David's Warriors

¹Mo go barwa ba Simeone, banna ba bogale ba matla ba madira e be e le ba dikete tše šupago le lekgolo (7 100)."

²Mo go barwa ba Lefi e be e le ba dikete tše nne-makgolotshela (4 600)."

³Jehoyada e be e le moetapele wa barwa ba Arone, gomme yena o be a na le ba dikete tše tharo-makgološupa (3 700)."

⁴Gare ga bona go be go na le Tsadoko wa lesogana, wa mogale e bile a le matla, a na le ba ntlo ya borakgolokhukhu ba gagwe, e lego dikgošana tše masomepedi-pedi."

⁵Go barwa ba Benjamini, bona bana babo Saulo, go be go na le ba dikete tše tharo (3 000) gomme go fihla ka nako yeo bontši bja bona bo be bo hlokometše ka šedi ntlo ya Saulo."

⁶Go barwa ba Efuraime go be go na le ba dikete tše masomepedi-makgoloseswai (20 800), banna ba bogale ba matla, banna ba go tuma go ya ka malapa a borakgolokhukhu ba bona."

⁷Go ba seripa sa moloko wa Manase go be go na le ba dikete tše lesomeseswai (18 000) bao ba bego ba hlaotšwe ka maina gore ba tlo bea Dafida kgoši."

⁸Go barwa ba Isakara ba go ba le tsebo ya go lemoga mehla le go tseba seo Isiraele e swanetšego go se dira, go be go na le dihlogo tša bona tše makgolopedi, gomme bana babo bona ka moka ba be ba le gona go ya ka taelo ya bona."

⁹Go ba moloko wa Sebulone bao ba tšwago dira, bao ba rulagantšwego ka mokgwa wa bao ba yago tlhabanong e bile ba na le dibetša tša bona ka moka tša ntwa, e be e le ba dikete tše masomehlano (50 000), gomme go bona bao ba bego ba bokane go Dafida go be go se ba pelopedi."

¹⁰Go ba Nafutali go be go na le dikgošana tše sekete (1 000), ba na le ba dikete tše masometharo-šupa (37 000) bao ba bego ba swere dikotse tše kgolo le marumo."

¹¹Mo go Badani, bao ba bego ba rulagantšwe ka mokgwa wa go ya tlhabanong e be e le ba dikete tše masomepedi-seswai-makgolotshela (28 600)."

¹²Go ba Ashere, bao ba bego ba eya ntweng ka mokgwa wa tlhabano e be e le ba dikete tše masomenne (40 000)."

¹³Go tšwa ka mošola wa Noka ya Jorodane, mo go Barubeni, Bagada le seripa sa moloko wa Manase, bao ba bego ba na le dibetša ka moka tša bahlabani e be e le ba dikete tše lekgolo-masomepedi (120 000)."

¹⁴Ba ka moka e be e le banna ba ntwa, e le bao ba bego ba ka ya ntweng; ba tlile go Dafida ka pelo e feletšego kua Heburone gore ba mmee kgoši ya Isiraele ka moka; le gona ba bangwe ka moka ba Isiraele ba be ba dumelelana ka pelo e tee gore Dafida e be kgoši."

¹⁵Ba dula moo le Dafida matšatši a mararo, ba eja e bile ba enwa, gobane bana babo bona ba be ba ba lokišeditše seo."

¹⁶Le gona bao ba bego ba le kgauswi le bona go ba go fihla ka bao ba lego kgole nageng ya Isakara, ya Sebulone le ya Nafutali, ba be ba tliša dijo ba di nameditše dipokolo, dikamela, dimeila le dikgomo. E be e le dijo tše di dirilwego ka bupi, dinkgwa tša makwapi a mago, dinkgwa tša makwapi a morara, beine, makhura, dikgomo le dinku ka bontši, ka gobane Isiraeleng go be go thabilwe."

¹⁷Dafida a rerišana le balaodi ba ba dikete, balaodi ba ba makgolo le moetapele yo mongwe le yo mongwe;"

¹⁸ke moka Dafida a bolela le setšhaba ka moka sa Isiraele a re: “Ge e ba le bona e le mo gobotse e bile e le mo go amogelegago go Jehofa Modimo wa rena, a re romeleng lentšu go bana babo rena bao ba šetšego dinageng ka moka tša Isiraele, le go baperisita le Balefi bao ba lego metseng ya bona yeo e nago le mafulo, re ba botše gore ba kgobokane ba tle go rena."

