a boletšego ka sona se se: Tseba gore aletare e tlo phatloga gomme melora e nago le makhura yeo e lego godimo ga yona ya tšhologa.”"

¹⁴Gateetee ge kgoši Jeroboama a ekwa lentšu leo la monna wa Modimo wa therešo leo a goeleditšego aletare ya kua Bethele ka lona, a otlolla seatla sa gagwe kapejana a lesa aletare gomme a re: “Mo swareng!” Seatla sa gagwe seo a bego a se otlolotše gore a mo sware sa omelela ka yona nako yeo, a se kgone go se bušetša morago."

¹⁵Aletare ya phatloga ke moka melora e nago le makhura ya tšhologa go yona go ya ka seka sona seo monna wa Modimo wa therešo a se neilego a laetšwe ke lentšu la Jehofa."

¹⁶Bjale kgoši ya bolela le monna wa Modimo wa therešo ya re: “Hle anke o kgopele Jehofa Modimo wa gago gore a nkgaugele gomme o nthapelele gore seatla sa ka se fodišwe.” Ge a re’alo monna wa Modimo wa therešo a mo kgopelela go Jehofa gore a mo gaugele, moo seatla sa kgoši se ilego sa fodišwa gomme sa swana le pele."

¹⁷Kgoši ya iša pele ya re go monna wa Modimo wa therešo: “A re ye ntlong ya ka o hwetše sa go ja gomme ke tla go nea mpho.”"

¹⁸Eupša monna wa Modimo wa therešo a re go kgoši: “Le ge o be o ka nnea seripa sa ntlo ya gago ke be nka se sepele le wena, ka ja senkgwa goba ka nwa meetse lefelong le."

¹⁹Gobane lentšu la Jehofa le ntaetše la re: ‘O se ke wa ja senkgwa goba wa nwa meetse, le gona o se ke wa boela morago ka tsela yeo o tlilego ka yona.’”"

²⁰A tšea ka tsela e nngwe gomme a se boele morago ka tsela yeo a tlilego Bethele ka yona."

²¹Moporofeta yo mongwe yo a tšofetšego o be a dula moo Bethele, ke moka barwa ba gagwe ba tla gomme ba mo laodišetša mediro ka moka yeo monna wa Modimo wa therešo a e dirilego letšatšing leo Bethele, ba mmotša le mantšu ao a a boditšego kgoši, ba a laodišetša tatago bona."

²²Ke moka tatago bona a re go bona: “Bjale o tšwile ka tsela efe?” Ka gona barwa ba gagwe ba mmontšha tsela yeo monna wa Modimo wa therešo yo a bego a etšwa Juda a tšwilego ka yona."

²³Bjale a re go barwa ba gagwe: “Rwešang pokolo ya ka sala.” Ba rweša pokolo yeo sala ke moka a e namela a tloga."

²⁴Ka gona a latela monna wa Modimo wa therešo gomme a mo hwetša a dutše ka tlase ga sehlare se segolo. Ke moka a re go yena: “Na o monna wa Modimo wa therešo yo a tšwago Juda?” Yena a re: “Ee, ke yena.”"

²⁵A iša pele a re go yena: “A re ye ntlong ya ka re yo ja senkgwa.”"

²⁶Eupša yena a re: “Nka se boele le wena morago goba go tsena ntlong ya gago, le gona nka se je senkgwa goba ka nwa meetse le wena lefelong le."

²⁷Gobane lentšu la Jehofa le boletše le nna la re: ‘O se ke wa ja senkgwa goba wa nwa meetse moo. O se ke wa boela morago ka tsela yeo o tlilego ka yona.’”"

²⁸Ge a re’alo a re go yena: “Le nna ke moporofeta go swana le wena, gomme morongwa o boletše le nna go ya kamoo a laetšwego ke lentšu la Jehofa, a re: ‘Mmotše a boele le wena ntlong ya gago gore a je senkgwa a be a nwe meetse.’” (O be a mo fora.)"

²⁹Ka gona a boela morago le yena e le gore a je senkgwa ntlong ya gagwe a be a nwe meetse."

³⁰Ya re ge ba dutše tafoleng, lentšu la Jehofa la tlela moporofeta yo a bego a bušeditše monna yoo morago;"

³¹a goeletša monna yoo wa Modimo wa therešo yo a bego a etšwa Juda, a re: “Se ke seo Jehofa a se boletšego: ‘Ka baka la ge o rabetše taelong ya Jehofa gomme wa se lote taelo yeo Jehofa Modimo wa gago a go laetšego yona,"

³²eupša wa boela morago gore o yo ja senkgwa le go nwa meetse lefelong leo a boletšego le wena ka lona a re: “O se ke wa ja senkgwa goba wa nwa meetse moo,” gona setopo sa gago se ka se išwe mabitleng a borakgolokhukhu ba gago.’”"

³³Ka morago ga ge a jele senkgwa e bile a nwele seno, gateetee moporofeta a rweša pokolo ya monna wa Modimo wa therešo sala, ya yena moporofeta yo a bego a boile le yena."