¹⁹Ke moka re tliše areka ya Modimo wa rena go rena.” Ka gobane ba be ba sa e hlokomele mehleng ya Saulo."

²⁰Ka gona phuthego ka moka ya dumela go dira ka tsela yeo, ka ge seo se be se bonagala se lokile mahlong a batho bohle."

²¹Ka go re’alo Dafida a bokanya Isiraele ka moka go tloga ka noka ya Egipita go ba go fihla ge o tsena ka Hamathi, gore a tliše areka ya Modimo wa therešo go tšwa Kiriathe-jearima."

²²Dafida le Baisiraele ka moka ba rotogela Baala, e lego Kiriathe-jearima, yeo e lego ya Juda, gore ba tliše areka ya Modimo wa therešo e lego Jehofa, yena a dutše godimo ga bakerubi, e lego areka yeo e bitšwago ka leina la gagwe."

²³Eupša ba ile ba nametša areka ya Modimo wa therešo godimo ga kariki e mpsha go tšwa ntlong ya Abinadaba gomme Usa le Ahio ba be ba e sepediša."

²⁴Dafida le Isiraele ka moka ba be ba bina pele ga Modimo wa therešo ka matla a bona ka moka, ka dikopelo, diharepa, dikwadi, meropa, disimbala le diphalafala."

²⁵Mafelelong ba ile ba fihla seboeng sa Kidone gomme Usa a otlolla seatla sa gagwe gore a swareletše Areka, gobane dipoo di nyakile di e wiša."

²⁶Ka baka leo bogale bja Jehofa bja tukela Usa, moo a ilego a mmolaya ka ge a otlolotše seatla sa gagwe a swara Areka, gomme a hwela moo pele ga Modimo."

²⁷Ke moka Dafida a galefa ka gobane Jehofa a ile a galefela Usa gateetee; lefelo leo la bitšwa gore ke Peretse-usa go ba go fihla le lehono."

²⁸Ka letšatši leo Dafida a boifa Modimo wa therešo, a re: “Ke tla tliša bjang areka ya Modimo wa therešo go nna?”"

²⁹Dafida a se tliše Areka go yena Motseng wa Dafida, eupša a e arošetša ntlong ya Obede-edomo wa Mogathe."

³⁰Areka ya Modimo wa therešo ya ba lapeng la Obede-edomo, ya ba ka ntlong ya gagwe dikgwedi tše tharo; Jehofa a šegofatša lapa la Obede-edomo le tšohle tšeo e bego e le tša gagwe."

³¹Hirama kgoši ya Tiro a romela baromiwa go Dafida gore ba mo agele ntlo, a romela le dikota tša motsedara, baagi ba maboto le bašomi bao ba šomago ka kota."

³²Ka gona Dafida a tseba gore Jehofa o mo tiišeditše go ba kgoši ya Isiraele, gobane bogoši bja gagwe bo ile bja phagamišetšwa godimo ka baka la setšhaba sa gagwe sa Isiraele."

³³Dafida a nyala basadi ba bangwe gape kua Jerusalema gomme a ba tatago barwa ba bangwe gape le barwedi."

³⁴Maina a bana bao a bilego le bona Jerusalema šea: Shamua, Shobaba, Nathane, Solomone"

³⁵le Ibehara, Elishua, Elipelete"

³⁶le Noga, Nefege, Jafia"

³⁷le Elishama, Beelayada le Elifelete."

³⁸Bafilisita ka moka ba kwa gore Dafida o tloditšwe go ba kgoši ya Isiraele ka moka. Ka gona Bafilisita ka moka ba rotoga ba tla ba nyaka Dafida. Ge Dafida a ekwa seo, a tšwa go yo lwa le bona."

³⁹Bafilisita bona ba tla ba hlasela moeding wa Barefai."

⁴⁰Dafida a botšiša Modimo a re: “Na ke rotoge ke yo lwa le Bafilisita, le gona na o tla ba gafela seatleng sa ka?” Ge a re’alo Jehofa a re go yena: “Rotoga, gomme nna ke tla ba gafela seatleng sa gago.”"